Yobũ 1 - AMASAKO ABOYTRTRE WA NYAMUHANGA AWAKAHULAWA MO BIBLIA

Ekĩtũnga kya Yobũ nʼobuteke buwe

¹ Omo kihugo kyʼeŨzĩ habya mundu erĩna liwe iyo Yobũ; nʼomundu oyo abya ahĩkene nʼoyutunganene, nʼoyukakenga Nyamuhanga, ĩnĩakahũtata oko bibi.

² Naye mwabuta abagala balinda nʼabali basatu.

³ Nʼobũsokĩ buwe bwabya esyombũlĩ elfu irinda (7,000), nʼesyongamia elfu ĩsatu (3,000), nʼesyonume syʼesyonde esiri kwʼengomo, elfu nguma (1,000), nʼesyopunda syʼobũkalĩ magana atanu (500). Kandi abagombe buwe babya bangi. Omundu oyo abya mukulu kwilaba abandu bosĩ bʼekihugo kyʼendata.

⁴ Nʼabagala buwe mobayira erirya ĩnene obuli mundu oko kiro kiwe omo nyũmba yiwe; kandi mobatumira uku bali babo basatu eriyalya nʼerĩpũlya haguma nabo.

⁵ Neryo ebiro byʼerirya ĩnene ryabo byabere byabihwa, Yobũ mwatuma kubo mwahigulabo, kandi mwabuka omo ngyakya-ngakya mwahera amahere wʼerĩokererya ngʼeriganza lyabo abosĩ ko liri. Kusangwa Yobũ mwabũga ati, Kwamũhwa bagala bage babĩrĩhalya nʼeritsuma Nyamuhanga omo mitima yabo. Yobũ kwʼakola atya obutusa.

Satanĩ ikalega Yobũ embere sya Nyamuhanga

⁶ Neryo mohabya kiro kiguma, omugulu abagala ba Nyamuhanga bahĩka erĩyĩkanganĩa embere syʼOmwami Mukulu; Satanĩ nayo moyasa omo katĩkatĩ kabo.

⁷ Neryo Omwami Mukulu mwabũlya Satanĩ ati, Ũkalũa hayi kwehĩ? Neryo Satanĩ mwasũbĩrya Omwami Mukulu ati, Ngalũa omwʼĩtĩmba-tĩmba omo kihugo nʼerirendera mukyo eyĩ nʼeyĩ.

⁸ Neryo Omwami Mukulu mwabũlya Satanĩ ati, Wabĩrĩganĩrya omwatsi wʼomugombe wage Yobũ kwehĩ? Kusangwa sihali oyuli nga ye omo kihugo, omundu oyũhĩkene nʼoyutunganene, oyukakenga Nyamuhanga, nʼerĩhũtatira ebibi.

⁹ Neryo Satanĩ mwasũbĩrya Omwami Mukulu ati, Ko Yobũ akakengera Nyamuhanga yo busa kwehĩ?

¹⁰ Sũlĩtamũtĩmbya kwʼekikunda, nʼekĩtũnga kiwe, nʼebyosĩ awite, oko mbande syosĩ kwehĩ? Wabiritsumula omũbĩrĩ wʼebyala biwe, nʼobuteke buwe bwabirikanyirira omo kihugo.

¹¹ Nĩkwa tahĩra ebyala byawe lino, ũtũle oko byosĩ awite, naye akandikutsuma embere wʼobũsũ bwawe.

¹² Neryo Omwami Mukulu mwabwira Satanĩ ati, Lebaya, ebyosĩ awite biri omo byala byawe; ekiguma kisa, Sũhĩre ebyala byawe ukwʼiye. Neryo Satanĩ mwahuluka akalũa ahali Omwami Mukulu.

Satanĩ ĩkaheraya ebyosĩ bya Yobũ

¹³ Neryo mohabya kiro kiguma, omugulu abagala nʼabali buwe babya bakalya nʼerĩpũlya ebĩnyũ omo nyũmba yʼomugala wabo mukulu.

¹⁴ Omukwenda mwahĩka uku Yobũ, ati, Esyonde syawe sĩlũe sikalima, nʼesyopunda sĩlũe sikalira hakũhĩ nasyo.

¹⁵ Neryo Abaseba mobakayigusa musyo nʼeritwalasyo erya; kandi, babĩrĩta abalwana omo boya bwʼomũyalĩ; nage ĩngye nanamabala erisyakubwira.

¹⁶ Omugulu akĩnabũga, ogundi mwahuluka mwabũga, ati, Omuliro wa Nyamuhanga abiriwa erĩlũa omo kyanya nʼerĩhĩsya esyombũlĩ nʼabalwana, nʼeribugabyo; nĩna ngye ĩngyowene namabala erisyakubwira.

¹⁷ Omugulu akĩnabũga, mohahuluka ogundi, ati, Abakaldea babiriyira emilondo ĩsatu babĩrĩhunga esyongamia, nʼeritwalasyo erya, kandi, babĩrĩta abalwana omo boya bwʼomũyalĩ; nĩna ngye ĩngyowene namabala erisyakubwira.

¹⁸ Omugulu akĩnabũga ogundi mwahuluka, ati, Abagala bawe nʼabali bawe balũe bakalya nʼerĩpũlya ebĩnyũ omo nyũmba yʼomukulu wabo.

¹⁹ Neryo, ekihunga kinene mokĩkalũa oko luhande lwʼeyiri embwarara, mokĩkayĩswĩrangaya oko syongonde ĩnĩ syʼenyũmba, nayo moyikaterera oko balwana, nabo babirihola; nĩna ngye ĩngyowene nabalĩre erisyakubwira.

Yobũ akatsumula Nyamuhanga omo bũlĩge

²⁰ Neryo Yobũ mwahangana, mwasatya ekanzu yiwe, mwasĩsa omutwe wuwe, mwawa ahisi oko kitaka, mwaramya.

²¹ Mwabũga ati, Monalũa, omo nda ya koyo wage inyiri ndũmbũ, nasyasuba eyo inyiri ndũmbũ. Omwami Mukulu mwaha, kandi Omwami Mukulu abiritwalabyo; erĩna lyʼOmwami Mukulu litsumulawe.

²² Omo byosĩ ebĩ Yobũ mwatakola ĩlolo, kutse eriahula Nyamuhanga omo bũkĩrũ.