Yoane 7 - AMASAKO ABOYTRTRE WA NYAMUHANGA AWAKAHULAWA MO BIBLIA

Yesu nʼabagala babo

¹ Enyũma wʼemyatsi eyĩ, Yesu mwalendera eGalĩlaya, kusangwa siabya anzĩre erirendera eYũdea kusangwa Abayũda basonda-sonda erĩmwĩta.

² Neryo ebiro bikulu byʼAbayũda byʼamahema byabya hakũhĩ.

³ Abagala babo Yesu mobamubwira bati, Ũlũe hano, uye eYũdea, abiga bawe batoke erilola oko mĩbĩrĩ yawe eyo ukakola.

⁴ Kusangwa omundu sialĩbĩsa ebyo akakola, amabya akasonda eriminyikala ndeke. Wamakola emyatsi eyĩ ũyĩmĩnyĩkalaye oko kihugo.

⁵ Kusangwa abagala babo nibya mobatamwĩkĩrĩrya.

⁶ Neryo Yesu mwabũga nabo ati, Endambĩ yage siriyahĩka, nĩkwa endambĩ yenyũ ĩkahĩka emigulu yosĩ.

⁷ Ekihugo sikiritoka erĩbakwa obusu, nĩkwa kĩkanyĩkwa obusu, kusangwa ngabwirakyo nyiti emĩbĩrĩ yakyo ni mibi.

⁸ Ĩnywe muye oko biro bikulu ebyo. Sindiendisyaya oko biro bikulu ebĩ, kusangwa endambĩ yage siyeyaberwa.

⁹ Yesu abere abwirabo emyatsi eyĩ, mwasĩgala eGalĩlaya.

Yesu oko biro bikulu byʼamahema

¹⁰ Nĩkwa abagala babo babere babigenda oko biro bikulu ebyo, Yesu mwayayo butsira embere syʼabandu, nĩkwa omo bũbĩso-bĩso.

¹¹ Abayũda babya bakamusonda-sonda oko biro bikulu, bati, Alihi kwehĩ?

¹² Neryo habya eminigonigo mingi omo katĩkatĩ kʼendeko busana naye. Abandi mobabũga bati, Ni mundu mubuya, nʼabandi bati, Iyihi, akatalaya endeko.

¹³ Nĩkwa sihabya mundu ukamwahula embere syʼabandu, busana nʼeriubaha Abayũda.

¹⁴ Neryo omo katĩkatĩ kʼebiro bikulu ebyo Yesu mwaya omo Hekalũ, mwatsũka erĩkangĩrĩrya.

¹⁵ Neryo Abayũda mobasweka bati, Omundu oyũ amatoka akalasi ko ati isialitakangĩrĩrĩbwa kwehĩ?

¹⁶ Yesu mwasũbĩryabo ati, Ebyo ngakangĩrĩraya si byage, nĩkwa ni bya Nyamuhanga oyo wanyituma.

¹⁷ Omundu Oyukasonda erikola erianza lya Nyamuhanga, asyaminya erĩkangĩrĩrya eryo nga ni rya Nyamuhanga kutse nga ngabũga omwʼiyihana lyage.

¹⁸ Omundu oyũ akabũga ebiwe, akasonda eripipa liwe; nĩkwa Oyukasonda eripipa lyʼoyo wamutuma, iye ni kwenene, kandi sihali ekitatunganene omwisi wuwe.

¹⁹ Musa mwatabaha Emigambo kwehĩ? Nĩkwa sihali muguma gʼũkwʼĩnywe oyukakenga Emigambo. Busana nakĩ mukasonda-sonda erĩnyĩta kwehĩ?

²⁰ Endeko mobamũsũbĩrya bati, Uli ko mbĩnga! Nindi yukasonda-sonda erĩkwĩta kwehĩ?

²¹ Yesu mwasũbĩryabo ati, Monakola omũbĩrĩ muguma, ũnywe bosĩ momwaswekerago.

²² Busana nʼomwatsi oyũ, Musa mwabaha eribana. Si rya Musa, nĩkwa lyalũa oko botata-kulu benyũ. Neryo mũkabanaya omundu oko kiro kyʼeSabato.

²³ Omundu amabanĩbwa oko kiro kyʼeSabato, Emigambo ya Musa isiyeketawa, mukanyihitanako kusangwa ngalamaya omundu yo ndeke oko kiro kyʼeSabato kwehĩ?

²⁴ Simutswere erilolwako, nĩkwa mutswere eritswera litunganene.

Yesu nĩ Masĩya kwehĩ?

²⁵ Neryo abandi bʼoko bandu bʼeYerũsalema mobabũga bati, Oyũ si yo bakasonda erĩĩta kwehĩ?

²⁶ Kandi lebaya, akabũga embere syʼabandu, ĩsĩbebũga mwatsi naye! Kwʼabatabalĩ banasĩ ndeke kwʼoyũ ni Kristo kwehĩ?

²⁷ Nĩkwa ekiro Kristo asyasa, sihali mundu oyo wasĩ eyo alũa. Nĩkwa tũnasĩ eyo mundu oyũ akalũa.

