Yobũ 32 - AMASAKO ABOYTRTRE WA NYAMUHANGA AWAKAHULAWA MO BIBLIA

Erihitana lya Elĩhũ busana na Yobũ nʼabĩra buwe basatu

¹ Neryo abalume basatu aba mobũmbya erĩsũbĩrya Yobũ, kusangwa abya iniatunganene omo meso wuwe.

² Nĩkwa erihitana lya Elĩhũ mugala wa Barakelĩ Omũbũzi wʼekĩtũnga kya Ramũ, molyaka uku Yobũ, nʼerihitana eryo molyaka kusangwa ayĩtũngananaya ĩyowene embere sya Nyamuhanga.

³ Nibya nʼoko bĩra ba Yobũ abasatu erihitana liwe molyakala, kusangwa mobatabana erĩsũbĩrya nĩkwa ibamabitswera Yobũ yo nabi,

⁴ nĩkwa Elĩhũ mwalinda erĩkanĩa na Yobũ, kusangwa babya bakulu kwiye.

⁵ Nʼomugulu Elĩhũ alangira ko hate erĩsũbĩrya omo buno bwʼabalume basatu aba, erihitana liwe molyaka.

⁶ Neryo Elĩhũ mugala wa Barakelĩ Omũbũzĩ mwasũbĩrya ati, Ĩngye indi mulere, nenyũ muli bakulu; Kyaleka mubaha, erĩbakangya obũlengekanĩa bwage.

⁷ Monabũga nyiti, Ĩnywe bakulu mwangabũga, Ĩnywe balume bakulu mwangakangĩrĩrya amenge oko bandi.

⁸ Nĩkwa nĩ kĩrĩmũ kya Nyamuhanga, Omũtokĩ Wʼebyosĩ, Kĩkahĩka oko mundu nʼerimuha eriminya.

⁹ Si rye ʼribya mukulu likayira bandu mo bʼamenge, Kutse erĩwatĩkyabo eriminya erĩbanza.

¹⁰ Busana nʼekyo ngabũga nyiti, Munyihulikirire; Nage nibya ngandĩbũga obũlengekanĩa bwage.

¹¹ Lebaya, monalindirira ebĩnywa byenyũ, Monahulikirira busana nʼerĩkanĩa lyenyũ, Omugulu mwasondaya ebyʼerĩbũga.

¹² Ega, monabahulikirira ndeke, Neryo, lebaya, sihali oyo wasĩnga Yobũ, Kutse omo katĩkatĩ kenyũ oyo wasũbĩraya ebĩnywa biwe.

¹³ Mũkasyabũga muti, Twabiribana menge; Nyamuhanga angamũsĩnga butsira bandu.

¹⁴ Kusangwa sĩalĩtategekanĩa ebĩnywa busana nage; Kutse sĩndĩendĩsyamũsũbĩrya omo bĩnywa byenyũ.

¹⁵ Bakasweka, sĩbesũbĩraya kandi. Babiribula ebĩnywa.

¹⁶ Nage nasyalinda kwehĩ kusangwa sibebuga, Kusangwa bakahangana bũkũtũ, ĩsĩbesũbĩraya kandi.

¹⁷ Nage nibya nasyasũbĩrya ebyage, Nage nibya nasyakangya obũlengekanĩa bwage.

¹⁸ Kusangwa nyoswĩre nʼebĩnywa; Ekĩrĩmũ ekiri omwisi wage kĩkanyĩkũna.

¹⁹ Lebaya, enda yage iri ngʼebĩnyũ ebite byakũnũngũlwa; Ngʼebihu byʼebĩnyũ bihya-bihya ebikasonda eritulika.

²⁰ Muleke nyĩbũge, inaminya erĩtũlera; Muleke nyĩkũmbũle emĩnywa yage nʼerĩsũbĩrya.

²¹ Simuleke ngasombola mundu; Kutse erĩhamya mundu.

²² Kusangwa Sĩnyasĩ erĩhamya; Omũhangĩkĩ wage akasyanyĩlũsyaho lũba.