Yosũa 10 - AMASAKO ABOYTRTRE WA NYAMUHANGA AWAKAHULAWA MO BIBLIA

Abami batanu bakalwa na Gĩbeonĩ

¹ Neryo omugulu Adonĩ-zedekĩ omwami wʼeYerũsalema owa ngoko Yosũa abĩrĩmya eAĩ, nʼerĩheryago kutsibu ngoko akola eYerĩko nʼomwami wako, mwakola eAĩ yʼatya nʼomwami wako, kandi ngoko esyondũlanĩ syʼeGĩbeonĩ syasakana nʼAbaĩsraelĩ, ibane omo katĩkatĩ kabo;

² mobubaha kutsibu, kusangwa eGĩbeonĩ abya mũyĩ munene, ngʼomugulu wʼemĩyĩ yʼOmwami, kandi kusangwa abya munene kwilaba eAĩ, nʼabandu bosĩ bako ini bʼamaka.

³ Neryo Adonĩ-zedekĩ omwami wʼeYerũsalema mwatuma uku Hohamũ omwami wʼeHebronĩ, nʼuku Pĩramũ omwami wʼeYaramũtĩ, nʼuku Yafia omwami wʼeLakĩsĩ, nʼuku Debĩrĩ omwami wʼeEglonĩ, ati,

⁴ Mwase mũnyegaye, mũnyĩwatĩkaye, twĩte eGĩbeonĩ, kusangwa babirisakana na Yosũa nʼabana ba Ĩsraelĩ.

⁵ Neryo abami batanu abo bʼAbaamorĩ, omwami wʼeYerũsalema, omwami wʼeHebronĩ, omwami wʼeYaramũtĩ, omwami wʼeLakĩsĩ, nʼomwami wʼeEglonĩ, mobayĩhĩndanĩa haguma, mobahetuka, nʼemilondo yabo yosĩ yʼabasĩrĩkanĩ, mobalalirira eribambira eGĩbeonĩ, mobalwa nago.

Nyamuhanga akĩta abami omo mabwe wʼamatwa

⁶ Neryo abandu bʼeGĩbeonĩ mobatuma uku Yosũa oko kilaliriro eGĩlgalĩ, bati, Sĩgolobaye okuboko kwawe oko bagombe bawe; utehetukire lũba, ũtũlamaye, ũtũwatĩkaye; kusangwa abami bosĩ bʼAbaamorĩ abĩkere omo kihugo kyʼebitwa babĩrĩhĩndana eritubambira.

⁷ Neryo Yosũa mwalũa eGĩlgalĩ, iye nʼabandu bosĩ bʼamalwa, nʼabandu bosĩ bʼamaka, esyombangĩ.

⁸ Kandi Omwami Mukulu mwabũga na Yosũa ati, Sigubahebo; kusangwa nabĩrĩhĩrabo omo byala byawe; sihali mundu oyo wasyahangana embere syawe.

⁹ Neryo Yosũa mwabũlĩkĩranĩabo; mwahetuka erĩlũa eGĩlgalĩ omo kiro kyosĩ.

¹⁰ NʼOmwami Mukulu mwabũranganĩabo embere sya Ĩsraelĩ, kandi mwĩtabo omo bwĩtĩ bunene eGĩbeonĩ, mwatibita kubo omo nzira eyikahetukira eBetĩ-horonĩ, mwĩtabo erĩhĩka eAzeka nʼerĩhĩka eMakeda.

¹¹ Neryo babere bakinatibita embere sya Ĩsraelĩ omugulu babya omo bwandagala bwʼeBetĩ-horonĩ, Omwami Mukulu mwagusa kubo kwʼamabwe manene-manene awakalũa elubula erĩhĩka eAzeka, neryo mobahola. Abahola omo matwa babya bangi kwilaba abo Baĩsraelĩ bĩta omo mũyalĩ.

Eryuba nʼomukera bikimana

¹² Neryo Yosũa mwabũga nʼOmwami Mukulu omo kiro ekyo Mwami Mukulu ahĩra Abaamorĩ omo byala byʼabana ba Ĩsraelĩ; kandi mwabũga omo meso wa Ĩsraelĩ ati, Eryuba, wimane oko Gĩbeonĩ; Nawe, mukera, omo musya wʼeAĩyalonĩ.

