Yobũ 10 - AMASAKO ABOYTRTRE WA NYAMUHANGA AWAKAHULAWA MO BIBLIA

Yobũ akalaka busana nʼobũlĩge buwe

¹ Omutima wage akatuha busana ngebeʼenyage; Ngandĩtũla omwatsi wʼamagalĩ wage; Ngandĩbũga omo bukalihe bʼomutima wage.

² Ngandibwira Nyamuhanga, nyiti, Sunyitswere lubi, Ũnyĩkangaye ekikaleka iwalwa nage.

³ Lĩnowene ukʼuwe erĩnyĩnũbya kwehĩ? Uti ukapona omũbĩrĩ wʼebyala byawe, Nʼerĩsĩma embĩta yʼababi kwehĩ?

⁴ Unawite meso wʼomubiri kwehĩ? Kutse ukanalangira ngoko mundu akalangira kwehĩ?

⁵ Ebiro byawe bine ngʼebiro byʼomundu kwehĩ? Kutse emyaka yawe iri ngʼebiro byʼomundu kwehĩ?

⁶ Uti ũkabũlaya busana nʼebibi byage, Nʼerĩsondya erĩlolo lyage?

⁷ Omo menge wawe wangaminya ko nyite ko lubanza; Nikwa sihali oyo wangalamya omo byala byawe.

⁸ Ebyala byawe mobyanyihangika nʼerinyibumba, Kandi wanzĩre erĩnyĩherya kwehĩ?

⁹ Wibuke, ngoko wabirinyibumba ngʼeribumba; Neryo wanzĩre erĩnyĩsũbya omo lũtũtũ kandi kwehĩ?

¹⁰ Sũlĩtanyũta ngʼamasabũ, Nʼerĩnyĩkamatya ngʼamasabũ kwʼakamatĩre kwehĩ?

¹¹ Nʼerĩnyambalya esyongoba nʼemĩnyokũ, Nʼerinyiluka haguma nʼamakũha nʼemĩsĩsa?

¹² Wabirimba engebe nʼolwanzo lubuya; Nʼobũteya bwawe bukabika ekĩrĩmũkyage.

¹³ Nĩkwa mowabĩsa emyatsi eyĩ omo mu­tima wawe; Nyĩnasĩ kwʼebĩ biri omwisi wawe.

¹⁴ Namahalya, ukandinyisamalira, Ĩsĩwendĩsyanyibalya oko lubanza lwage.

¹⁵ Namabya mubi, obũlĩge kwĩngye! Namabya mutunganene, nĩkwa sinangasumba omutwe wage, Ngũsũla nʼesĩsonĩ, nʼeriminya obũlĩge bwage.

¹⁶ Nʼomutwe wage amayĩhamya, ukanyihiga ngʼendale; Kandi ĩwakangya amaka wawe erilwa nage.

¹⁷ Ũkakanyaya abalangĩrĩ bawe ũkwʼĩ, ngye, Ũkakanyaya erihitana lyawe lyʼũkwʼĩngye. Obũlĩge nʼobundi bũlĩge buli haguma nage.

¹⁸ Busana nakĩ wanyĩhũlũkaya omo nda kwehĩ? Kumbe nalekula isindinalolwako nʼerĩso!

¹⁹ Kumbe nangabere nga sindiho; Nangahekerwe omwʼisinda erĩlũa omo nda.

²⁰ Sĩangalekĩre ebiro byage bike kwehĩ? Uleke! Unyireke ĩngyowene, inaminya erĩsũbya omutima omo nda mo hake,

²¹ Isindinaya eyo, sindiendisyasubula, Oko kihugo kyʼomwĩrĩmya nʼekyʼekyũtsũtũ kĩkalĩre;

²² Ekihugo kĩkĩnĩre ngʼenyahĩnda, Ekihugo kyʼekyũtsũtsũ kĩkalĩre, ekitawite ko kiri, Aho kĩkahenaya ngʼenyahĩnda.