Yosũa 17 - AMASAKO ABOYTRTRE WA NYAMUHANGA AWAKAHULAWA MO BIBLIA

Olubibi lwa Manase

¹ Kandi omugereko mwawira oko kihanda kya Manase; kusangwa abya kambere ka Yosefũ. Uku Makĩrĩ akambere ka Manase, ĩse wa Gĩleadĩ mwahabwa eGĩleadĩ nʼeBasanĩ, kusangwa abya mundu wʼamalwa.

² Neryo omugereko abya busana nʼabandi bana ba Manase ngʼebĩtũnga byabo; busana nʼabana ba Abĩezerĩ, na busana nʼabana ba Helekĩ, na busana nʼabana ba Asĩrĩelĩ, na busana nʼabana ba Sekemũ, na busana nʼabana ba Heferĩ, na busana nʼabana ba Semĩda; aba babya bagala ba Manase omugala wa Yosefũ ngʼebĩtũnga byabo.

³ Nĩkwa Zelofehadĩ, mugala wa Heferĩ, mugala wa Gĩleadĩ, mugala wa Makĩrĩ, mugala wa Manase, siabya awite bagala, ba nʼabali basa; nʼaya wa mena wʼabali buwe; Mala, na Noa, Hogla, Mĩlka, na Tĩrza.

⁴ Nabo mobasegera hakũhĩ embere syʼomũhererĩ Eleazarĩ, nʼembere sya Yosũa mugala wa Nũnĩ, nʼembere syʼabasondolĩ, batĩ, Omwami Mukulu mwahana Musa erituha omwandu omo katĩkatĩ kʼabagala betu; neryo Ukwʼekyo ngʼerihana lyʼOmwami Mukulu mwahabo omwandu omo katĩkatĩ kʼabĩse-mulere wabo.

⁵ Kandi amagabo ĩkũmĩ mwawira Manase, nʼekihugo kyʼeGĩleadĩ nʼeBasanĩ ebiri eyisirya wʼeYorodanĩ;

⁶ kusangwa abali ba Manase mobabya nʼomwandu omo katĩkatĩ kʼabagala buwe. Nʼekihugo kyʼeGĩleadĩ mokyabya kyʼabandi bagala ba Manase abasaka.

⁷ Nʼomutano wa Manase atsũka eAserĩ erĩhĩka eMĩkametatĩ, eyiri embere wʼeSekemũ; nʼomutano mwalaba oko syondũlanĩ syʼeEnĩ-tapũa.

⁸ Ekihugo kyʼeTapũa kyabya kya Manase; nĩkwa Tapũa oko mutano wa Manase mwabya wʼabana ba Efũraĩmũ.

⁹ Nʼomutano mwandagalira oko kũsĩ kʼeKana, erilola elutambi lwʼeyĩkwa oko kũsĩ ako. Emĩyĩ eyĩ yabya ya Efũraĩmũ omo katĩkatĩ kʼemĩyĩ ya Manase; nʼomutano wa Manase abya oko luhande lwʼelutambi lwʼendata lwʼakũsĩ, nʼesyombulukiro syago syabya oko ngetsi.

¹⁰ Oluhande lwʼelutambi lwʼeyĩkwa lwabya lwa Efũraĩmũ, nʼolundi lutambi lwʼendata lwabya lwa Manase, nʼengetsi yo yabya mutano wuwe; mobahĩka eAserĩ oko luhande lwʼelutambi lwʼendata, nʼuku Ĩsakarĩ oko luhande lwʼendata

¹¹ Kandi Manase abya awite omo Ĩsakarĩ nʼomo Aserĩ, Betĩ-seanĩ nʼemĩyĩ yago, nʼeĩbleamũ nʼemĩyĩ yago nʼesyondũlanĩ syʼeDorĩ nʼemĩyĩ yasyo, nʼesyondũlanĩ syʼeEnĩ-dorĩ nʼemĩyĩ yasyo, nʼesyondũlanĩ syʼeTanakĩ nʼemĩyĩ yasyo, nʼesyondũlanĩ syʼeMegĩdo nʼemĩyĩ yasyo, bye bitwa bisatu.

¹² Nĩkwa abana ba Manase mobatatoka erihiga esyondũlanĩ syʼemĩyĩ eyo; nĩkwa Abakanana mobahatikana erĩĩkala omo kihugo ekyo.

¹³ Neryo abana ba Ĩsraelĩ babere babibana maka, mobayira Abakanana mo basũbĩ, mobatahigabo kwenene.

¹⁴ Kandi abana ba Yosefũ mobabũga na Yosũa bati, Busana nakĩ wamamba omugereko muguma musa nʼerĩgabo liguma eribya mwandu kwehĩ? Kusangwa indi kihanda kinene, kusangwa erĩhĩka hatya Omwami Mukulu abirinyitsumula.

¹⁵ Na Yosũa mwabũga nabo ati, Wamabya uli kihanda kinene, uye omo mũsĩtũ, uyikondere aho wawe eyo omo kihugo kyʼAbaperezĩ nʼekyʼAbarefaĩmũ; kyamabya ekihugo kyʼebitwa kya Efũraĩmũ ini kike busana nawe.

¹⁶ Nʼabana ba Yosefũ mobabũga bati, Ekihugo kyʼebitwa sĩkĩtũhĩkene; nʼAbakanana bosĩ abĩkere omo kihugo kyʼomusya bawite esyogalĩ syʼekyuma, abali omo Betĩ-seanĩ nʼemĩyĩ yayo nʼabali omo musya wʼeYezreelĩ nibya.

¹⁷ Neryo Yosũa mwabũga nʼekĩtũnga kya Yosefũ, (abo ni Efũraĩmũ na Manase), ati, Uli kihanda kinene, kandi uwite Obũtokĩ bunene; siwendisyabya nʼerĩgabo liguma lisa.

¹⁸ Nĩkwa ekihugo kyʼebitwa kyasyabya kyawe; kusangwa nomo kyangabya kĩsĩtũ, wasyakondakyo, nʼesyombulukiro syago syasyabya syawe; kusangwa wasyahiga Abakanana, nomo bangabya nʼesyogalĩ syʼebyuma, kandi nomo bangabya bʼamaka.