¹³ Nʼeryuba molyimana, nʼomukera mwimana, Erĩhĩka aho ekihanda kyamabĩkĩsĩrya esyonzĩgũ syabo. Ekĩ sĩkĩsakĩre omo kitabu kya Yasarĩ kwehĩ? Nʼeryuba molyimana omo kyanya, molitanguha erirenga omo kiro kiguma kyosĩ.

¹⁴ Kandi sihehatabya ekiro kiringene nakyo embere wakyo kutse enyũma wakyo, aho Mwami Mukulu owĩra omulenge wʼomundu. Kusangwa Omwami Mukulu mwalwira Ĩsraelĩ.

Erĩkwa lyʼabami

¹⁵ Neryo Yosũa mwasubula, nʼAbaĩsraelĩ bosĩ haguma naye, oko kilaliriro eGĩlgalĩ.

¹⁶ Nʼabami batanu aba mobatibita, mobayĩbĩsa omo mwangalũ eMakeda.

¹⁷ Neryo Yosũa mwabwirwa ambu, Abami batanu abo bamabanika, ĩbanabĩsamĩre omo mwangalũ wʼeMakeda.

¹⁸ Neryo Yosũa mwabũga ati, Mũkũmbagalaye amabwe manene-manene oko buno bwʼomwangalũ, kandi mũhĩreho abandu bʼerĩteyabo;

¹⁹ nĩkwa ĩnywe sĩmũsĩgaleyo; mukwamirire esyonzĩgũ syenyũ mubambirebo ebwanga bwʼenyũma. Sĩmũlĩge bakingira omo mĩyĩ yabo; kusangwa Omwami Mukulu Nyamuhanga wenyũ abĩrĩhĩrabo omo byala byenyũ.

²⁰ Neryo Yosũa nʼabana ba Ĩsraelĩ babere babibuga erĩĩtabo omo bwĩtĩ bunene, erĩhĩka aho bamabihwera, nʼabasĩgalĩre babere babingira omo mĩyĩ ĩkangatĩre,

²¹ kandi abandu bosĩ mobasubula omo buholo uku Yosũa omo kilaliriro. Sihabya oyũkasyabebereraya olulimi oko bana ba Ĩsraelĩ nʼomuguma.

²² Neryo Yosũa mwabũga ati, Lĩbũla obuno bwʼomwangalũ, munyiretere abami batanu abali omo mwangalũ.

²³ Neryo mobakola batya, mobamuletera abami batanu ababya omo mwangalũ: omwami wʼeYerũsalema, omwami wʼeHebũronĩ, nʼomwami wʼeYaramũtĩ, omwami wʼeLakĩsĩ, omwami wʼeEglonĩ.

²⁴ Neryo babere babiretera Yosũa yʼabana abo eyĩhya, Yosũa mwabirikira abalume bosĩ ba Ĩsraelĩ, kandi mwabũga nʼabakulu bʼabandu bʼamalwa abagenda haguma naye, ati, Mwase hakũhĩ, mũhĩre ebisando byenyũ oko bĩkya byʼabami aba. Nabo mobasa hakũhĩ, mobahĩra, ebisando byabo oko bĩkya byabo.

²⁵ Na Yosũa mwabũga nabo, ati, Simubahe kutse erĩhahũkya omutima! Mubye nʼamaka muyisige, kusangwa Omwami Mukulu asyakola atya esyonzĩgũ syenyũ syosĩ abo mukalwa nabo.

²⁶ Nʼenyũma wʼaho Yosũa mwakenzengabo, mwĩtabo, kandi mwahanikabo oko miti ĩtanu; mobaleremba oko miti erĩhĩka omwʼĩgologolo.

²⁷ Neryo oko mugulu wʼerirenga lyʼeryuba, Yosũa mwahana; neryo mobahanulabo oko miti, mobagusabo omo mwangalũ ogo babya babĩsamĩremo, kandi mobahĩra amabwe manene-manene omo buno bwʼomwangalũ, erĩhĩka mũnabwĩre.

²⁸ Kandi Yosũa mwĩmya eMakeda ekiro ekyo, mwakenzengago omo boya bwʼomũyalĩ, nʼomwami wako; mwaheryabo kutsibu nʼabandu bosĩ ababyamo; mwatasĩga nʼomuguma; kandi mwakola omwami wʼeMakeda ngoko akola omwami wʼeYerĩko.

