Yosũa 2 - AMASAKO ABOYTRTRE WA NYAMUHANGA AWAKAHULAWA MO BIBLIA

Yosũa akatuma abalĩngĩ eYerĩko

¹ Neryo Yosũa mugala wa Nũnĩ mwatuma abalume babiri bakalũa eSĩtĩmũ mo balĩngĩ bũbĩso-bĩso ati, Mugende, mũyĩtegereraye ekihugo, kandi nʼeYerĩko. Neryo mobagenda, mobahĩka omo nyũmba yʼomũmalaya oyukahulawa mo Rahabũ, mobagotsera aho.

² Kandi omwami wʼeYerĩko mwabwirwa ambu, Lebaya, abalume bʼomo bana ba Ĩsraelĩ mobakahĩka hano omo kiro mũnabwĩre, eriringa ekihugo.

³ Neryo omwami wʼeYerĩko mwatuma uku Rahabũ ati, Hũlũkaya abalume abalyakũhĩkako, ababiringira omo nyũmba yawe; kusangwa balyasyalinga ekihugo.

⁴ Neryo omũkalĩ oyo mwĩmya abalume babiri abo, mwabĩsabo; kandi mwabũga ati, Ega aho wage mohakahĩka abalume, nĩkwa sĩndwe nyasĩ eyo bakalũa.

⁵ Neryo hakũhĩ nʼomugulu wʼerikinga esyongyo, obũtũkũ bwabĩra, abalume abo mobahũlũkĩre; Sĩnyasĩ eyo baya, mukwamebo lũba; mũkandĩhĩka kubo.

⁶ Nĩkwa iye ĩnĩamabĩhetũkĩryabo oko lutwe, nʼerĩbĩsabo omo biti byʼekĩtanĩ, ebyo atondekanaya oko lutwe.

⁷ Nʼabandu abo mobakwamirirabo omo nzira yʼYorodanĩ erĩhĩka oko kisokero; neryo abakwamirirabo babere babĩhĩka eyĩhya mobakinga olũkyo.

Embĩta ya Rahabũ nʼabalĩngĩ

⁸ Kandi bate bagotsera, Rahabũ mwahetukira aho bali omo lutwe;

⁹ neryo mwabũga nʼabalume abo ati, Nyĩnasĩ ko Mwami Mukulu abiribaha ekihugo, nʼobuba bwenyũ bwabĩrĩtũhĩkako, nʼesyondũlanĩ syosĩ syʼekihugo syabirisendekerera embere syenyũ.

¹⁰ Twabĩrĩowa ngoko Mwami Mukulu ũmaya amagetsi wʼEngetsi yʼEngula embere syenyũ, omugulu mwalũa eMĩsĩrĩ; nʼebyo mwakolera abami babiri bʼAbaamorĩ, ababya eyisirya wʼeYorodanĩ, Sĩhonĩ na Ogĩ, abo mwaheraya kutsibu.

¹¹ Neryo omugulu towago, emitima yetu moyasendekerera, kutse mohataswasĩgala oyuli mʼomutima nʼomuguma busana nenyũ; kusangwa Omwami Mukulu Nyamuhanga wenyũ, iye ni Nyamuhanga omo lubula mwʼendata nʼomo kihugo mwʼeyĩkwa.

¹² Na lino, ngabasaba mũnyĩlahĩrĩraye oko Mwami Mukulu, kusangwa nabiribakola ndeke, nenyũ mwasyakola ndeke ekĩtũnga kya tata, nʼerimba ekĩmĩnyĩsyo kyo kwenene;

¹³ kandi mwasyalamya tata, na koyo, nʼabagala betu nʼabali betu, nʼebyosĩ ebyo tuwite, kandi mwasyalamya esyongebe syetu oko luholo.

¹⁴ Nʼabalume mobabũga naye bati, Engebe yetu omo mwanya wʼeyenyũ, mwamatĩndatũlaganĩa omwatsi wetu; neryo omugulu Omwami Mukulu asyatuha ekihugo, netu twasyabakola ndeke nʼekwenene.

¹⁵ Neryo mwandagalyabo oko lukoba omwʼĩdĩrĩsa; kusangwa enyũmba yiwe yabya oko mũsĩke wʼolũhĩmbo naye ĩnĩahĩmbĩre oko lũhĩmbo.

¹⁶ Kandi mwabũga nabo ati, Mugende oko kitwa, ababakwamĩre bakasyabeya; mũyĩbĩse ebiro bisatu, erĩhĩka aho ababakwamĩre basyasubulira; nʼenyũma wʼaho imwayigendera.

¹⁷ Nʼabalume abo mobabũga naye bati, Twasyabya butsira musango wʼerĩlahĩrya lyawe erĩ eryo wabĩrĩtũlahĩrĩrya,

¹⁸ kite omugulu tũkahĩka omo kihugo, wamaboha akakoba kʼengula omwʼĩdĩrĩsa eyo watwandagalayako; kandi wasyahĩndanĩa tata wawe, na koyo wawe, nʼabagala benyũ, nʼabosĩ bʼekĩtũnga kya tata wawe bʼomwawe.

¹⁹ Neryo Omundundi oyo wasyahulukira eyĩhya oko syonyũyĩ syʼenyũmba yawe omo nzira, omusasi wuwe asyabya oko mutwe wuwe, netu twasyabya butsira musango; nʼomundundi oyo Wasyabya haguma nawe omo nyũmba, omusasi wuwe asyabya oko mutwe wetu, omundu amamubanda.

²⁰ Nĩkwa wamatũlaganĩa engulu yetu, twasyabya butsira musango wʼerĩlahĩrya eryo watũlahĩrĩraya.

²¹ Naye mwabũga ati, Ngʼebĩnywa byenyũ ko bibye bitya. Neryo mwatumabo, nabo mobahongoka; naye mwaboha engohe yʼengula omwʼĩdĩrĩsa.

²² Nabo mobagenda, mobahĩka oko kitwa, mobĩkalayo ebiro bisatu, erĩhĩka aho abatolya basubulira; nʼabatolya mobasonda-sondabo omo nzira yosĩ, nĩkwa mobatabanabo.

²³ Neryo abalume babiri abo mobasubula, mobakĩma oko kitwa, mobasoka, mobahĩka uku Yosũa mugala wa Nũnĩ; mobamubwira ebyosĩ ebyahĩka kubo.

²⁴ Kandi mobabwira Yosũa bati, Kwenene Omwami Mukulu abĩrĩhĩra ekihugo kyosĩ omo byala byetu; kandi esyondũlanĩ syosĩ syʼekihugo sikasendekerera embere syetu.