Yosũa 24 - AMASAKO ABOYTRTRE WA NYAMUHANGA AWAKAHULAWA MO BIBLIA

Yosũa akahana Abaĩsraelĩ eSekemũ

¹ Neryo Yosũa mwahĩndanĩa ebihanda byosĩ bya Ĩsraelĩ eSekemũ, mwabirikira abakulu ba Ĩsraelĩ, nʼabakama babo, nʼabatswerĩ babo nʼabĩmanĩrĩ babo; nabo mobayĩhũlũkya embere sya Nyamuhanga.

² Na Yosũa mwabwira abandu bosĩ, ati, Omwami Mukulu, Nyamuhanga wa Ĩsraelĩ akabũga ati, Oko mugulu wa kera abotata-kulu wenyũ mobĩkala eyisirya wʼolũsĩ Efũratĩ, ye Tera, tata wa Abrahamũ, na tata wa Nahorĩ; mobakolera esindi nyamuhanga.

³ Neryo monalũsya tata wenyũ Abrahamũ eyisirya wʼolũsĩ Efũratĩ, kandi monamusondola omo kihugo kyosĩ kyʼeKanana, monakanyĩrĩrya abana buwe, monamuha Ĩsaka.

⁴ Kandi Ĩsaka monamuha Yakobo na Esaũ; na Esaũ monamuha ekitwa kyʼeSeĩrĩ, asĩgalayekyo; kandi Yakobo nʼabana buwe mobandagalira eMĩsĩrĩ.

⁵ Kandi monatuma Musa na Harũnĩ monagalya eMĩsĩrĩ umwʼebyo nakola omo katĩkatĩ kabo; nʼenyũma monabalũsyayo.

⁶ Kandi monalũsya abotata-kulu benyũ bʼeMĩsĩrĩ; nenyũ momwahĩka oko ngetsi; nʼAbanya Mĩsĩrĩ mobakwama abotata-kulu benyũ nʼesyogalĩ nʼabali oko syosabayĩrĩ erĩhĩka oko Ngetsi yʼEngula.

⁷ Nʼomugulu balirira Omwami Mukulu, iye mwahĩra omũhĩndanĩa omo katĩkatĩ kenyũ nʼAbanya Mĩsĩrĩ, kandi, mwaleta engetsi yo kubo, moyakũnĩngĩrabo; nʼameso wenyũ mwalangira ebyo nakola eMĩsĩrĩ. Nenyũ momwĩkala omo mbwarara ebiro binene.

⁸ Kandi monabaleta omo kihugo kyʼAbaamorĩ, ababya bĩkere eyisirya wʼeYorodanĩ; nabo mobalwa nenyũ; nage monahĩrabo omo byala byenyũ, nenyũ momwasĩgalya ekihugo kyabo, omugulu naherayabo embere syenyũ.

⁹ Neryo Balaka mugala wa Sĩporĩ, omwami wʼeMoabũ mwahangana erilwa na Ĩsraelĩ; naye mwatumira uku Balama mugala wa Beorĩ eribatakira.

¹⁰ Nĩkwa mondahulikirira Balama; kyaleka iniabatsumula; nage monabalamya omo byala biwe nyitya.

¹¹ Nenyũ momwasoka eYorodanĩ, momwahĩka eYerĩko; nʼabandu bʼeYerĩko mobalwa nenyũ, Omũamorĩ, nʼOmũperĩzĩ, nʼOmukanana, nʼOmũhĩtĩ, nʼOmũgĩrgasĩ, nʼOmũhĩvĩ, nʼOmũyebũsĩ; kandi monahĩrabo omo byala byenyũ.

¹² Neryo monatuma esyondwa embere syenyũ, esyahigabo embere syenyũ, abami babiri bʼAbaamorĩ; butsira omo mũyalĩ wawe kutse omo buta bwawe.

¹³ Monabaha ekihugo ekyo mutaluhira, nʼemĩyĩ eyo mũtahĩmba, nenyũ mwĩkere muyo; nʼamalima wʼebĩnyũ nʼamalima wʼemĩzeĩtũnĩ ago mutahera, ago mukalya.

Muyisoge oyo mwasyakolera

¹⁴ Na lino mubahe Omwami Mukulu, mumukolere omo kwenene nʼekũndũ; mũhĩre esyonyamuhanga syo hali esyo abotata-kulu benyũ bakolera eyisirya wʼolũsĩ Efũratĩ, nʼeMĩsĩrĩ; mukolere Omwami Mukulu.

¹⁵ Kandi kyamabya kibi omo meso wenyũ erikolera Omwami Mukulu, muyisoge mũnabwĩre oyo mwasyakolera; syamabya esyonyamuhanga esyo abotata-kulu benyũ bakolera eyisirya wʼolũsĩ lwʼeEfũratĩ, kutse esyonyamuhanga syʼAbaamorĩ, eyo mwĩkere omo kihugo kyabo; nĩkwa ĩngye nʼekĩtũnga kyage, twasyakolera Omwami Mukulu.