²⁸ Neryo omugulu Yesu akangĩrĩraya omo Hekalũ, mwabirikira nʼomulenge munene ati, Mũnyasĩ, kandi mũnasĩ eyo nalũa. Kandi sĩndĩtahĩka nʼehamũlĩ yage. Nĩkwa oyo wanyituma ni kwenene. Inywe sĩmũmwasĩ.

²⁹ Nĩkwa ĩngye nyĩnamwasĩ, kusangwa nalũa ewuwe, naye yo wanyituma.

³⁰ Neryo mobasonda-sonda erimuhamba, nĩkwa mohatabya mundu oyo wamũhĩra kwʼebyala, kusangwa endambĩ yiwe ĩsĩrĩyahĩka.

³¹ Nĩkwa abangi bʼomo ndeko mobamwĩkĩrĩrya bati, Ekiro Kristo asyasa asyakola ebitiko-tiko bingi kwilaba ebyo mundu oyũ akakola kwehĩ?

Abafarĩsayo bakatuma balembya erihamba Yesu

³² Abafarĩsayo mobowa endeko ĩkatsomererya Yesu. Neryo abahererĩ bakulu nʼAbafarĩsayo mobatuma balembya erihamba Yesu.

³³ Yesu mwabwirabo ati, Nasyabya nenyũ kandi katambĩ, neryo nasyaya ukwʼoyo wanyituma.

³⁴ Mwasyanyisonda-sonda, simwendisyanyibana, nʼaho nasyabya Simwangatoka erĩhĩkaho.

³⁵ Neryo Abayũda mobakanĩa omo katĩkatĩ kabo bati, Omundu oyũ asyayahi kwehĩ? ati, Sitwendisyamubana. Asyaya oko mĩyĩ yʼAbagĩrĩkĩ aho Abayũda bali, nʼerĩkangĩrĩrya Abagĩrĩkĩ kwehĩ?

³⁶ Akabũga ati, Mwasyanyisonda-sonda, nĩkwa simwendisyanyibana, nʼaho nasyabya simwendisyatoka erĩhĩkaho. Akabũgakĩ kwehĩ?

Esyonyũsĩ syʼamagetsi wʼengebe

³⁷ Neryo oko kiro kyʼenyũma-nyũma kyʼebiro bikulu ebyo, ekiro kinene kyʼeryusa, Yesu mwahangana mwabũga nʼomulenge munene ati, Omundu amakwa enyota, ase kwĩngye apũlaye.

³⁸ Ngoko Amasako akabũga ati, Oyũkanyĩkĩrĩraya, esyonyũsĩ syʼamagetsi wʼengebe syasyasenda sĩkalũa omo mutima wuwe.

³⁹ Nĩkwa Yesu abũga ekĩ iniakahula Omũlĩmũ ogo abakamwĩkĩrĩraya basyahabwa. Oko mugulu oyo Omũlĩmũ isialiahabwa, kusangwa Yesu isialiabana olukengerwa luwe.

Erigabana lyʼabandu

⁴⁰ Abandi bandu bʼomo ndeko, omugulu bowa ebĩnywa ebĩ, mobabũga bati, Kwenene oyũ nĩ Mũmĩnyererĩ oyo!

⁴¹ Abandi bati, Oyũ ni Kristo! Kandi abandi bati, Ko Kristo akasyalũa eGalĩlaya kwehĩ?

⁴² Amasako Sĩalĩtabũga ati, Kristo akalũa oko lubuto lwa Dawĩdĩ, nʼeributirwa eBetelehemũ, omũyi wa Dawĩdĩ abyamo kwehĩ?

⁴³ Neryo mohabya erigabana omo ndeko busana na Yesu.

⁴⁴ Abandi mobasonda erimuhamba, nĩkwa mohatabya mundu oyo wamũhĩra kwʼebyala.

Erĩtendĩkĩrĩrya lyʼabakulu bʼAbayũda

⁴⁵ Neryo abalembya mobasuba oko bahererĩ bakulu nʼAbafarĩsayo. Nabo mobabũlyabo bati, Busana nakĩ simwetamuleta kwehĩ?

⁴⁶ Abalembya mobasũbĩryabo bati, Na kera sihali mundu wabuga ngʼomundu oyũ kwʼakabũga.

⁴⁷ Abafarĩsayo mobasũbĩryabo bati, Amabatalya nenyũ kwehĩ?

⁴⁸ Oko batabalĩ nʼAbafarĩsayo hali omundu oyo wabĩrĩmwĩkĩrĩrya kwehĩ?

⁴⁹ Nĩkwa endeko eno eyĩtasĩ Emigambo ya Musa ni batakirwa.

⁵⁰ Nĩkodemo omuguma wa kubo, oyo wahĩka uku Yesu erĩmbere, mwabwirabo ati,

⁵¹ Emigambo yetu siyetswera mundu batetatsũka erĩmowa, nʼeriminya ebyo akakola.

⁵² Mobamũsũbĩrya bati, Nawe nibya uli wʼeGalĩlaya kwehĩ? Usome Amasako, wasyalebya ko hate omũmĩnyererĩ oyũkalũa eGalĩlaya.