Yobũ 37 - AMASAKO ABOYTRTRE WA NYAMUHANGA AWAKAHULAWA MO BIBLIA

Endũlĩ yʼebĩnywa bya Elĩhũ

¹ Ega, omutima wage akatitimana busana nʼomwatsi oyũ, Akalũa omo nda.

² Muhulikirire, ĩnywe bosĩ, oko mulenge wa Nyamuhanga, Nʼoko mũlũmo owakahuluka omo buno buwe.

³ Akatuma erĩpalya omo kyanya kyosĩ, Oko ndũlĩ syosĩ syʼekihugo.

⁴ Enyũma walyo omulenge wuwe akaruruma; Akaruruma nʼomulenge wʼobukulu buwe; Nʼoko mugulu oyo erĩpalya lĩkahenaya.

⁵ Nyamuhanga akaruruma nʼerĩswekya omo mulenge wuwe; Akakola emyatsi mikulu mikulu, eyo tutetwangaminya.

⁶ Kusangwa akabwira enzururu ati, Togera ahisi oko kitaka, Kandi akabwira embũla, Iyawa kutsibu.

⁷ Akahanganaya omũbĩrĩ wʼabandu, Abandu bosĩ baminye omũbĩrĩ wuwe.

⁸ Oko mugulu oyo, esyonyama sikasesera aho sĩkabĩsama, Neryo ĩsyĩkala omo myangalũ yasyo,

⁹ Omo lutambi lwʼeyĩkwa mũkalũa ekiyaga, Nʼeritsuku lĩkalũa omo Lutambi lwʼEndata.

¹⁰ Busana nʼomuka wa Nyamuhanga akakamataya amagetsi, Nʼamagetsi ayĩsanzĩre akamatana.

¹¹ Akahekaya ebĩtũ ebĩbĩmbĩre mwʼamagetsi, Akapanza-panza ekĩtũ kyʼerĩpalya liwe.

¹² Nakyo kikabindingulawa omwʼisondola liwe, Ibyaminya erikola ebyosĩ akahanabyo omo kihugo kyosĩ.

¹³ Nyamuhanga akatuma embũla eriwa oko kitaka: Anganatumayo busana nʼerisuyira abandu, Kutse eriganyirabo.

¹⁴ Uwe Yobũ uhulikirire ekĩ; Hangana ũganĩraye emĩbĩrĩ yʼeriswekera ya Nyamuhanga.

¹⁵ Ũnasĩ ngoko Nyamuhanga akahana Nʼerireka erĩpalya lyʼekĩtũ kiwe ĩryakangabasanĩa kwehĩ?

¹⁶ Ũnasĩ ngoko ebĩtũ bikaguluka omo kyanya. Emĩbĩrĩ yʼeriswekera yʼamenge wa Nyamuhanga kwehĩ?

¹⁷ Eyihi, ukagalawa omo kĩhũhanĩ kĩkalĩre, Omugulu ekihugo kĩyĩbombekĩre busana nʼerihunga lyʼeLutambi lwʼEyĩkwa.

¹⁸ Wanganatoka erisanza ekyanya haguma naye kwehĩ? Ekĩkalĩre ngʼekyuma kwehĩ?

¹⁹ Ũtũkangĩrĩraye ekyo twangabwira Nyamuhanga nga ni kyahi Kusangwa Sitwangatoka eritondekabyo situwite ekyʼerĩbũga.

²⁰ Sĩndĩendĩbũlya Nyamuhanga nyiti ngasonda erĩbũga. Nangamuha omwanya wʼerĩnyĩta kwehĩ?

²¹ Na lino abandu sibelangira ekyakakala ekĩkakangabasanaya omo kyanya, Nĩkwa erihunga likalaba nʼerĩbĩrya ekyanya.

²² Erĩkangabasanĩa lĩkalũa eLutambi lwʼEndata, Nʼolukengerwa lwa Nyamuhanga lukatuha olubahwa.

²³ Obũtokĩ bwa Nyamuhanga ni bunene, Sitwangatoka erimusegerako; Atunganene, kandi nĩ wʼerĩbanza oko bandu.

²⁴ Kikaleka abandu ibamubaha. Sialisamalira bandu abawite amenge wʼomutima.