Yoane 8 - AMASAKO ABOYTRTRE WA NYAMUHANGA AWAKAHULAWA MO BIBLIA

Omũkalĩ oyo weyĩbawa omwʼiteta

¹ Neryo obuli mundu mwasuba ewuwe. Nĩkwa Yesu mwaya oko kitwa kyʼeMĩzeĩtũnĩ.

² Neryo omo ngyakyangyakya Yesu mwatsinduka omo Hekalũ. Neryo endeko yosĩ moyamũhĩkako, neryo Yesu mwĩkala mwakangĩrĩryabo.

³ Nĩkwa abasakĩ nʼAbafarĩsayo mobamuletera omũkalĩ oyo weyĩbawa omo luteto. Neryo mobamũhĩra omo katĩkatĩ kabo.

⁴ Mobabwira Yesu bati, Mũkangĩrĩrya, omũkalĩ oyũ aliatsimbawa akateta.

⁵ Nĩkwa omo Migambo yetu, Musa mwatuhana ati omũkalĩ ngʼoyũ ĩtawe omo mabwe, nawe ũkabũgakĩ kwehĩ?

⁶ Babũga ebĩ busana nʼerimulengako batoke erimuhandikirira. Nĩkwa Yesu mũnama, mwasaka oko kitaka omo munwe wuwe.

⁷ Nĩkwa babere bakamuhatikana erĩmũbũlya, Yesu mũnamũkala, mwabũga nabo ati, Oyute nʼebibi omo katĩkatĩ kenyũ atsũke erimugusa kwʼerĩbwe.

⁸ Kandi mũnama, mwasaka oko kitaka.

⁹ Nabo omugulu bowa ekyo, mobatsũka erihuluka mo muguma muguma, erĩtsũka oko mukulu wa kubo, neryo Yesu mwasĩgalaho ĩyowene nʼomũkalĩ omo katĩkatĩ aho.

¹⁰ Neryo Yesu mũnamũkala, mwabũga nʼomũkalĩ ati, Mũkalĩ, balihi kwehĩ? Sĩhalwe omundu nʼomuguma oyũkakũhĩra kwʼomusango kwehĩ?

¹¹ Naye mwabũga ati, Mukama, sihali nʼomuguma. Neryo Yesu mwabũga ati, Nage sĩndĩkũhĩra kwʼomusango. Ugende, erĩtsũka lino Susyekola kibi kandi.]

Yesu ekyakakala kyʼekihugo

¹² Kandi Yesu mwaswabũga nabo ati, Ingye indi kyakakala kyʼekihugo. Oyukanyikwama siendisyalendera omo mwĩrĩmya, nĩkwa asyabya nʼekyakakala kyʼengebe.

¹³ Abafarĩsayo mobamubwira bati, Ũkatũla omwatsi wawe wowene; erĩyĩtũla goko lyawe si ryʼekwenene.

¹⁴ Yesu mwasũbĩryabo ati, Nomo nangatũla omwatsi busana nage, erĩtũlago lyage ni kwenene, kusangwa nyĩnasĩ eyo nalũa, nʼeyo ngaya. Nĩkwa ĩnywe sĩmwasĩ eyo nalũa, kutse eyo ngaya.

¹⁵ Ĩnywe mukatswera oko mũsĩndo wʼomubiri, Ingye Sinditswera mundu nʼomuguma.

¹⁶ Nĩkwa nomo nangatswera, eritswera lyage ni kwenene, kusangwa Sindi ĩngyowene, nĩkwa indi na Tata oyo wanyituma.

¹⁷ Nibya bĩsakĩre omo Migambo yenyũ biti, Erĩtũlago lyʼabandu babiri ni kwenene.

¹⁸ Ĩngye indi oyũkatũla omwatsi wage, na Tata oyo wanyituma akatũla omwatsi wage.

¹⁹ Neryo mobamũbũlya bati, Ko Tata wawe ali hahi kwehĩ? Yesu mwasũbĩryabo ati, Sĩmũnyasĩ, kandi sĩmwasĩ Tata wage. Kumbe mũnyasĩ, nga mwangaminya Tata wage nibya.

