Yobũ 21 - AMASAKO ABOYTRTRE WA NYAMUHANGA AWAKAHULAWA MO BIBLIA

Erĩsũbĩrya lyʼendatu lya Yobũ

¹ Neryo Yobũ mwasũbĩrya mwabũga ati;

² Uhulikirire ndeke erĩbũga lyage; Nʼekĩ kibye erĩsĩbĩkya lyenyũ.

³ Munyireke, nage nibya ngandĩbũga; Neryo namabĩbũga, mwasyasekererya.

⁴ Nĩkwa ĩngye, erilaka lyage liri oko bandu kwehĩ? Nyinawite ekikaleka inayibombeka.

⁵ Mũnyĩrebaye, musweke, Mũhĩre ebyala byenyũ oko buno bwenyũ.

⁶ Kutse omugulu ngibuka ngasweka, Nʼobuba bunene bukahamba omubiri wage.

⁷ Busana nakĩ ababi bakinabyaho, Ibakinakola, ega, ibakanya omo maka kwehĩ?

⁸ Abana babo bakasyĩkala haguma nabo omo meso wabo, Nʼabitsikulu babo embere syʼameso wabo.

⁹ Amanyũmba wabo ali nʼobuholo butsira buba, Kutse omũtso wa Nyamuhanga siali kubo.

¹⁰ Enume yʼende yabo ĩkahakĩsaya ndeke; Ende yabo yʼobũkalĩ ikabuta, sĩrĩkũsaya.

¹¹ Bakatuma abana babo ngʼekĩhyo, Nʼabana babo bakasata.

¹² Bakimba omo masengo nʼenanga, Bakatsemera omulenge wʼerĩrenga.

¹³ Bakabuyira ebiro byabo omo mũyĩsa, Omo katambĩ kake bakandagalira eKũlĩmũ.

¹⁴ Bakabwira Nyamuhanga bati, ũtũlũeko; Kusangwa sĩtwanzĩre amenge wʼenzira yawe.

¹⁵ Omũtokĩ Wʼebyosĩ nindi, uti twanga­mukolera kwehĩ? Twasyabana endũndĩ yahi twamamusaba kwehĩ?

¹⁶ Lebaya, omũyĩsa siali omo byala byabo. Erihana liri hali kwĩngye.

¹⁷ Engendo singahi etala yʼababi yĩkalĩmĩbawa kwehĩ? Nʼerĩkwa lyabo lĩkahĩka kubo kwehĩ? Na Nyamuhanga akagabirabo erihera omwʼihitana liwe kwehĩ?

¹⁸ Ibali ngʼesyombuba embere wʼerihu­nga, Kandi ngʼomusunga owakahekawa nʼekihunga kwehĩ?

¹⁹ Mũkabũga muti, Nyamuhanga akabĩka obubi bwʼomundu busana nʼabana buwe. Nyamuhanga amũkĩsaye, atoke eriminya.

²⁰ Ameso wuwe ĩgowene asamalire erihe­ra liwe, Apũlaye erihitana lyʼOmũtokĩ Wʼebyosĩ.

²¹ Kusangwa akatsomanakĩ busana nʼe­nyũmba yiwe enyũma kwehĩ? Omugulu eriganza lyʼemikera yiwe lyamabĩtũbwa.

²² Ko hali oyo wangatoka erĩkangĩrĩrya Nyamuhanga amenge kwehĩ? Kusangwa ni ye yukatswera abali endata.

²³ Omuguma akahola omo maka wuwe gosĩ, Iniali nʼobuholo ndeke nʼeriyibombeka.

²⁴ Omubiri wuwe anenehĩre ndeke, Nʼomungoso wʼamakũha wuwe ahehere.

²⁵ Nʼogundi akahola omo bũlũmĩ bwʼomutima, Ĩsĩalĩgeraya ebibuya na kera.

²⁶ Abosĩ bakagotsera ahisi omo lũtũtũ lulinga luguma, Nʼemihuka ĩkakũnĩngĩrabo.

²⁷ Lebaya, nyĩnasĩ amalengekanĩa wenyũ, Nʼenzira eyo mukasonda erinyikolamo nabi.

²⁸ Kusangwa mũkabũga muti, Enyũmba yʼomukulu iri hahi kwehĩ? Nʼehema iri hahi yʼaho ababi bĩkere kwehĩ?

²⁹ Sĩmwetabũlya abagendĩ kwehĩ? Kandi sĩmwasĩ erĩtũlago lyabo kwehĩ?

³⁰ Ngoko mundu mubi akabikawa busana nʼekiro kyʼerĩkwa; Ngoko bakasondolĩbawa oko kiro kyʼerihitana.

³¹ Nindi wasyatũla embĩta yiwe oko bũsũ buwe kwehĩ? Nindi wasyamuliha ekyo abirikola kwehĩ?

³² Nĩkwa omugulu asyahekerwa okwʼisinda, Nʼabandu basyateya eyisinda yiwe.

³³ Omutaka wʼomo musya asyamũkũnĩngĩra, Nʼabandu bosĩ basyamukwama, Ngoko habya bangi abateganzika abagenda embere siwe.

³⁴ Neryo mũkanyĩsĩbĩkaya buyira. Kusangwa omwʼĩsũbĩrya lyenyũ hali amabehĩ masa.