Yobũ 31 - AMASAKO ABOYTRTRE WA NYAMUHANGA AWAKAHULAWA MO BIBLIA

Yobũ akahatikana eritunganene riwe

¹ Monayira endagano nyiti, Sinangatoka erisamalira omumbesa omo ngumbu nyibi.

² Kusangwa Nyamuhanga akatukolakĩ kwehĩ? Omũtokĩ Wʼebyosĩ akaliha emĩbĩrĩ yʼabandu ati kwehĩ?

³ Akatuma erĩkwa nʼerihera oko bandu abakakola ebibi.

⁴ Sialilangira esyonzira syage kwehĩ? Nʼeriganza eribasula lyage lyosĩ kwehĩ?

⁵ Namabya ngalendera omo mabehĩ, Nʼekisando kyage kyabirianguhira eriteba,

⁶ Anyilenge oko kĩlo kiringirirene, Nyamuhanga aminye eritunganene ryage;

⁷ Eribasula lyage lyamabya lyabirikita oko nzira. Nʼomutima wage akwamĩre ameso wage, Kandi akatĩngũ nʼakaguma kʼebibi kamamatira oko byala byage;

⁸ Neryo nyibibe, nʼogundi alyebyo; Ega, emyaka yʼeririma lyage ikulawe.

⁹ Omutima wage amabya abĩrĩohĩbwa nʼomũkalĩ, Inabiririndirira omo lũkyo lwa mũlĩkyetu;

¹⁰ Neryo omũkalĩ wage aswere ogundi, Nʼabandi bakũkame embere siwe.

¹¹ Kusangwa ekyo kyangabya ĩlolo litsibu; Ega, lyangabya ĩlolo likasuyirawa nʼabatswerĩ.

¹² Kusangwa ni muliro owakahĩsaya erĩhĩka okwʼihera, Erĩherya ebindu byage byosĩ.

¹³ Namabya namapona omwatsi wʼomugombe wage wʼobulume kutse wʼobũkalĩ, Omugulu bakuba obuhaka nage,

¹⁴ Nasyayira nyiti omugulu Nyamuhanga akahangana kwehĩ? Nʼomugulu akanyitswera, nasyamũsũbĩryakĩ kwehĩ?

¹⁵ Nyamuhanga oyo wanyihangika, Mwahangika abagombe bage nibya.

¹⁶ Namabya nabĩrĩkakĩrya abera Ukwʼekyo bakasonda, Kutse erireka ameso wʼomũkwakalĩ erĩhũma,

¹⁷ Kutse nabirirya akatole kage ĩngyowene, Nʼengũbĩ iyitalya kuko.

¹⁸ Ebiro byosĩ nabirilemberabo, Ngʼĩse kwʼakalembera abandu buwe;

¹⁹ Omugulu nalangira omundu wʼobwaga Ini mwera isiawite esyʼerigula olukimba,

²⁰ Nangamuha esyongimba syʼobweya bwʼembũlĩ yʼekihangulo kyage, Naye inianyipipa omo mutima wuwe.

²¹ Namabya nabiriteba engũbĩ, Kusangwa nabirilangira ngoko nangamũsĩnga omwʼĩbũgĩro.

²² Neryo amaboko wage abũnawe omwʼĩkũha, Alũsĩbawe omo bitigo byage.

²³ Kusangwa ngubaha erisuyira lya Nya­muhanga, Na busana nʼobukulu buwe sinditoka erikola kindu.

²⁴ Sinditayiketera esyamagetsi, na kera.

²⁵ Kandi sinditayiheka busana nʼebindu byage binene,

²⁶ Sĩndĩtaramya eryuba omugulu lyabĩrĩkolerya, Kutse omukera omwʼikanga lyago,

²⁷ Omutima wage sialitalengwako erikola ebyo.

²⁸ Ebĩ nibya byangabere malolo wʼerisuyirwa omo luholo; Kusangwa ebyo bikagana Nyamuhanga oyuli endata.

²⁹ Sinditatsemera esyonzĩgũ syage omugulu sĩkakwa, Kutse eritsema omugulu ebibi bĩkamwĩta;

³⁰ Sinditakola ebibi erisabira oluholo lwabo.

³¹ Abandu bosĩ abakanyikolera banasĩ, Ngoko ngakokaya abʼehandi.

³² Nabĩrĩkokya ababunga omo nyũmba yage, Sialitagotsera omo nzira;

³³ Nabiriswika ebibi byage nga Adamu kwehĩ? Nʼerĩbĩsa ebibi byage omo kĩkũba kyage kwehĩ?

³⁴ Sinditubaha ebyo endeko nene ĩkabũga, Sinditahuna, kutse erĩĩkala omo nyũmba, Busana nʼeriseka lyabo.

³⁵ Kumbe ngwite omundu wʼerĩnyowa! Lebaya, hano hali ekiminyikalo kyage, Omũtokĩ Wʼebyosĩ anyĩsũbĩraye! Kandi kumbe ngwite erihandikirira lyʼenzĩgũ yage!

³⁶ Kwenene nangahekĩrekyo oko kitigo kyage; Inayisengerakyo ngʼakakĩra.

³⁷ Nangabwĩre Nyamuhanga ebyosĩ nabirikola, Ĩnamũhĩkako hakũhĩ ngʼomunya-mwami.

³⁸ Kumbe nabĩrĩba ekitaka kyage ekyo ngalima, Nʼerinyegakyo oko benyekyo;

³⁹ Kumbe nabirirya ebĩgũma byakyo butsira eririha, Kutse erireka abalimakyo bakahola nʼenzala.

⁴⁰ Emisakisaki ilase omo mwanya wʼengano, Nʼebiti omo mwanya wʼekisusu. Ebĩnywa bya Yobũ byamatwĩrya aho.