Yosũa 16 - AMASAKO ABOYTRTRE WA NYAMUHANGA AWAKAHULAWA MO BIBLIA

Esyombibi sya Efũraĩmũ na Manase

¹ Nʼomugereko mwawira oko bana ba Yosefũ erĩtsũka eYorodanĩ eYerĩko, erilaba oko magetsi wʼeYerĩko oko luhande lwʼendata eyo ye mbwarara eyitwahetukira eYerĩko erilaba omo kihugo kyʼebitwa erĩhĩka eBetelĩ;

² kandi mwalũa eBetelĩ erĩhĩka eLũzĩ, kandi mwalaba erĩhĩka oko mutano wʼAbaarkĩ erĩhĩka eAtarotĩ;

³ kandi mwandagala oko luhande lwʼeyĩkwa erĩhĩka oko mutano wʼAbayafeletĩ, erĩhĩka oko mutano wa Betĩ-horonĩ wʼeyĩkwa, erĩhĩka eGezerĩ; nʼesyombulukiro syago syabya oko ngetsi.

⁴ Nʼabana ba Yosefũ, Manase na Efũraĩmũ, mobatola omwandu wabo.

⁵ Nʼomutano wʼabana ba Efũraĩmũ ngʼebĩtũnga byabo kwʼabya atya; Omutano wʼomwandu wabo ebwanga bwʼendata abya eAtarotĩ-Adarĩ, erĩhĩka eBetĩ-Horonĩ yʼendata;

⁶ nʼomutano ĩnĩahũlũkĩre oko luhande lwʼeyĩkwa eMĩkĩmetatĩ oko luhande lwʼelutambi lwʼendata; nʼomutano mwabindukira oluhande lwʼendata erĩhĩka eTanatĩsĩlo, mwatwangana endata wʼeYanoa;

⁷ kandi iniandagere erĩlũa eYanoa erĩhĩka eAtarotĩ, nʼeNara, nʼerĩhĩka eYerĩko, nʼerihulukira eYorodanĩ.

⁸ Erĩtsũka eTapũa Omutano mwalola ebwanga bwʼeyĩkwa erĩhĩka oko kũsĩ kʼeKana; nʼesyombulukiro syago syabya oko ngetsi. Oyũ go mwandu wʼekihanda kyʼabana ba Efũraĩmũ ngʼebĩtũnga byabo;

⁹ haguma nʼemĩyĩ eyasololawa busana nʼabana ba Efũraĩmũ omo katĩkatĩ kʼomwandu wʼabana ba Manase, emĩyĩ yosĩ nʼemikondo yayo.

¹⁰ Nabo mobatahiga Abakanana ababya bĩkere eGezerĩ; nĩkwa Abakanana abĩkere omo katĩkatĩ ka Efũraĩmũ erĩhĩka mũnabwĩre, kandi babiribya basũbĩ erikola omũbĩrĩ wʼolulengo.