Yona 2 - AMASAKO ABOYTRTRE WA NYAMUHANGA AWAKAHULAWA MO BIBLIA

Erisaba lya Yona

¹ Neryo Yona mwasaba Omwami Mukulu Nyamuhanga wuwe omo nda yʼesamakĩ nene eyo.

² Mwabũga ati, Monalakira Omwami Mukulu omo bũlĩge bwage, Naye mwanyĩsũbĩrya, Monalakira erĩwatĩkĩbwa omo nda yʼeKũlĩmũ, Mowowa omulenge wage.

³ Kusangwa mowanyigusa omo mitobero, Omo mutima wʼesyongetsi; Nʼerigunga molyanyĩtĩmbako; Ebisunda byawe byosĩ nʼerigunga lyawe mobyanyirengako.

⁴ Nage monabũga nyiti, Namaguswa hali oko meso wawe; Nĩkwa nasyaswatungerera oko bwanga bwʼeHekalũ yĩbũyĩrĩre yawe.

⁵ Amagetsi amanyĩtĩmbako erĩhĩka oko mutima wage; Emirindi moyanyĩtĩmbako; Olũlĩbo molwayĩrĩngĩra oko mutwe wage.

⁶ Monandagalira omo ndĩna yʼebitwa; Ekihugo nʼesyongome syakyo mobyanyĩtĩmbako kera na kera. Nĩkwa wabirisumba engebe yage erĩlũa omo buhya, Uwe Mwami Mukulu Nyamuhanga wage.

⁷ Omugulu omutima wage alembera omwisi wage, Monibuka Omwami Mukulu. Nʼerisaba lyage molyakũhĩkako, Omo Hekalũ yawe ĩbũyĩrĩre.

⁸ Abakayiketera ebite nʼomugaso, ebyʼamabehĩ Bakasĩganaya eritendiregula lyabo.

⁹ Nĩkwa nasyakuhongera omo mulenge wʼewasĩngya; Nasyatũha ekyo nalahĩraya Omulamo ni wʼOmwami Mukulu.

¹⁰ Neryo Omwami Mukulu mwabwira esamakĩ nene eyo, nayo moyasalira Yona oko kitaka kyũmĩre.