Yobũ 34 - AMASAKO ABOYTRTRE WA NYAMUHANGA AWAKAHULAWA MO BIBLIA

Elĩhũ akakunga Yobũ engendo yʼakabiri

¹ Kandi Elĩhũ mwasũbĩrya mwabũga ati,

² Muhulikirire ebĩnywa byage, ĩnywe bandu bʼamenge; Ĩnywe muwite eriminywa, munyitegere amatwĩ,

³ Kusangwa okũtũ kukalenga ebĩnywa, Ngoko lulimi lũkageraya akalyo.

⁴ Ekitunganene kyo tuyisoge. Tuminye omo katĩkatĩ ketu ekibuya.

⁵ Kusangwa Yobũ abĩrĩbũga ati, Ĩngye indi mutunganene, Nĩkwa Nyamuhanga abĩrĩlũsya ehamũlĩ yage.

⁶ Nangabiha busana nʼehamũlĩ yage kwehĩ? Ekironda sikyetoka erĩlamĩbwa, nomo ndane nʼerĩlolo.

⁷ Omundu oyuli nga Yobũ nindi kwehĩ? Oyũkapũlaya erĩsekererya ngʼamagetsi,

⁸ Oyukasiba haguma nʼendeko yʼabandu abakakola amalolo, Nʼerirendera nʼabandu babi.

⁹ Kusangwa abĩrĩbũga ati, Sikyegasira mundu yokĩ, Omugulu akayĩtsemesaya na Nyamuhanga.

¹⁰ Busana nʼekyo ĩnywe balume bʼamenge munyihulikirire. Kibye hali uku Nyamuhanga erikola ebibi, Nʼoko Mũtokĩ Wʼebyosĩ erĩhalya.

¹¹ Kusangwa akaliha omundu ngʼemĩbĩrĩ yiwe, Nʼerikolera omundu ngoko linamutolere.

¹² Kwenene, Nyamuhanga siendisyakola nabi, Kandi Omũtokĩ Wʼebyosĩ sĩendĩsyahengemya erĩbanza.

¹³ Nindi wamuha ehamũlĩ oko kihugo kwehĩ? Kutse nindi wahĩra ekihugo kyosĩ omo hamũlĩ yiwe kwehĩ?

¹⁴ Nyamuhanga amaswĩmya omuka wʼengebe,

¹⁵ Neryo abandu bosĩ ibahola, Nʼerisuba kandi omo lũtũtũ.

¹⁶ Wamabya uwite eriminya, Unyihulikirire.

¹⁷ Oyũkakwa erĩbanza lyʼobusu asyatabala kwehĩ? Nawe wasyatswera nabi oyutunganene nʼowʼamaka kwehĩ?

¹⁸ Nyamuhanga akasĩnga abami nʼabatabalĩ Omugulu bali buyira kutse babi.

¹⁹ Nyamuhanga sialisombola abanya-mwami, Kutse sialianza abʼebindu kwilaba abera; Kusangwa abosĩ nĩ mũbĩrĩ wʼebyala biwe.

²⁰ Bakahola omo katambĩ kake, omo katĩ-kanene, Abandu bakasũkana ibahwaho, Nʼabandu bʼamaka bakalũsĩbawaho batya.

²¹ Kusangwa ameso wuwe ali oko syonzira syʼomundu, Akalangira eribasula liwe lyosĩ.

²² Sihali omwĩrĩmya, kutse ekyũtsũtsũ. Aho abakola-nabi bangayĩbĩsa.

²³ Kusangwa Nyamuhanga siali nʼobwaga bwʼeriahula omugulu, Busana nʼabandu eriyatswerwa na Nyamuhanga.

²⁴ Akatulanga esyombangĩ mo bihande bihande butsira erĩbũlya, Akahĩra abandi omo myanya yabo.

²⁵ Busana nʼekyo anasĩ emĩbĩrĩ yabo; Naye akakĩndabo omo kiro ĩbaherĩbwa.

²⁶ Akasuyira abandu babi Omo meso wʼabandu bosĩ,

²⁷ Kusangwa bakakitira emũsĩke ibatasyamukwama, Kandi mobapona amahano wuwe gosĩ.

²⁸ Neryo mobaleka ekiriro kyʼabera ĩkyamũhĩkako, Naye mowa ekiriro kyʼabandu abakagalawa.

²⁹ Omugulu Nyamuhanga akabya bũkũtũ, nindi wangamutswera kwehĩ? Nʼomugulu akabĩsa obũsũ buwe, abandu bangabya buyira.

³⁰ Sihangabya mwatsi ebihanda byangakola, Erĩkakĩrya abakanũbayabo eritabalirabo.

³¹ Kusangwa ko hane oyo wabwira Nyamuhanga ati, Nabĩrĩowa erisuyira sindiendisyasubira kwehĩ?

³² Wabĩrĩbũlya Nyamuhanga erĩkũkangya erihaba lyawe kwehĩ? Wabĩrĩrĩga erireka erikola ebibi, kwehĩ?

³³ Kusangwa ukagana ekyo Nyamuhanga akakola, Nawe uti akole ekyo wanzĩre kwehĩ? Kusangwa litolere iwayisoga, butsira ngye. Neryo ũbũge ekyo wasĩ.

³⁴ Abalume bʼeriminya basyambwira, Nʼomundu wʼamenge oyũkanyowa asyambwira ati,

³⁵ Yobũ akabũga butsira eriminya, Nʼebĩnywa biwe Sibiri na menge.

³⁶ Kumbe Yobũ angalengwako erĩhĩka oko ndũlĩ, Kusangwa akasũbĩraya ngʼabandu babi.

³⁷ Kusangwa akatomeka epono oko bibi biwe; Akasekereraya nʼeritsuma Nyamuhanga embere syetu.