Yoelĩ 2 - AMASAKO ABOYTRTRE WA NYAMUHANGA AWAKAHULAWA MO BIBLIA

Eritswera lya Nyamuhanga

¹ Mubuhe engubi eSĩonĩ, mũbũgaye endulo omo kitwa kyage kĩbũyĩrĩre; esyondũlanĩ syosĩ syʼekihugo sititimane; kusangwa ekiro kyʼOmwami Mukulu kikasa, kusangwa kwenene kiri hakũhĩ.

² Ni kiro kyʼomwĩrĩmya, nʼekiro kyʼekĩlũlũmano, ekiro kyʼebĩtũ nʼomũhĩndanĩa, ngʼomwĩtsange owasanzĩre oko bitwa; neryo hali kihanda kinene nʼekyʼamaka; sihehatabya na kera ekĩsosĩrekyo, kutse sihendisyabya kandi enyũma wabo, erĩhĩka oko myaka yʼesyondengo nyingi.

³ Omuliro akahĩsaya embere syabo; nʼenyũma kubo ekirimi kyʼomuliro kĩkahĩsaya; ekihugo kiri ngʼeririma lyʼeEdenĩ embere syabo; nʼenyũma kubo embwarara yʼomulala; ega, sihali oyukalama kubo.

⁴ Erisosa lyabo nĩ kĩsosekanĩo kyʼesabayĩrĩ; kandi ngʼesyosabayĩrĩ syʼamalwa, ko bakatibita batya.

⁵ Bakatũa ebika ngʼolukanda lwʼesyogalĩ oko singi syʼebitwa, ngʼolukanda lwʼekirimi kyʼomuliro Owakalya esyombuba, ngʼabandu bʼamaka abategekanĩbawa omo malwa.

⁶ Embere syabo ebihanda bĩkasĩsĩkana; nʼamũsũ gosĩ akatũmba.

⁷ Bakatibita ngʼabandu bʼamaka; bakasamba oko lũhĩmbo ngʼabandu bʼamalwa; bakagenda obuli mundu omo nzira yiwe, kandi sĩbalĩtalĩnganaya.

⁸ Kandi sibalihatatana; bakalendera obuli mundu omo nzira yiwe; omugulu bakatwangana erĩkĩnda enzĩgũ, sibalikita omo nzira yabo.

⁹ Bakatibita oko mĩyĩ; bakatibita oko lũhĩmbo; bakasambira omo manyũmba; bakingira omo maseryo ngʼomũrahĩ.

¹⁰ Ekihugo kikatitimana embere syabo; nʼekyanya kikatitimana; eryuba nʼomukera bikahumbera, nʼesyongũnũnũ sĩkũmbaya okwʼĩkolerya lyasyo.

¹¹ Omwami Mukulu akatanda omulenge wuwe embere syʼemilondo yiwe; kusangwa enganda yiwe ni nene kutsibu; kusangwa oyũkaberereraya ekĩnywa kiwe akalĩre; kusangwa ekiro kyʼOmwami Mukulu ni kinene nʼekyʼerĩũbahya kutsibu; nindi yo wangatoka eriyisiga mukyo kwehĩ?

¹² Omwami Mukulu ati, Kutse na lino, munyibindukire nʼemitima yenyũ yosĩ, nʼeritsira akalyo, nʼeririra, nʼerĩsũsũmana.

¹³ Mũsatangaye emitima yenyũ, sĩmũsatangaye esyongimba syenyũ, mubindukire Omwami Mukulu Nyamuhanga wenyũ; kusangwa iye ni wʼeriganyira nʼowʼolukogo, isialihitana lũba, ĩnĩoswĩre omo bubuya bʼolwanzo, iniakayibindula siakole nabi.

¹⁴ Nindi wasĩ kwʼasyabinduka nʼerioloba, nʼerĩsĩga omũyĩsa enyũma wuwe, obuhere bwʼengano nʼobuhere bwʼerĩũtũlĩra ahisi oko Mwami Mukulu Nyamuhanga wenyũ kwehĩ?

¹⁵ Mubuhe engubi eSĩonĩ, muyisolole nʼeritsira kalyo, mubirikire erĩhĩndana lĩbũyĩrĩre;

¹⁶ mũhĩndanaye abandu, muhigule endeko, mũhĩndanaye abakulu, mũhĩndanaye abana, nʼabakonga amabere. Iba wʼomũherũkĩ ahuluke erĩlũa ekatĩ kuwe, nʼomũherũkĩ alũe omo kisenge kiwe.

