Yona 3 - AMASAKO ABOYTRTRE WA NYAMUHANGA AWAKAHULAWA MO BIBLIA

Yona akayatũlago eNĩnawe

¹ Neryo ekĩnywa kyʼOmwami Mukulu mokyahĩka uku Yona engendo yʼakabiri, kiti,

² Hangana, uye eNĩnawe omũyĩ munene oyo, ũtũlĩrego engulu eyo ngakuhana.

³ Neryo Yona mwahangana, mwaya eNĩnawe ngʼekĩnywa kyʼOmwami Mukulu. Nĩkwa eNĩnawe abya mũyĩ munene kutsibu, owʼolugendo lwʼebiro bisatu.

⁴ Neryo Yona mwatsũka eriingira omo mũyĩ oyo olugendo lwʼekiro kiguma, mwabirikira ati, Hakĩsĩya biro makũmĩ ani, eNĩnawe ĩkwaherĩbwa.

AbʼeNĩnawe bakabinduka

⁵ Nʼabandu bʼeNĩnawe mobĩkĩrĩrya Nyamuhanga. Mobahĩra eritsira akalyo, mobambala emisarandwe, erĩtsũka oko bakulu erĩhĩka oko bake-bake ba kubo.

⁶ Nʼesyongulu esyo mosyahĩka oko mwami wʼeNĩnawe, naye mwahangana oko kĩtũmbĩ kiwe kyʼobwami mwayambula ekanzu yiwe, mwambala emisarandwe, mwĩkala omwʼĩbũ.

⁷ Neryo omwami mwahamula ati, Omo Nĩnawe omwʼihamula lyʼOmwami nʼabakulu buwe, Sihabye mundu kutse nyama, esyonde kutse ekĩhyo, sĩkagerya ekindu; sisirye akalyo kutse erĩpũlya amagetsi.

⁸ Nĩkwa baswikawe emisarandwe, abandu nʼesyonyama, kandi abandu balakire Nyamuhanga yo kutsibu; ega, babinduke obuli mundu erĩlũa omo nzira yiwe nyibi, nʼerĩlũa omo butsibu obuli omo byala byabo.

⁹ Nindi wasĩ Nyamuhanga ngʼanganabinduka nʼeriyisubako, nʼerireka erihitana liwe lĩkalĩre, itutahera kwehĩ?

¹⁰ Neryo Nyamuhanga mwalangira emĩbĩrĩ yabo, ngoko bamabinduka erĩlũa omo syonzira nyibi syabo; na Nyamuhanga mwayisubako oko kibi ekyo abũga ati akandikolabo; mwatakolakyo.