²⁰ Yesu mwabũga ebĩnywa ebĩ omo Hekalũ omo kyumba aho babya bakabika esyofranka syʼekĩbo. Kandi sihabya mundu wamuhamba, kusangwa endambĩ yiwe ĩsĩrĩyahĩka.

Simwangatoka eriya eyo ngaya

²¹ Kandi Yesu mwabũga nabo ati, Ngagenda, nenyũ mwasyanyisonda-sondya, kandi mwasyahola omo bibi byenyũ. Simwangatoka erĩhĩka eyo ngaya.

²² Kyaleka Abayũda ĩbabũga bati, Asyayĩta kwehĩ? Kusangwa akabũga ati, Simwangatoka erĩhĩka eyo ngaya.

²³ Kandi abya akabwirabo ati, Ĩnywe muli bʼeyĩkwa, ĩngye indi wʼendata; ĩnywe muli bʼekihugo kino, ĩngye Sindi wʼekihugo kino.

²⁴ Kikaleka inababwira nyiti, Mwasyahola omo bibi byenyũ. Kusangwa mwamatendĩkĩrĩrya ko nyiri ye, mwasyahola omo bibi byenyũ.

²⁵ Neryo mobabũlya Yesu bati, Uwendi kwehĩ? Yesu mwabwirabo ati, Kye nʼekyo nabiribabwira erĩtsũka erĩmbere.

²⁶ Ngwite myatsi mingi yʼeribabwira nʼeritswera busana nenyũ. Nĩkwa oyo wanyituma ni kwenene, kandi ngabwira ekihugo emyatsi eyo ngowa ewuwe.

²⁷ Nabo mobataminya kwʼabya akabwirabo busana nʼĩse.

²⁸ Neryo Yesu mwabwirabo ati, Omugulu mwasyasumba Omugala wʼOmundu, neryo mwasyaminya ĩngye kwʼindi ye. Kandi sindikola kindu omwʼihana lyage ĩngyowene, nĩkwa ngabũga emyatsi eyĩ ngoko Tata anyĩkangĩrĩraya.

²⁹ Nʼoyo wanyituma ali haguma nage. Sialitanyĩsĩga ĩngyowene, kusangwa ngakola ebiro byosĩ emyatsi eyĩkamũtsemesaya.

³⁰ Neryo Yesu abere akabũga emyatsi eyĩ, abangi mobamwĩkĩrĩrya.

Abandu bʼobwĩranda nʼabakobe

³¹ Neryo Yesu mwabwira Abayũda abamwĩkĩrĩraya ati, Mwamabya mukakwama ebĩnywa byage, imuli biga bage kwenene.

³² Kandi mwasyaminya ekwenene, nʼomwatsi wʼekwenene asyabaha obwĩranda.

³³ Nabo mobamũsũbĩrya bati, Tuli bana ba Abrahamũ, sitwetabya omo bukobe bwʼomundu nʼomuguma. Ko ũkabũga uti kwehĩ? uti, Mwasyabya nʼobwĩranda.

³⁴ Yesu mwasũbĩryabo ati, Kwenene, kwenene ngabũga nenyũ nyiti, Obuli mundu oyukakola ebibi, ni mukobe wʼebibi.

³⁵ Omukobe sĩalĩkala omo nyũmba ebiro byosĩ, nĩkwa omwana akĩkala ebiro byosĩ kera na kera.

³⁶ Neryo Mugala amabaha obwĩranda, mwasyabya nʼobwĩranda kũndũ.

³⁷ Nyĩnasĩ ko muli bana ba Abrahamũ. Nĩkwa mukasonda erĩnyĩta, kusangwa ekĩnywa kyage sikiwite omwanya omo mitima yenyũ.

³⁸ Ngabũga emyatsi eyo nabirilangira embere sya Tata wage. Nenyũ mukakola emyatsi eyo tata wenyũ ababwira.

³⁹ Mobamũsũbĩrya bati, Abrahamũ ni tata wetu. Yesu mwabwirabo ati, Kumbe muli bana ba Abrahamũ, nga mukakola emĩbĩrĩ Abrahamũ akola.

⁴⁰ Ĩngye nabiribabwira omwatsi wʼekwenene ogo Nyamuhanga ambwira. Nĩkwa mukasonda-sonda erĩnyĩta. Abrahamũ mwatakola atya!

