Yosũa 23 - AMASAKO ABOYTRTRE WA NYAMUHANGA AWAKAHULAWA MO BIBLIA

Yosũa akalaga abakulu ba Ĩsraelĩ

¹ Neryo enyũma wʼebiro bingi, Omwami Mukulu abĩlũhũkya Ĩsraelĩ oko nzĩgũ syabo syosĩ oko mbande syosĩ, kandi Yosũa iniamabibya mũsyakulu nʼowʼemyaka mingi;

² Yosũa mwabirikira Abaĩsraelĩ bosĩ, nʼabakulu babo nʼabakama babo, nʼabatswerĩ babo nʼabĩmanĩrĩ babo, neryo mwabwirabo ati, Nabiribya mũsyakulu nʼowʼemyaka mingi.

³ Nenyũ mwabirilangira ebyosĩ ebyo Mwami Mukulu Nyamuhanga wenyũ abirikolera ebihanda ebĩ busana nenyũ, kusangwa Omwami Mukulu Nyamuhanga wenyũ, yo wabiribalwira.

⁴ Lebaya nabiribagabira omo mugereko ebihanda ebĩ ebĩsakĩre, eribya mwandu busana nʼebihanda byenyũ erĩtsũka eYorodanĩ, haguma nʼebihanda byosĩ ebyo nabĩrĩtĩnda, erĩhĩka oko Ngetsi Nene ebwanga bwʼerirenga lyʼeryuba.

⁵ Kandi Omwami Mukulu Nyamuhanga wenyũ, iye asyahigirabo eyĩhya embere syenyũ, nʼeribingirabo erĩlũsyabo omo meso wenyũ; nenyũ mwasyasĩgalya ekihugo kyabo ngoko Mwami Mukulu Nyamuhanga wenyũ abalaga.

⁶ Neryo muhande omutima go kutsibu erĩteya nʼerikola ebyosĩ ebĩsakĩre omo kitabu kyʼemigambo ya Musa, imutakitira ehandi erirekayo oko luhande lwʼamali kutse oko malembe;

⁷ isimwatamba nʼebihanda ebĩ, ebĩsĩgalĩre omo katĩkatĩ kenyũ; kutse eriahula amena wʼesyonyamuhanga syabo, kutse erireka omundu akalahĩrya kusyo kutse erikolerasyo, kutse erĩyũnama embere wasyo.

⁸ Nĩkwa eryamakirira Omwami Mukulu Nyamuhanga wenyũ, ngoko mwabirikola erĩhĩka mũnabwĩre.

⁹ Kusangwa Omwami Mukulu abirihigira eyĩhya embere syenyũ ebihanda binene nʼebyʼamaka; nĩkwa mohatabya mundu ukahangana embere syenyũ erĩhĩka mũnabwĩre.

¹⁰ Omundu muguma gʼũkwʼĩnywe asyahiga abandu elfu, kusangwa Omwami Mukulu Nyamuhanga wenyũ, yukabalwira, ngoko abalaga.

¹¹ Neryo mũyĩtegaye imwanza Omwami Mukulu Nyamuhanga wenyũ.

¹² Kusangwa mwamasuba enyũma na kera, nʼerimakirira oko basĩgalĩre oko bihanda ebĩ, nʼerĩherũkanĩa nabo, nʼerisiba nabo, nabo ewenyũ,

¹³ muminye kwenene ngoko Mwami Mukulu Nyamuhanga wenyũ siendisyaswahiga ebihanda ebĩ erĩlũa omo meso wenyũ; nĩkwa byasyabya muguli nʼekitego busana nenyũ, nʼenyama oko nganga syenyũ, nʼemisakisaki omo meso wenyũ, erĩhĩka aho mwasyaherera erĩlũa omo kihugo kibuya ekyo Mwami Mukulu Nyamuhanga wenyũ abiribaha.

¹⁴ Na lino lebaya, mũnabwĩre ngagenda omo mibere yʼekihugo kyosĩ; nenyũ mũnasĩ omo mitima yenyũ yosĩ nʼomo bĩrĩmũ byenyũ byosĩ, ngoko hate kĩnywa nʼekiguma ekĩkehĩre oko bĩnywa byosĩ byowene ebyo Mwami Mukulu Nyamuhanga wenyũ abũga busana nenyũ; ebyosĩ byabiribererera busana nenyũ, sihali kindu nʼekiguma ekyabula.

¹⁵ Neryo ngoko ebĩnywa byosĩ byowene byabĩrĩbahĩkako ebyo Mwami Mukulu Nyamuhanga wenyũ ababwira, litya Omwami Mukulu asyabakolera emyatsi yosĩ yʼerĩũbahya, erĩhĩka aho asyabahererya erĩlũa omo kihugo kibuya ekĩ ekyo Mwami Mukulu Nyamuhanga wenyũ abiribaha.

¹⁶ Omugulu mwasyahalya oko ndagano yʼOmwami Mukulu Nyamuhanga wenyũ, eyo abahana, mukayakolera esindi nyamuhanga, nʼerĩyũnamirasyo, neryo erihitana lyʼOmwami Mukulu lyasyabagulumirako, kandi mwasyahera lũba erĩlũa omo kihugo kibuya ekyo abiribaha.