¹⁷ Abahererĩ, abagombe bʼOmwami Mukulu, balirire omo katĩkatĩ kʼobũsekũ nʼekiherero, babũge bati, Uwe Mwami Mukulu, Uganyire abandu bawe, suhe abandu bawe oko batsũmĩ, Suleke ebihanda bikahulabo mo mitenyo. Busana nakĩ bangabũga omo katĩkatĩ kʼabandu bati, Nyamuhanga wabo ali hahi kwehĩ?

¹⁸ Neryo Omwami Mukulu asyakwa ekihugo kiwe kyʼobũha, kandi asyaganyira abandu buwe.

¹⁹ Neryo Omwami Mukulu asyasũbĩrya nʼeribwira abandu buwe ati, Lebaya, nasyabatumira engano, nʼebĩnyũ bihya-bihya, nʼamagũta, nenyũ mwasyũgũta mubyo; isindiendisyaswabayira kandi mo kĩtsũmĩ omo katĩkatĩ kʼebihanda.

²⁰ Nĩkwa nasyalũsya hali ũkwʼĩnywe emilondo yʼelutambi lwʼendata, nasyahigirayo omo kihugo kyʼolukwesese nʼekĩma, nasyahigira oluhande lwakyo lwʼerĩmbere omo ngetsi yʼendata, nʼoluhande lwakyo lwʼenyũma omo ngetsi yʼeyĩkwa; nʼerikumba lyakyo lyasyahetuka nʼoluta lwakyo lubi lwasyahetuka, kusangwa kyabirikola emyatsi minene.

²¹ Uwe kihugo, subahe, utseme utsange; kusangwa Omwami Mukulu abirikola emyatsi minene.

²² Ĩnywe, esyonyama syʼomolĩ, simubahe; kusangwa amalĩsĩryo gʼomo mbwarara akalasa, kusangwa omuti abĩrĩhetya ebĩgũma byago, omuti wʼomũtĩnĩ nʼomũlĩkĩ wʼebĩnyũ yabĩrĩhetya ebĩgũma byayo.

²³ Neryo ĩnywe bana bʼeSĩonĩ, mutseme, kandi mutsemere Omwami Mukulu Nyamuhanga wenyũ; kusangwa abiribaha embũla yʼerĩmbere erĩbasĩngya, abirireka embũla iyabawako, embũla yʼerĩmbere, nʼembũla yʼenyũma, nga kera.

²⁴ Nʼebibuga byasyũsũla mwʼengano, nʼebikamiro byasyatswaga mwʼebĩnyũ bihya-bihya nʼamagũta.

²⁵ Nage nasyabasũbũlĩrya emyaka eyo syongĩke syalya, engĩke eyikakuluka, nʼengĩke eyĩkabuga, nʼengĩke eyĩkatakũnya; omulondo wage munene ogo natuma omo katĩkatĩ kenyũ.

²⁶ Nenyũ mwasyabya nʼebingi byʼerirya nʼerĩũgũta, mwasyapipa erĩna lyʼOmwami Mukulu Nyamuhanga wenyũ, oyo wabirikola ebyʼeriswekera busana nenyũ; neryo abandu bage sibendisyahemulwa kera na kera.

²⁷ Nenyũ mwasyaminya ko ndi omo katĩkatĩ ka Ĩsraelĩ, ngoko nyiri Mwami Mukulu Nyamuhanga wenyũ, isihali gundi; nʼabandu bage sibendisyahemulwa kera na kera.

Erĩũtũlĩra lyʼOmũlĩmũ Abũyĩrĩre likalagawa

²⁸ Neryo enyũma wʼaho, nasyũtũlĩra Omũlĩmũ wage oko bandu bosĩ; abagala benyũ nʼabali benyũ basyaminyerera, nʼabasyakulu benyũ basyalota esyonzolĩ, nʼabalwana benyũ basyalola oko syonzolĩ.

²⁹ Nage nasyũtũlĩra Omũlĩmũ wage oko biro ebyo, oko bagombe bage bʼobulume nʼabʼobũkalĩ.

³⁰ Nasyakanganĩa ebyʼeriswekera omo kyanya nʼomo kihugo; omusasi, nʼomuliro, nʼerĩtũmba lyʼomũkĩ.

³¹ Eryuba lyasyabindulwa mo mwĩrĩmya, nʼomukera iniabya ngula ngʼomusasi, embere wʼerĩhĩka lyʼekiro kinene kyʼolukengerwa nʼekyʼerĩũbahya kyʼOmwami Mukulu.

³² Neryo obuli mundu oyukalakira erĩna lyʼOmwami Mukulu asyalamĩbwa; kusangwa omo kitwa kyʼeSĩonĩ nʼomo Yerũsalema mwasyabya bandu abakabala, ngoko Mwami Mukulu abĩrĩbũga, nʼomo katĩkatĩ kʼabandu abasĩgaliraho abo Mwami Mukulu akabirikira.