⁴¹ Ĩnywe mukakola emĩbĩrĩ tata wenyũ akakola. Nabo mobamubwira bati, Situli basa-na-nyĩnya, tuwite tata muguma, ye Nyamuhanga.

⁴² Yesu mwabwirabo ati, Kumbe Nyamuhanga ni Tata wenyũ, nga mũnyanzĩre; kusangwa nahuluka ngalũa ewa Nyamuhanga, kusangwa mondasa nʼehamũlĩ yage, iye yo wanyituma.

⁴³ Busana nakĩ simuliminya ebyo ngabũga kwehĩ? Ni kusangwa simulitoka erĩowa ekĩnywa kyage.

⁴⁴ Ĩnywe muli bana ba tata wenyũ Satanĩ, kandi esyongumbu sya tata wenyũ syo mwanzĩre erikola. Iye nĩ mwĩtĩ. Siali mo mwatsi wʼekwenene, kusangwa sihali mwatsi wʼekwenene omo mutima wuwe. Omugulu akabũga amabehĩ, akabũga ebiwe ĩyowene, kusangwa nĩ mũbehĩ, kandi nĩ ĩse wʼamabehĩ.

⁴⁵ Nĩkwa ĩngye ngabũga omwatsi wʼekwenene, ekyo kikaleka ĩmũtanyĩkĩrĩrya.

⁴⁶ Nindi ũkwʼĩnywe akanzĩnga oko bibi kwehĩ? Namabũga omwatsi wʼekwenene, nĩkĩ kyo kikaleka ĩmũtanyĩkĩrĩrya kwehĩ?

⁴⁷ Omundu wa Nyamuhanga akowa ebĩnywa bya Nyamuhanga. Kusangwa Simuli ba Nyamuhanga, sĩmũlĩowabyo.

Yesu na Abrahamũ

⁴⁸ Abayũda mobasũbĩrya Yesu bati, Motũtabũga ndeke tuti, Uli Munya Samarĩa, kandi uli ko mbĩnga kwehĩ?

⁴⁹ Yesu mwasũbĩrya ati, Sindi ko mbĩnga, nĩkwa ngasĩkaya Tata wage, nenyũ mukanyihemula.

⁵⁰ Nĩkwa ĩngye sindisonda-sonda erĩsĩkĩbwa; hali muguma oyukasonda-sondalyo, naye akatswera.

⁵¹ Kwenene, kwenene ngabũga nenyũ, omundu amabika ekĩnywa kyage, oluholo silwendisyamũhĩkako na kera.

⁵² Abayũda mobamubwira bati, Lino tũnasĩ kʼuli ko mbĩnga. Abrahamũ mwahola, nʼabamĩnyererĩ mobahola nibya; nawe ũkabũga uti, Omundu amabika ekĩnywa kyage, oluholo sĩlwendĩsyamũhĩkako na kera.

⁵³ Tata wetu Abrahamũ mwahola, nawe uli mukulu kwilaba ye kwehĩ? Nʼabamĩnyererĩ nabo mobahola, nawe ukayiyira mondi kwehĩ?

⁵⁴ Yesu mwasũbĩrya ati, Namayipipa, eriyipipa lyage ini buyira. Oyukanyipipa ni Tata wage, nenyũ muti, Iye ni Nyamuhanga wetu.

⁵⁵ Kandi ĩnywe simwetamuminya, nĩkwa ĩngye nyĩmwasĩ. Namabũga nyiti, sĩnyĩmwasĩ, nasyabya mũbehĩ nga nywe. Nĩkwa nyĩnamwasĩ, kandi ngabika ekĩnywa kiwe.

⁵⁶ Tata wenyũ Abrahamũ mwatsema erilola oko kiro kyage, kandi mwalola kukyo, mwatsema.

⁵⁷ Neryo Abayũda mobamubwira bati, Suli wabya wʼemyaka makũmĩ atanu, walola uku Abrahamũ uti kwehĩ?

⁵⁸ Yesu mwabwirabo ati, Kwenene, kwenene ngababwira nyiti, Abrahamũ ate abutwa, INYINE.

⁵⁹ Neryo mobatola amabwe erimugusa goko; nĩkwa Yesu mwayĩbĩsa, mwalũa omo Hekalũ.