¹⁶ Nʼabandu mobamũsũbĩrya bati, Kibye hali kwĩtwe erireka Omwami Mukulu erikolera esindi nyamuhanga;

¹⁷ kusangwa Omwami Mukulu Nyamuhanga wetu, nina ye watũlũsaya nʼabotata wetu omo kihugo kyʼeMĩsĩrĩ, omo nyũmba yʼobukobe, kandi oyo wakola ebitikotiko binene omo meso wetu, mwatũteya omo nzira yosĩ eyo twasira, nʼomo katĩkatĩ kʼebihanda byosĩ twalabamo.

¹⁸ NʼOmwami Mukulu mwahiga embere syetu ebihanda byosĩ, Abaamorĩ ababya bĩkere omo kihugo; neryo ĩtwe nibya twasyakolera Omwami Mukulu; kusangwa iye ni Nyamuhanga wetu.

¹⁹ Na Yosũa mwabwira bandu ati, Simwangatoka erikolera Omwami Mukulu; kusangwa iye ni Nyamuhanga abũyĩrĩre; ni Nyamuhanga wʼobũha; siendisyabuyira amalolo wenyũ kutse ebibi byenyũ.

²⁰ Mwamasĩganĩa Omwami Mukulu, nʼerikolera esyonyamuhanga syʼehandi, neryo asyabinduka nʼeribakola nabi, nʼerĩbatĩnda enyũma wʼeribakola ndeke.

²¹ Nʼabandu abo mobabwira Yosũa, bati, Iyihi, nĩkwa twasyakolera Omwami Mukulu.

²² Na Yosũa mwabwira bandu, ati, ĩnywe muli balangĩrĩ mukayilangirira ngoko mwabiriyisoga Omwami Mukulu, erimukolera. Nabo mobabũga bati, Ĩtwe tuli balangĩrĩ.

²³ Neryo lino mũlũsaye esyonyamuhanga syʼehandi esiri omo katĩkatĩ kenyũ, mũlolaye emitima yenyũ oko Mwami Mukulu, Nyamuhanga wa Ĩsraelĩ.

²⁴ Nʼabandu mobabwira Yosũa, bati, Omwami Mukulu, Nyamuhanga wetu yo twasyakolera, kandi omulenge wuwe go twasyahulikirira.

²⁵ Litya, Yosũa mwayira endagano nʼabandu ekiro ekyo, mwahĩrĩrabo omugambo nʼekilayiro eSekemũ.

²⁶ Kandi Yosũa mwasaka ebĩnywa ebĩ omo kitabu kyʼebihano bya Nyamuhanga; neryo mwĩmya erĩbwe rĩnene mwasingikalyo aho, omo ndĩna yʼomuti gʼomũalonĩ owabya hakũhĩ nʼahʼerĩĩkala habũyĩrĩre hʼOmwami Mukulu.

²⁷ Neryo Yosũa mwabwira abandu bosĩ, ati, Lebaya, erĩbwe erĩ ryasyabya ĩtũlago busana netu; kusangwa lyabĩrĩowa ebĩnywa byosĩ byʼOmwami Mukulu ebyo atubwira; kyasyaleka iryabya ĩtũlago busana nenyũ, mukasyagana Nyamuhanga wenyũ.

²⁸ Litya Yosũa mwahongokya abandu, obuli mundu oko mwandu wuwe.

Oluholo lwa Yosũa

²⁹ Neryo enyũma wʼemyatsi eyĩ, Yosũa mugala wa Nũnĩ, omugombe wʼOmwami Mukulu, mwahola, iniawite myaka erĩgana nʼerĩkũmĩ.

³⁰ Mobamuta oko mutano wʼomwandu wuwe eTĩmũnatĩ-sera, eyiri omo kihugo kyʼebitwa kya Efũraĩmũ ebwanga bwʼelutambi lwʼendata lwʼekitwa kyʼeGasĩ.

³¹ Kandi Abaĩsraelĩ mobakolera Omwami Mukulu ebiro byosĩ bya Yosũa, nʼoko biro byosĩ byʼabakulu abakota kwilaba Yosũa, kandi abaminya omũbĩrĩ gosĩ wʼOmwami Mukulu, ogo akolera Ĩsraelĩ.

Erita amakũha wa Yosefũ, nʼoluholo lwa Eleazarĩ

³² Nʼamakũha wa Yosefũ ago abana ba Ĩsraelĩ balũsaya eMĩsĩrĩ, mobatago eSekemũ, omo lubibi lwʼekitaka ekyo Yakobo agula oko bĩtsĩpa erĩgana oko bana ba Hamorĩ ĩse wa Sekemũ. Nalo molwabya mwandu wʼabana ba Yosefũ.

³³ Neryo Eleazarĩ mugala wa Harũnĩ mwahola; neryo mobamuta oko kitwa kya Fĩnehasĩ mugula wuwe, ekyo ahabawa omo kihugo kyʼebitwa kya Efũraĩmũ.