Yobũ 27 - AMASAKO ABOYTRTRE WA NYAMUHANGA AWAKAHULAWA MO BIBLIA

Erĩsũbĩrya lyʼendũlĩ lya Yobũ

¹ Neryo Yobũ mwagusa kandi omũsyo wuwe, mwabũga ati,

² Ngoko Nyamuhanga aliho, oyo wandũsaya kwʼehamũlĩ yage, NʼOmũtokĩ Wʼebyosĩ, oyo wabĩrĩkalĩhya ekĩrĩmũ kyage,

³ Kusangwa omugulu engebe yage ikineho omwisi wage, Nʼomuka wa Nyamuhanga akine omo nĩndo yage;

⁴ Kwenene emĩnywa yage sĩyendĩsyabũga ekitatunganene, Kutse olulimi lwage sĩlwendĩsyabũga amatebo.

⁵ Kibye hali kwĩngye erĩbũga nyiti mwamasĩngana. Erĩhĩka okwʼihola lyage sindiendisyagana eritunganene lyage.

⁶ Ngahamba ndeke eritunganene lyage, sindiendisyalwĩkalyo. Obunya-mutima bwage sibuli nʼomwatsi.

⁷ Enzĩgũ yage ibye ngʼababi, Kandi enzĩgũ yage ibye ngʼoyutatunganene.

⁸ Kusangwa amaha wʼoyute na Nyamu­hanga, Ni wahi omugulu akakwa kwehĩ? Omugulu Nyamuhanga akabirikira engebe yiwe kwehĩ?

⁹ Ko Nyamuhanga asyowa ekiriro kiwe kwehĩ? Omugulu obũlĩge bwasyamũhĩkako kwehĩ?

¹⁰ Asyayĩtsemesya omwisi wʼOmũtokĩ Wʼebyosĩ kwehĩ? Nʼeribirikira Nyamuhanga emigulu yosĩ kwehĩ?

¹¹ Ngandĩbakangĩrĩrya omo maka wa Nyamuhanga; Sĩndĩendĩbĩsa ebiri haguma nʼOmũtokĩ Wʼebyosĩ.

¹² Lebaya, ĩnywe bosĩ mwabiriyilangirirakyo; Neryo busana nakĩ mukakola obũkĩrũ kwehĩ?

¹³ Erĩ nĩʼgabo lyʼomundu mubi uku Nyamuhanga, Nʼomwandu wʼabanũbya ogo basyangirira oko Mũtokĩ Wʼebyosĩ.

¹⁴ Nomo abana buwe bangakanya, ni bu­sana nʼomũyalĩ; Nʼabitsikulu buwe sĩbendĩsyũgũta akalyo.

¹⁵ Abasyamusakako basyatabwa busana nʼendwala yʼakasũsũ, Nʼabakwakalĩ babo sibendisyatoka eririra.

¹⁶ Nomo angahĩndanĩa ebĩtsĩpa ngʼolũtũtũ, Nʼerĩkokotya esyongimba ngʼeribumba;

¹⁷ Anganakokotyabyo, nĩkwa abatunganene basyambalabyo, Nʼabate ko musango basyagaba ebĩtsĩpa.

¹⁸ Akahĩmba enyũmba yiwe ngʼakakoro-kombe, Ngʼakatalikirire ako mũteya akahĩmba.

¹⁹ Akagotsera ini wʼebindu, nĩkwa byasyabuliraho; Akalĩbũla ameso wuwe, neryo isiali.

²⁰ Erĩũbahya likamutanga ngʼerigunga lyʼamagetsi; Ekihunga kĩkamwĩba omo kiro.

²¹ Erihunga lyʼendata likamutwala, neryo iniabirigenda, Lĩkamũlenga-lengya erĩlũa omo mwanya wuwe.

²² Kusangwa likabuhirirabo, butaganyira. Asyalenga eritibita erĩlũa omo maka walyo.

²³ Abandu basyamukangatira ebyala, Basyamũsolya erĩlũa aho wuwe.