Yobũ 39 - AMASAKO ABOYTRTRE WA NYAMUHANGA AWAKAHULAWA MO BIBLIA

Ebyʼeriswekera byʼesyonyama erĩkangya Obũtokĩ bwa Nyamuhanga

¹ Ũnasĩ omugulu wʼeributa lyʼesyombene syʼomolĩ kwehĩ? Kutse wabirilangira engabi omugulu ikabuta kwehĩ?

² Wanganatoka eriganza emikera yʼerihaka lyasyo kwehĩ? Kutse ũnasĩ omugulu sikabutirako kwehĩ?

³ Sĩkayũnamaya isyabuta ehyana hyasyo, Sikabuga eributa lyasyo.

⁴ Ehyana hyasyo hikabana maka, ihyusukira omolĩ; Hĩkayĩgenderaya ihitasyasubula.

⁵ Nindi yo waha esyopunda syʼomolĩ obwĩranda bwasyo kwehĩ? Kutse nindi abĩrĩkũndũla emĩrĩkĩ yʼepunda iyalendera kwehĩ?

⁶ Monahasyo embwarara eribya enyũmba yasyo, Nʼekitaka kyʼomũnyũ omo mwanya wasyo wʼerĩĩkala.

⁷ Sikapona olukanda lwʼemĩyĩ, Kandi sĩsĩrĩowa olukanda lwʼoyukahasyo omũbĩrĩ.

⁸ Ebitwa nĩ lũlĩsĩryo lwasyo aho sikalira, Ĩsĩkasondaya ebiti bibisi byosĩ.

⁹ Enganda yanganalĩga erikukolera kwe­hĩ? Kutse yasyĩkala hakũhĩ nʼebibungo byawe kwehĩ?

¹⁰ Wanganatoka eriboha enganda omo mũlĩkĩ omo mahya wʼeririma kwehĩ? Kutse yasyakunguta emisya yʼenyũma kuwe kwehĩ?

¹¹ Wasyayiketerayo kusangwa amaka wayo ni manene kwehĩ? Kutse wasyasĩgĩrayo omũbĩrĩ wawe kwehĩ?

¹² Wasyayiketerayo, uti yasyakũkũlũkĩrya embuto yawe kwehĩ? Nʼerikumira engano yʼomwʼĩhũmbĩro lyawe kwehĩ?

¹³ Ebĩpũpa byʼembũnĩ bĩkapũpa-pũpa nʼobutseme; Nĩkwa nĩ bĩpũpa nʼebyeya byʼolwanzo ngʼebyʼekĩrobĩ kwehĩ?

¹⁴ Embũnĩ ĩkasĩga amayi wayo gʼoko kitaka, Nʼerĩhũhyago omo lũtũtũ.

¹⁵ Iyibirirwa ngoko ekisando kyangatulangago. Kutse enyama yʼomolĩ ko yangalyatangirirago.

¹⁶ Ĩkagũmangĩraya ehyana hyayo nga si hyayo. Nomo mĩbĩrĩ yayo iri buyira, siyitsomene;

¹⁷ Kusangwa Nyamuhanga abirireka embũnĩ butsira menge, Kandi mwatahayo eriminya.

¹⁸ Omugulu ĩkayĩgũlũkĩraya endata eritibita, Ikaseka esabayĩrĩ nʼoyo wĩkere kuyo.

¹⁹ Ni we Yobũ oyo wabiriha esabayĩrĩ yʼamaka wayo kwehĩ? Wabĩrĩambalya ebĩkya byayo byʼomutsimbi kwehĩ?

²⁰ Wabirihayo erĩtwa ekika ngʼengĩke kwehĩ? Obunene bwʼerifureta bwayo bũkĩta buba.

²¹ Ĩkayĩkũrũtsaya omo musya, iyatsemera amaka wayo. Ĩkayahĩndana nʼebindu byʼamalwa.

²² Ikaseka obuba, sĩrĩhũka-hũkaya omutima, Kutse sĩrĩyĩsũbaya enyũma busana nʼomũyalĩ.

²³ Olubo lũkabũgaya olukanda, Nʼerĩtũmo erĩkakangabasanaya nʼakatũmo kake.

²⁴ Ikatibita oko kitaka omo bukali nʼerititimana; Omugulu engubi ĩkabũga siritoka erihangana.

²⁵ Emigulu yosĩ engubi ĩkabũga iti, Hayi! Ikakumbirawa amalwa go hali, Sĩkowa abakulu bʼemilondo, bakabirikira malwa.

²⁶ Ni busana nʼamenge wawe akasara kakaguluka, Nʼerilambya ebĩpũpa byako erĩlolya eLutambi lwʼEyĩkwa kwehĩ?

²⁷ Erĩsamba likahetukira endata busana nʼerihana lyawe, Nʼerĩhĩmba Olutu lwalyo lwʼendata kwehĩ?

²⁸ Lĩkere oko lukuka nʼerigotserayo, Oko mutwe-mutwe wʼOlukuka, ahakalĩre erĩhĩka.

²⁹ Eyo likalingira akalyo; Ameso walyo akalangirirako hali.

³⁰ Ehyana hyalyo hikanyunya omusasi. Kandi ahali ebĩkwĩre, aho liri.