Yobũ 19 - AMASAKO ABOYTRTRE WA NYAMUHANGA AWAKAHULAWA MO BIBLIA

Erĩsũbĩrya lyʼakatanu lya Yobũ

¹ Neryo Yobũ mwasũbĩrya mwabũga ati,

² Erĩhĩka emigulu yingahi mwasyagalya omutima wage, Erĩnyĩhĩnola omo bĩnywa kwehĩ?

³ Esyongendo ĩkũmĩ esĩ mwabirinyitsuma; Simulihemuka erinyikola nabi.

⁴ Nomo nanabĩrĩhalya kwenene, Erĩhalya lyage lĩkere kwĩngye ĩngyowene.

⁵ Kwenene mwamasonda erĩyĩhamya busana nage, Nʼerĩnyĩkangya esĩsonĩ syage,

⁶ Muminye lino ko Nyamuhanga abirinyikola atya, Kandi abĩrĩnyĩtĩmbako omo butaha-taha buwe.

⁷ Lebaya, ngalaka, omwaga, nĩkwa sĩndĩogũbawa; Ngalaka eribana erĩwatĩkĩbwa, nĩkwa sihali erĩbanza.

⁸ Abĩrĩrĩba enzira yage omo lũhĩmbo inataluka erilaba, Abĩrĩhĩra omwĩrĩmya gʼomo syonzira syage.

⁹ Abĩrĩndũsya oko lukengerwa lwage, Nʼerĩlũsya akakĩra oko mutwe wage.

¹⁰ Abĩrĩnyĩhĩmbũla oko mbande syosĩ, nage ngahwa; Nʼamaha wage abirikulago ngʼomuti.

¹¹ Abĩrĩakya erihitana liwe busana nage, Abirinyiganza ngʼomuguma wʼesyonzĩgũ siwe.

¹² Emilondo yiwe yikasa haguma, Bakanyĩrũkĩrayako enzira yabo erilwa nage, Bakahanda ebilaliriro erĩtĩmba oko hema yage.

¹³ Abĩrĩhĩra abagala betu bo hali kwĩ­ngye, Nʼabanyasĩ babirigabwa kwĩngye kutsibu.

¹⁴ Abʼekĩtũnga kyage babĩrĩũmbya, Nʼabĩra bage abo nyasĩ babirinyibirirwa.

¹⁵ Abĩkere omo nyũmba yage, Nʼabagombe bage bʼobũkalĩ bakanyiganza ngʼowʼehandi, Indi wʼehandi omo meso wabo.

¹⁶ Ngabirikira omugombe wage, iniataswanyĩsũbĩrya, Nangamuhatikana omo buno bwage.

¹⁷ Omuka wage ni kitsibu oko mũkalĩ wage, Abana ba koyo wage bakanyĩkwa nye.

¹⁸ Nʼabana balere bakanyipona; Namahangana, bakanyahula nabi.

¹⁹ Abalume bʼerihana lyage bakanyĩkwa nye, Nʼabo nabya nyanzĩre bamanyihindukira nabi.

²⁰ Erĩkũha lyage likamatira oko ngoba yage nʼoko mubiri wage, Nage namabalira oko kasali.

²¹ Ĩnywe bĩra bage, munyiganyire, munyiganyire; Kusangwa ebyala bya Nyamuhanga byabĩrĩnyĩswĩrya.

²² Busana nakĩ mũkanyendereraya nga Nyamuhanga, Simwehumawa nʼomubiri wage kwehĩ?

²³ Kumbe ebĩnywa byage bĩsakĩre lino! Kumbe byasakawa omo kitabu!

²⁴ Kumbe omo mutwero wʼekyuma nʼerĩsasĩ Byangabatsĩrwe omwʼĩbwe kera na kera!

²⁵ Nĩkwa ĩngye nyĩnasĩ ngoko Mũtongolya wage aliho, Nʼoko ndũlĩ asyahangana oko kihugo.

²⁶ Kandi enyũma engoba yage eno yamabĩherĩbwa, Nĩkwa omo mubiri wage nasyalola uku Nyamuhanga;

²⁷ Nĩna ngye nasyamulolako, Nʼameso wage asyamulangira, butsira ogundi. Omutima wage akatsubunguka omwisi wage.

²⁸ Mwamabũga muti, Twasyamwendererya tuti! Muti, Twasyabana mwatsi wahi erimuhandikirira kwehĩ?

²⁹ Mubahe omũyalĩ busana nenyũ. Kusangwa erihitana likaleta erisuyira lyʼomũyalĩ, Imwatoka eriminya ko hali eritswera.