Yoelĩ 1 - AMASAKO ABOYTRTRE WA NYAMUHANGA AWAKAHULAWA MO BIBLIA

Ekihugo kikatsanda omo syongĩke

¹ Ekĩnywa kyʼOmwami Mukulu mokyahĩka uku Yoelĩ mugala wa Petũelĩ.

² Ĩnywe bakulu mowe ebĩ, kandi mutege amatwĩ, ĩnywe bosĩ esyondũlanĩ syʼekihugo. Omwatsi oyũ abĩrĩhĩka omo biro byenyũ, kutse omo biro byʼabotatakulu wenyũ kwehĩ?

³ Mũtũlĩrego abana benyũ, nʼabana benyũ batũlĩrego abana babo, nʼabana babo batũlĩrego oko lulengo lwʼaho nyũma kwʼaho.

⁴ Ebyo bũngũkũ bwasĩga, esyongĩke syabiriryabyo; nʼebyo syongĩke syasĩga byalĩrwe nʼakalũndya; nʼebyo akalũndya kakasĩga byalĩrwe nʼebinya-buyimbi.

⁵ Ĩnywe bakũndĩrya, mubuke, mũtogongaye emĩsonĩa; mũsũsũmane, ĩnywe bosĩ mũkapũlaya ebĩnyũ, busana nʼebĩnyũ bĩsĩhĩre; kusangwa byabĩrĩlũsĩbwa oko muno wenyũ.

⁶ Kusangwa ekihanda kyabĩrĩhĩka oko kihugo kyage, ekiwite amaka, isikiwite emiganzo; ameno wakyo ni meno wʼendale, kandi kiwite emisuhe yʼendale yʼobũkalĩ.

⁷ Kyabĩrĩhĩra emĩrĩkĩ yʼebĩnyũ yage mo mulala, nʼerikokola ebĩkũkũ byʼomuti wage wʼemĩtĩnĩ; kyabĩrĩsĩgago mo muhala-halira, nʼerigusago; emitahi yago yabiriyirwa mo nzeru.

⁸ Mũsũsũmane ngʼomumbesa oyo wambite emisarandwe busana nʼĩba wʼobwana-buto buwe.

⁹ Obuhere bwʼengano, nʼobuhere bwʼerĩũtũlĩra ahisi bwabĩrĩlũsĩbwa oko nyũmba yʼOmwami Mukulu; abahererĩ bakalira, abagombe bʼOmwami Mukulu bakalira.

¹⁰ Eririma lyabiriyirwa mo kĩma, ekihugo kikalira; kusangwa engano yabĩrĩherĩbwa, ebĩnyũ bihya-bihya byabiriuma, nʼamagũta abĩrĩkũba.

¹¹ Ĩnywe balĩmĩ bʼebĩnyũ mũkwe esĩsonĩ, ĩnywe bakolerĩ bʼemĩrĩkĩ yʼebĩnyũ, mũlĩhĩre busana nʼengano, na busana nʼekisusu; kusangwa obugese bwʼamalima bwabirihera.

¹² Omũlĩkĩ wʼebĩnyũ abiriuma, nʼomuti wʼomũtĩnĩ abĩrĩkũba; omuti wʼomukomamanga, nʼomuti wʼobubondo, nʼomuti wʼomutafala, nʼemiti yosĩ yʼomwʼirima ikuma; ega, obutseme bwabirihwa omo bagala bʼabandu.

¹³ Ĩnywe bahererĩ, mũyĩkũndĩke emisarandwe, mulire, mũlĩhĩre, ĩnywe abakolerĩ bʼekiherero; mwase, mugotsere omo kiro kyosĩ omo misarandwe, ĩnywe abakolerĩ ba Nyamuhanga wage: kusangwa obuhere bwʼengano nʼobuhere bwerĩũtũlĩra ahisi bwabĩrĩkakĩrĩbwa omo nyũmba ya Nyamuhanga wenyũ.

¹⁴ Muhigule eritsira akalyo, mubirikire erĩhĩndana lĩbũyĩrĩre, mũhĩndanaye abakulu nʼesyondũlanĩ syosĩ syʼekihugo omo nyũmba yʼOmwami Mukulu Nyamuhanga wenyũ, mulakire Omwami Mukulu.

¹⁵ Ĩloolo busana nʼekiro ekyo! Kusangwa ekiro kyʼOmwami Mukulu kiri hakũhĩ, kandi kyasyasa ngʼerĩherya lĩkalũa oko Wʼamaka gosĩ.

¹⁶ Akalyo sĩkamalũsĩbwa embere syʼameso wetu, ega, obutseme nʼeritsanga sibyetalũsĩbwa omo nyũmba ya Nyamuhanga wetu kwehĩ?

Ekihugo kikatsanda omo syongĩke

¹⁷ Esyombuto sikahondera omo kitaka kyasyo; nʼesyombĩso syabiribya mo kĩma, nʼebigona byamahĩmbũlwa; kusangwa engano yabiriuma.

¹⁸ Esyonyama sĩkasĩmba siti! Ebihangulo byʼesyonde bĩkahanga-hangaya, kusangwa sisiwite amalĩsĩryo; ega, ebĩhyo byʼesyombũlĩ byamagalwa.

¹⁹ Uwe Mwami Mukulu, ngakulakira; kusangwa omuliro abirirya amalĩsĩryo wʼembwarara, nʼekirimi kyʼomuliro kyabĩrĩhĩsya emiti yosĩ yʼomolĩ.

²⁰ Ega, esyonyama syʼomolĩ sikakuhumayirirako erikukandira; kusangwa esyonyũsĩ syʼamagetsi Syabiriuma, nʼomuliro abirirya amalĩsĩryo wʼembwarara.