Yoane 5 - AMASAKO ABOYTRTRE WA NYAMUHANGA AWAKAHULAWA MO BIBLIA

Erĩlamya omundu oko kitsinga

¹ Enyũma wʼemyatsi eyĩ, habya ebiro bikulu byʼAbayũda, neryo Yesu mwahetukira eYerũsalema.

² Kandi eYerũsalema hakũhĩ nʼolũkyo lwʼEsyombũlĩ, hali ekitsinga ekiwite ebitalikirire bitanu. Ekitsinga ekyo kikahulawa mo Betesaĩda.

³ Omo bitalikirire ebĩ habya endeko yʼabakonĩ, esyondĩmatĩme, nʼebirema, nʼabũmĩre, [ibakalindirira erĩtabũkala lyʼamagetsi.

⁴ Kusangwa omũlaĩka wʼomukama iniakandagala igumi-guma omo kitsinga eripanza amagetsi. Neryo Oyũkatsũka eriya omo magetsi amabĩtabũkala, inialamĩbwa oko ndwala eyo alwe akwĩre.]

⁵ Neryo omundu muguma abyaho, inialwere oko myaka makũmĩ asatu nʼomunani.

⁶ Neryo Yesu mwamulangira iniagotsereho, kandi mwaminya omundu oyo kwʼabirilwala biro bingi. Neryo mwamũbũlya ati, Wanzĩre erilama kwehĩ?

⁷ Omũkonĩ oyo mwamũsũbĩrya ati, Mukama, singwite omundu wʼerĩnyĩhĩra omo kitsinga omugulu amagetsi akatabũkala; nĩkwa omugulu ngalenga eriyamo, ogundi mundu akanyitanga.

⁸ Neryo Yesu mwamubwira ati, Hangana, uheke engyingo yawe, uyigendere.

⁹ Neryo-neryo omundu oyo mwalama. Neryo mwaheka engyingo yiwe, mwayigendera. Nĩkwa ekiro ekyo kyabya ekiro kyʼeSabato.

¹⁰ Neryo Abayũda mobabwira oyo walamĩbawa bati, Mũnabwĩre ni Sabato, kandi Emigambo ĩkakũganaya eriheka engyingo yawe.

¹¹ Nĩkwa mwasũbