Yobũ 20 - AMASAKO ABOYTRTRE WA NYAMUHANGA AWAKAHULAWA MO BIBLIA

Erĩsũbĩrya lyʼakabiri lya Zofarĩ

¹ Neryo Zofarĩ Omũnamatĩ mwasũbĩrya mwabũga ati,

² Neryo amalengekanĩa wage akamba erĩsũbĩrya, Busana nʼerisweka eriri omwisi wage.

³ Nabĩrĩowa erikunga erikanyitsuma; Nʼekĩrĩmũ kyʼeriminya lyage kikaleka ĩnasũbĩrya.

⁴ Sĩwasĩ ekĩ kyʼomugulu wa kera kwehĩ? Erĩtsũka omugulu abandu bahĩrawa oko kihugo,

⁵ Kiti, erĩkĩnda lyʼababi ni ryʼakatambĩ kake, Nʼobutseme bwʼabate na Nyamuhanga ni bwʼakatambĩ kwehĩ?

⁶ Nomo buli buwe bukahetukira omo kyanya, Nʼomutwe wuwe akahĩka oko bĩtũ;

⁷ Nĩkwa asyahera kera na kera ngʼamabĩ wuwe; Ababya ibabirimulolako basyabũga bati, Alihi kwehĩ?

⁸ Asyaguluka ngʼerilota isiendisyabanika; Ega, asyahigwa ngʼesyonzolĩ syʼekiro.

⁹ Erĩso eryamulolako siryendisyaswa-mulolako, Kutse omwanya wuwe siendisyaswa-mulolako.

¹⁰ Abana buwe bakasĩma abera, Nʼebyala biwe bĩkasũbũlaya ebindu biwe.

¹¹ Amakũha wuwe oswĩre nʼamaka omo bũlwana buwe. Nĩkwa asyagotsera ahisi haguma naye omo lũtũtũ.

¹² Nomo bubi bwangasiha omo buno buwe, Nomo angabĩsabo omwisi wʼolulimi luwe,

¹³ Nomo anganzabo, ĩsĩalĩlwĩkabo bagende, Nĩkwa akinabikabo omo buno buwe,

¹⁴ Nĩkwa akalyo kuwe kʼomo nda yiwe kakabindulawa, Eribya ndulu yʼenzoka omwisi wuwe.

¹⁵ Abirimera ebindu, nĩkwa akandisyasalabyo kandi; Nyamuhanga asyalũsyabyo omo nda yiwe.

¹⁶ Asyanyungutira obuti bwʼenzoka; Nʼolulimi lwʼenzoka lwasyamwĩta.

¹⁷ Siendisyasamalira esyonyũsĩ, Esyonyũsĩ esikasenda mʼobuki nʼamagũta wʼamasabũ.

¹⁸ Ekyo aluhira asyasũbũlyakyo, isialitoka erimerakyo; Ngʼebindu ebyo abiritunda, sialitoka eritsemerabyo.

¹⁹ Kusangwa abĩrĩnũbya nʼerĩsĩganĩa abera; Abĩrĩhũnga enyũmba, eyo atahĩmba.

²⁰ Kusangwa mwataminya Obuholo omwisi wuwe, Sialibika nʼekiguma umwʼebyo akasonda.

²¹ Sihetasaka nʼekiguma ekyo angalya; Busana nʼekyo erigasa liwe siryendisyakota.

²² Omwʼitswaga lyʼobungi buwe asyabulabyo; Ebyala byʼobuli mundu oyuli omo bũlĩge byasyamũhĩkako erimubambira.

²³ Omugulu akasonda erĩũsũlya enda yiwe, Nyamuhanga asyamutumira obukali bwʼerihitana liwe, Nʼerĩmũwĩsya lyoko omugulu akalya.

²⁴ Asyasaga ekindu kyʼamalwa kyʼekyu­ma, Nĩkwa obuta bwʼomulinga bwasyamutsimita.

²⁵ Omusali akakulawa, nʼerĩlũa omo mu­gongo wuwe; Ega, obusongera obũhenĩrye bũkalũa omo ndulu yiwe; Erĩũbahya limuliko.

²⁶ Omwĩrĩmya gosĩ abĩkĩre busana nʼebindu biwe; Omuliro owatabuhirirawa nʼomundu asyamulya; Asyabuga oyo wabala omo hema yiwe.

²⁷ Olubula lwasyabĩsũla ebibi biwe. Nʼekihugo kyasyamuhanganirako omo malwa.

²⁸ Erikanya lyʼenyũmba yiwe lyasyalũaho; Ebindu biwe byasyasenda erya oko kiro kyʼerihitana liwe.

²⁹ Erĩnĩ ʼgabo lyʼomundu mubi erĩkalũa uku Nyamuhanga, Go mwandu Nyamuhanga ahamula busana naye.