²⁹ Kandi Yosũa mwalaba erĩlũa eMakeda, erĩhĩka eLĩbũna, nʼAbaĩsraelĩ bosĩ haguma naye, mobalwa nʼeLĩbũna.

³⁰ Neryo Omwami Mukulu mwahĩrago nʼomwami wako, omo byala bya Ĩsraelĩ; neryo mwakenzengago omo boya bwʼomũyalĩ, nʼabandu bosĩ ababyamo; mwatasĩga nʼomuguma; kandi mwakola omwami wako ngoko akola omwami wʼeYerĩko.

³¹ Kandi Yosũa mwalaba akalũa eLĩbũna, nʼAbaĩsraelĩ bosĩ haguma naye, erĩhĩka eLakĩsĩ, mobahĩra ekilaliriro hakũhĩ nago, mobalwa nago.

³² NʼOmwami Mukulu mwahĩra eLakĩsĩ omo byala bya Ĩsraelĩ; naye mwĩmyago ekiro kyʼakabiri, mwakenzengago omo boya bwʼomũyalĩ, nʼabandu bosĩ ababyamo ngʼebyosĩ akola eLĩbũna.

³³ Neryo Horamũ omwami wʼeGezerĩ mwahetuka erĩyawatĩkya abʼeLakĩsĩ; kandi Yosũa mwamwĩta nʼabandu buwe erĩhĩka aho atamũsĩgĩra nʼomuguma.

³⁴ Kandi Yosũa mwalaba akalũa eLakĩsĩ, nʼAbaĩsraelĩ bosĩ haguma naye, erĩhĩka eEglonĩ; kandi mobahĩra ekilaliriro hakũhĩ nago, mobalwa nago.

³⁵ Kandi mobĩmyago ekiro ekyo, mobaswĩryago omo boya bwʼomũyalĩ; nʼabandu bosĩ ababyamo mwaheryabo kutsibu oko kiro ekyo, ngʼebyosĩ akola eLakĩsĩ.

³⁶ Neryo Yosũa mwahetuka erĩlũa eEglonĩ, nʼAbaĩsraelĩ bosĩ haguma naye, erĩhĩka eHebũronĩ; neryo mobalwa nago.

³⁷ Mobĩmyago, mobĩtago omo boya bwʼomũyalĩ, nʼomwami wako, nʼemĩyĩ yako yosĩ, nʼabandu bosĩ ababyamo; mwatasĩga nʼomuguma, ngʼebyosĩ akola Eglonĩ; nĩkwa mwaheryago kutsibu, nʼabandu bosĩ ababyamo.

³⁸ Kandi Yosũa mwasubula, nʼAbaĩsraelĩ bosĩ haguma naye, erĩhĩka eDebĩrĩ,

³⁹ neryo mwĩmyago, nʼomwami wako, nʼemĩyĩ yosĩ yako; mobĩtago omo boya bwʼomũyalĩ, kandi mobaherya abandu bosĩ ababyamo bo kutsibu; mwatasĩga nʼomuguma; ngoko akola Hebũronĩ, mwayira atya oko Debĩrĩ, nʼoko mwami wako; ngoko akola nibya eLĩbũna, mwami wayo.

⁴⁰ Ko Yosũa ĩta ekihugo kyosĩ kyʼatya, ekihugo kyʼebitwa, nʼelutambi lwʼeyĩkwa nʼekyʼerĩbanda, nʼamandagala, nʼabami babo bosĩ; mwatasĩga nʼomuguma, nĩkwa mwahetya kutsibu abosĩ abahumula, ngoko Mwami Mukulu Nyamuhanga wa Ĩsraelĩ ahana.

⁴¹ Na Yosũa mwĩtabo erĩlũa eKadesĩ-barnea erĩhĩka eGaza nʼekihugo kyosĩ kyʼeGosenĩ erĩhĩka eGĩbeonĩ.

⁴² Yosũa mwĩmya abami bosĩ aba nʼekihugo kyabo oko ndambĩ nguma, kusangwa Omwami Mukulu, Nyamuhanga wa Ĩsraelĩ, mwalwira Ĩsraelĩ.

⁴³ Neryo Yosũa mwasubula, nʼAbaĩsraelĩ bosĩ haguma naye, oko kilaliriro eGĩlgalĩ.