Yosũa 20 - AMASAKO ABOYTRTRE WA NYAMUHANGA AWAKAHULAWA MO BIBLIA

Emĩyĩ eyʼobusayiro

¹ Neryo Omwami Mukulu mwabũga na Yosũa, ati,

² Ubwire abana ba Ĩsraelĩ, uti, Mũyĩhĩrĩre emĩyĩ yʼobusayiro eyo nababwira omo buno bwa Musa,

³ Neryo oyũkĩta Omundundi omwʼĩbũlĩkĩra ĩsĩasĩ iniasagirako; nayo yasyabya obusayiro busana nenyũ oko yũkakĩsaya omusasi.

⁴ Naye asyasagira oko muguma wʼemĩyĩ eyo, kandi asyahangana oko lũkyo lwʼobwingiriro bʼomũyĩ, ĩnĩatũlĩra omwatsi wuwe gʼomo matwĩ wʼabakulu bʼomũyĩ oyo; nabo basyamũkokya omo mũyĩ, ibamuha ahʼerĩĩkala omo katĩkatĩ kabo.

⁵ Kandi omũkĩsya wʼomusasi amamukwama, sibendisyaha omwĩtĩ oyo omo byala biwe; kusangwa ĩta mũlĩkyabo omwʼĩbũlĩkĩra, kandi isyabya amũkwĩre busu erĩmbere.

⁶ Neryo asyĩkala omo mũyĩ oyo, erĩhĩka omugulu asyahangana embere syʼendeko busana nʼomusango erĩhĩka oko luholo lwʼomũhererĩ mukulu oyo Wasyabya oko biro ebyo. Neryo oyũkĩta omundu asyasuba oko mũyĩ wuwe, nʼoko nyũmba yiwe, nʼoko mũyĩ ogo alũako akasaga.

⁷ Kandi mobasolola eKedesĩ eGalĩlaya omo kihugo kyʼebitwa kya Nafũtalĩ, nʼeSekemũ omo kihugo kyʼebitwa kya Efũraĩmũ, nʼeKĩrĩatĩ-Arba eyo ye Hebũronĩ omo kihugo kyʼebitwa kyʼeYũda.

⁸ Nʼeyisirya wʼeYorodanĩ, eYerĩko erilola endata, mobahula eBezerĩ omo mbwarara omo bwerere bwʼekihanda kya Rũbenĩ, nʼeRamotĩ omo Gĩleadĩ omo kihanda kya Gadĩ, nʼeGolanĩ omo Basanĩ, omo Basanĩ, omo kihanda kya Manase.

⁹ Eyo ye mĩyĩ yahĩrawa busana nʼabana ba Ĩsraelĩ, na busana nʼowʼehandi oyukabungira omo katĩkatĩ kabo, oyũkĩta omundu omwʼĩbũlĩkĩra iniatoka erisagirayo, ĩsyakwĩra omo byala byʼomũkĩsya wʼomusasi, erĩhĩka aho asyahanganira embere syʼendeko.