Yosũa 13 - AMASAKO ABOYTRTRE WA NYAMUHANGA AWAKAHULAWA MO BIBLIA

¹ Neryo Yosũa abya mũsyakulu iniabiribuga emyaka mingi; neryo Omwami Mukulu mwabũga naye ati, Uli mũsyakulu wamabibuga myaka mingi, kandi hakine ekihugo kinene kyʼerĩĩmĩbwa.

² Ekĩ kye kihugo ekĩsĩgere; ebihugo byosĩ byʼAbafĩlĩstĩmĩ, nʼebyosĩ byʼAbagesũrĩ;

³ erĩtsũka eSĩhorĩ, ekĩlolĩre endata eMĩsĩrĩ, erĩhĩka oko mutano wʼEkũronĩ erilola elutambi lwʼendata (ekikaganzawa mo kyʼAbakanana); abakama batanu bʼAbafĩlĩstĩnĩ: Abagazĩ, nʼAbaasdodĩ, Abaaskelonĩ, Abagĩtĩ, nʼAbaekronĩ; kandi nʼowʼeAvĩ,

⁴ oko lutambi lwʼeyĩkwa; ekihugo kyosĩ kyʼAbakanana, nʼeMeara ekyabya kyʼAbasĩdonĩ, erĩhĩka eAfekĩ, erĩhĩka oko mutano wʼAbaamorĩ;

⁵ nʼekihugo kyʼAbagebalĩ, nʼeLebanonĩ hosĩ, erilolera eyo eryuba likasira, erĩtsũka eBaal-gadĩ eyiri eyĩkwa oko kitwa kyʼeHermonĩ erĩhĩkerera omo bwingiriro bwʼeHamatĩ.

⁶ Esyondũlanĩ syosĩ syʼekihugo kyʼebitwa erĩtsũka eLebanonĩ erĩhĩka eMĩserefotĩ-maĩmũ, nʼAbasĩdonĩ bosĩ; nasyahigabo embere syʼabana ba Ĩsraelĩ; nĩkwa ukigabire Ĩsraelĩ mo mwandu, ngoko nabirikuhana.

⁷ Neryo lino ugabe ekihugo ekĩ mo mwandu oko bihanda mwenda, nʼekihande kyʼekihanda kya Manase.

⁸ Abarũbenĩ nʼAbagadĩ mobĩmya omwandu wabo haguma naye, ogo Musa ahabo, eyisirya wʼeYorodanĩ ebwanga bwʼendata, ngoko Musa omugombe wʼOmwami Mukulu ahabo.

⁹ Erĩtsũka eAroerĩ omũyĩ owali oko mũsĩke wʼomusya wʼeArnonĩ, nʼomũyĩ owali omo musya, nʼomo bwerere bosĩ bwʼeMedeba erĩhĩka eDĩbonĩ;

¹⁰ nʼemĩyĩ yosĩ ya Sĩhonĩ omwami wʼAbaamorĩ, oyo watabala eHesbonĩ, erĩhĩka oko mutano wʼabana ba Amonĩ;

¹¹ nʼeGĩleadĩ, nʼomutano wʼeGesũrĩ nʼAbamaka, nʼekitwa kyosĩ kyʼeHermonĩ, nʼeBasanĩ hosĩ erĩhĩka eSaleka;

¹² nʼobwami bosĩ bwa Ogĩ omo Basanĩ, oyo watabala eAstarotĩ nʼeEdĩreĩ (yo wasĩgalira oko basĩgalira bʼAbarefaĩmũ); kusangwa Musa mwĩta aba, kandi mwahigirabo eyĩhya.

¹³ Nĩkwa abana ba Ĩsraelĩ mobatahigira Abagesũrĩ bʼeyĩhya, kutse Abamakatĩ; nĩkwa Gesũrĩ na Makatĩ bĩkere omo katĩkatĩ kʼeĨsraelĩ erĩhĩka na mũnabwĩre.

¹⁴ Nĩkwa mwataha ekihanda kya Lawĩ kyʼomwandu; amahere oko Mwami Mukulu, Nyamuhanga wa Ĩsraelĩ omo muliro gʼomwandu wuwe, ngoko amubwira.

Omwandu wa Rũbenĩ

¹⁵ Kandi Musa mwagabira ekihanda kyʼabana ba Rũbenĩ ngʼolulengo lwʼebĩtũnga byabo.

