Yobũ 12 - AMASAKO ABOYTRTRE WA NYAMUHANGA AWAKAHULAWA MO BIBLIA

Erĩsũbĩrya lya Yobũ eryʼakasatu uku Zofarĩ

¹ Neryo Yobũ mwasũbĩrya mwabũga ati,

² Butsira eritika-tika, ĩnywe muli bandu, Nʼamenge asyahola haguma nenyũ.

³ Nĩkwa nyinawite amenge nga nywe; Sindi muke kwĩnywe. Ega, nindi ũtasĩ emyatsi eyiri ngʼeyĩ kwehĩ?

⁴ Ĩngye indi ngʼoyũkasekererĩbawa na mũlĩkyabo, Oyo wabirikira Nyamuhanga, naye mwatasũbĩrya. Omundu oyutanganene, nʼoyũhĩkene abere kĩsekereryo.

⁵ Oyo wĩkere buholo akapona owʼobũlĩge; Nĩkwa asĩkĩre busana nʼabo abʼebisando ebikatendera.

⁶ Amahema wʼabahũngĩ akabana mũyĩsa, Nʼabakagalĩranaya Nyamuhanga bĩkere buholo; Abo Nyamuhanga akaleta omo maka wuwe.

⁷ Nĩkwa lino Ũbũlaye esyonyama, nasyo syasyakũkangĩrĩrya; Nʼesyonyonyũ syʼekyanya, syasyakubwira.

⁸ Kutse ũbũge nʼekihugo, nakyo kyasyakũkangĩrĩrya; Nʼamahere wʼomo ngetsi asyakũkangĩrĩrya.

⁹ Nindi oyũtasĩ emyatsi yosĩ eyĩ. Ngoko ebyala byʼOmwami Mukulu byabirikola ebĩ.

¹⁰ Omo byala biwe muli emitima yʼobuli kindu ekiriho, Nʼomuka wʼabandu bosĩ.

¹¹ Ko kũtũ sikwelenga ebĩnywa, ngʼolulimi lũkageraya akalyo kwehĩ?

¹² Abasyakulu bo bawite amenge, Nʼomo biro bingi muli eriminya.

¹³ Haguma na Nyamuhanga hali amenge nʼamaka; Awite erihana nʼeriminya.

¹⁴ Lebaya, akasambula, isiyangatoka erĩswahĩmbwa; Akaboha omundu, isihangatoka eribya erĩkũndũlwa.

¹⁵ Lebaya, akakakĩraya amagetsi, nago iniuma; Kandi, akatumago, nago ĩnĩũsũla omo kihugo.

¹⁶ Haguma naye muli amaka nʼamenge; Oyũkatebĩbawa nʼomũtebya ni buwe.

¹⁷ Akaleka abahanĩ ibalendera butsira biryato, Nʼabatswerĩ, akayirabo mo bakĩrũ.

¹⁸ Akabohola emĩrĩkĩ yʼabami, Nʼeriboha esyombindi syabo omo mukoba.

¹⁹ Akaleka abahererĩ ibalendera butsira biryato, Ĩnĩakĩnda abasĩkĩre.

²⁰ Akalũsaya erĩbũga lyʼabakayiketerawa, Ĩnĩalũsya eriminya lyʼabakulu.

²¹ Akapona abanya-mwami Ĩnĩakũndũla olukoba lwʼabʼamaka.

²² Akabĩsũla emyatsi ĩbĩsamĩre erihuluka omo mwĩrĩmya, Nʼerĩhũlũkya omo kyakakala enyahĩnda.

²³ Akahamaya ebihanda, nʼerĩheryabyo. Akatomekera ebihanda, nʼerisondolabo mo banyegwa.

²⁴ Akalũsaya eriminya oko bami bʼabandu bʼekihugo, Nʼerĩganga-gangyabo omo mbwarara ahate nzira.

²⁵ Bakamata-mata omo mwĩrĩmya butsira kyakakala; Akaganga-gangayabo ngʼomundu oyũkũndĩre.