Yosũa 14 - AMASAKO ABOYTRTRE WA NYAMUHANGA AWAKAHULAWA MO BIBLIA

Kalebũ akahabawa eHebũronĩ

¹ Eyĩ ye myandu eyo abana ba Ĩsraelĩ bĩmaya omo kihugo kyʼeKanana, eyo mũhererĩ Eleazarĩ, na Yosũa mugala wa Nũnĩ, nʼabakulu bʼebĩtũnga byʼabotata wʼebihanda byʼabana ba Ĩsraelĩ, eyagabirawabo,

² omo migereko yʼomwandu wabo, ngoko Mwami Mukulu ahana Musa, busana nʼebihanda mwenda, na busana nʼekihande kyʼekihanda.

³ Kusangwa Musa abya iniabiriha omwandu oko bihanda bibiri nʼekihande kyʼekihanda eyisirya wʼeYorodanĩ; nĩkwa mwataha Abalawĩ bʼomwandu nʼomuguma omo katĩkatĩ kabo.

⁴ Kusangwa abana ba Yosefũ babya bihanda bibiri, Manase na Efũraĩmũ; kandi mobataha Abalawĩ bʼerĩgabo omo kihugo, nĩkwa emĩyĩ misa yʼerĩĩkalamo, haguma nʼobũlĩsĩryo bwabo busana nʼebihangulo byabo na busana nʼebindu byabo.

⁵ Ngoko Mwami Mukulu ahana Musa, abana ba Ĩsraelĩ mobakola batya; neryo mobagaba ekihugo.

⁶ Neryo abana ba Yũda mobasegera hakũhĩ na Yosũa eGĩlgalĩ; na Kalebũ mugala wa Yefũne Omũkenĩzĩ mwabũga naye ati, Ũnasĩ ekĩnywa ekyo Mwami Mukulu abwira Musa omundu wa Nyamuhanga busana nage na busana nawe eKadesĩ-Barnea.

⁷ Nabya wʼemyaka makũmĩ ani omugulu Musa omugombe wʼOmwami Mukulu anyituma erĩlũa eKadesĩ-Barnea eriyalinga ekihugo; kandi monamuletera engulu ngoko yabya omo mutima wage.

⁸ Nĩkwa abagala betu abahetukirayo haguma nage mobasendekererya omutima wʼabandu; nĩkwa ĩngye monakwama Omwami Mukulu Nyamuhanga wage yo kũndũ.

⁹ Kandi Musa mwalahĩrĩrya ekiro ekyo, ati, Kwenene ekihugo ekisando kyawe kyabiriryatako kyasyabya mwandu wawe nʼowʼabana bawe kera na kera, kusangwa wabirikwama Omwami Mukulu Nyamuhanga wage yo kũndũ.

¹⁰ Na lino lebaya, Omwami Mukulu abirinyibika eribyaho, ngoko abũga, emyaka eyĩ amakũmĩ ani nʼeyĩtanu, erĩtsũka omugulu Omwami Mukulu abwira Musa yʼekĩnywa ekĩ, omugulu Abaĩsraelĩ batĩmba-tĩmba omo mbwarara; na lino lebaya, mũnabwĩre indi wʼemyaka makũmĩ munani nʼeyĩtanu.

¹¹ Nyikinawite amaka mũnabwĩre ngoko nabya ekiro Musa anyituma; ngoko amaka wage abya oko mugulu oyo, na lino amaka wage kwʼane atya, oko malwa, nʼokwʼihuluka nʼokwʼingira.

¹² Neryo lino umbe ekihugo ekĩ kyʼebitwa, ekyo Mwami Mukulu ahula ekiro ekyo; kusangwa momwowa ekiro ekyo ngoko Abaanakĩ babyaho, nʼemĩyĩ minene eyĩkangatĩre; kwamũhwa Omwami Mukulu asyabya haguma nage, inahigirabo eyĩhya, ngoko Mwami Mukulu abũga.

¹³ Neryo Yosũa mwamutsumula; mwaha Kalebũ omugala wa Yefũne yʼeHebũronĩ mo mwandu.

¹⁴ Kyaleka eHebũronĩ iyabya mwandu wa Kalebũ mugala wa Yefũne Omũkenĩzĩ erĩhĩka mũnabwĩre; kusangwa mwakwama Omwami Mukulu, yo kũndũ, Nyamuhanga wa Ĩsraelĩ.

¹⁵ Nʼerĩna lyʼeHebũronĩ lyabya erĩmbere Kĩrĩatĩ-Arba; Arba oyo abya mundu mukulu kwilaba abandi omo katĩkatĩ kʼAbaanakĩ. Nʼekihugo mokyatũlera oko malwa.