¹⁶ Omutano wabo abya atsũkĩre eAroerĩ, omũyĩ owali oko mũsĩke wʼomusya wʼeArnonĩ, nʼomũyĩ owali omo katĩkatĩ kʼomusya, nʼobwerere bosĩ hakũhĩ nʼeMedeba;

¹⁷ Hesĩbonĩ, nʼemĩyĩ yosĩ yako eyiri omo bwerere; eDĩbonĩ nʼeBamotĩ-baal, nʼeBetĩ-baal-meonĩ,

¹⁸ nʼeYasa, nʼeKedemotĩ, nʼeMefatĩ,

¹⁹ nʼeKĩrĩataĩmũ, nʼeSĩbũma, nʼeZarotĩsaharĩ oko kitwa kyʼomusya,

²⁰ nʼeBetĩpeorĩ, nʼamandagala wʼePĩsĩga, nʼeBetĩyesĩmotĩ,

²¹ nʼemĩyĩ yosĩ yʼekihugo kyʼobwerere nʼobwami bosĩ bwa Sĩhonĩ omwami wʼAbaamorĩ, oyo watabala eHesĩbonĩ, oyo Musa ĩta haguma nʼabakulu bʼeMĩdĩanĩ, Evĩ, na Redemũ, na Zũrĩ, na Hũrĩ, na Reba, abakama ba Sĩhonĩ, ababya bĩkere omo kihugo.

²² Balama nibya omugala wa Beorĩ, omũlagũlĩ, abana ba Ĩsraelĩ mobamwĩta omo mũyalĩ omo katĩkatĩ kʼabandi abo abĩtawa.

²³ Nʼomutano wʼabana ba Rũbenĩ abya eYorodanĩ. Oyo go mwandu wʼabana ba Rũbenĩ ngʼebĩtũnga byabo emĩyĩ nʼehĩyĩ hyakyo.

Omwandu wa Gadĩ

²⁴ Kandi Musa mwagabira ekihanda kya Gadĩ, oko bana ba Gadĩ, ngʼolulengo lwʼebĩtũnga byabo.

²⁵ Nʼomutano wabo abya eYazerĩ, nʼemĩyĩ yosĩ yʼeGĩleadĩ, nʼekihande kyʼekihugo kyʼabana ba Amonĩ, erĩhĩka eAroerĩ omũyĩ owali embere syʼeRaba;

²⁶ nʼerĩtsũka eHesĩbonĩ erĩhĩka eRamatĩ-mĩzpe, nʼeBetonĩmũ; nʼerĩtsũka eMahanaĩmũ nʼerĩhĩka oko mutano wa Debĩrĩ;

²⁷ nʼomo musya, Bete-haramũ, nʼeBetĩ-nĩmũra, nʼeSũkotĩ, nʼeZafonĩ, ekyasaka oko bwami bwa Sĩhonĩ omwami wʼeHesbonĩ, eYorodanĩ ini mutano erĩhĩka oko ndũlĩ-ndũlĩ yʼengetsi yʼeKĩneretĩ eyisirya wʼeYorodanĩ ebwanga bwʼendata.

²⁸ Oyũ ni mwandu wʼabana ba Gadĩ ngʼolulengo lwʼebĩtũnga byabo, emĩyĩ nʼehĩyĩ hyakyo.

Omwandu wa Manase

²⁹ Kandi Musa mwagabira omwandu wʼekihande kyʼekihanda kya Manase; abya busana nʼekihande kyʼekihanda kyʼabana ba Manase ngʼolulengo lwʼebĩtũnga byabo.

³⁰ Nʼomutano wabo atsũka eMahanaĩmũ, eBasanĩ yosĩ, obwami bosĩ bwa Ogĩ omwami wʼeBasanĩ, nʼemĩyĩ yosĩ yʼeYaĩrĩ, eyiri omo Basanĩ, emĩyĩ makũmĩ ndatu.

³¹ Nʼekihande kyʼeGĩleadĩ nʼeAstarotĩ, nʼeEdĩreĩ, emĩyĩ yʼobwami bwa Ogĩ omo Basanĩ, yabya busana nʼabana ba Makĩrĩ mugala wa Manase, ekyo kye kihande kyʼabana ba Makĩrĩ ngʼolulengo lwʼebĩtũnga byabo.

³² Eyĩ ye myandu eyo Musa agaba omo bwerere bwʼeMoabũ, eyisirya wʼeYorodanĩ eYerĩko, ebwanga bwʼendata.

³³ Nĩkwa Musa mwatagabira ekihanda kya Lawĩ kyʼomwandu. Omwami Mukulu, Nyamuhanga wa Ĩsraelĩ, ni mwandu wabo, ngoko abwirabo.