Yobũ 9 - AMASAKO ABOYTRTRE WA NYAMUHANGA AWAKAHULAWA MO BIBLIA

Erĩsũbĩrya lya Yobũ eryʼakabiri

¹ Neryo Yobũ mwasũbĩrya mwabũga ati,

² Kwenene nyĩnasĩ ko bine bitya; Nĩkwa omundu anganatoka eribya oyutunganene embere sya Nyamuhanga kwehĩ?

³ Amasonda erikuba obuhaka naye, Siangatoka erĩmũsũbĩrya kiguma omo elfu

⁴ Ali nʼamenge omo mutima, nʼowʼobũtokĩ omo maka. Nindi oyo wabirimukalako akabana omũyĩsa kwehĩ?

⁵ Oyũkahũmaya ebitwa ĩsĩbyasĩ, Omugulu akabindulabyo omwʼihitana liwe;

⁶ Oyũkasũkanaya ekihugo erĩlũa omo mwanya wakyo, Nʼesyondũyĩ syakyo sikatitimana;

⁷ Oyukahana eryuba, sĩrĩkoleraye. Akalĩbanaya esyongũnũnũ;

⁸ Oyũ ĩyowene akasanza ekyanya, Inialyata oko bisunda byʼengetsi;

⁹ Oyo wahangika Edũbũ, Orĩonĩ, na Kĩlĩmĩa, Nʼesyongonde syʼeLutambi lwʼeYĩkwa;

¹⁰ Oyukakola emyatsi mikulu eyitesondeka, Ega, emyatsi yʼeriswekera eyiteganzika.

¹¹ Amanyilabako, sinangamulolako. Amanyitwanganako, sinangamuminya.

¹² Amapũra kindu, nindi wanganyĩkakĩrya kwehĩ? Nindi wangamũbũlya ati, Ukakolakĩ kwehĩ?

¹³ Nyamuhanga sĩendĩsyasũbũlya erihitana liwe; Abawatĩkya ba Rahabũ bakũnama eyĩkwa kwiye.

¹⁴ Nangamũsũbĩrya nyiti kwehĩ? Nʼeriyisoga ebĩnywa byage eriyihangalika ukwʼiye kwehĩ?

¹⁵ Nomo nangabya oyutunganene, sinangatoka erĩmũsũbĩrya; Nangalakira eriganyira lyʼomũtswerĩ wage.

¹⁶ Namabirikira, naye akanyĩsũbĩraya, Sĩnangĩkĩrĩrya kwʼakowa omulenge wage,

¹⁷ Kusangwa akanyĩbũna omo kihunga, Akakanyĩrĩraya erihutala lyage isihali ekikaleka.

¹⁸ Sialireka ngahumula, Nĩkwa akanyũsũlaya nʼobukalihe.

¹⁹ Twamahula amaka, lebaya, iye ni wʼamaka! Twamahula erĩbanza, nindi wasyambirikirako kwehĩ?

²⁰ Nomo nangabya mutunganene, Obuno bwage ĩbwanyĩbanĩsya olubanza; Nomo nangahĩkana, asyanyĩsĩnga ko ndi mubi.

²¹ Sindi ko lubanza; sinyiyitsomene; Ngapona engebe yage.

²² Ebyosĩ ebĩ ni kiguma; kikaleka ĩnabũga nyiti, Akaheraya abate ko lubanza nʼababi.

²³ Ekĩto kyamĩta lũba, Asyasekererya erĩkwa lyʼabate ko musango.

²⁴ Ekihugo kikahabawa omo byala byʼababi; Akaswika amũsũ wʼabatswerĩ bako. Kumbe si ye, nĩkwa nindi kwehĩ?

²⁵ Lino ebiro byage bikanguha kwilaba omukwenda; Bikatibita, sibyelangira ekibuya.

²⁶ Bikalaba ngʼamato awakanguha lũba. Ngʼerĩsamba erikatogera obuhiyi.

²⁷ Namabũga nyiti, ngandibirirwa amgalĩ wage, Ngandireka obũsũ bwage bʼobũlĩge, inatsanga;

²⁸ Ngubaha amalĩge wage gosĩ, Nyĩnasĩ, siwendisyanyiganza butsira lubanza.

²⁹ Nasyaganzwa mo mubi; Busana nakĩ ngaluhira busa kwehĩ?

³⁰ Namayikosa omo wʼenzururu Nʼerĩnabya ebyala byage omo sabũnĩ;

³¹ Nĩkwa wasyanyigusa omo buhya, Nʼesyongimba syage ĩsyanyĩkwa esyonye.

³² Kusangwa iye si mundu, ngoko nyiri, Nyiti nangamũsũbĩrya itwaya omwʼĩbũgĩro haguma.

³³ Sihali mũhamũlĩ omo katĩkatĩ ketu, Oyo wangahĩra ebyala biwe ũkwʼĩtwe babiri.

³⁴ Anyĩlũsaye kʼomwĩgo wuwe, Nʼolubahwa luwe sĩlũnyũbahaye.

³⁵ Neryo nangabũga, nʼeritindamubaha; Nĩkwa ũmwʼĩngye Sindi nyitya.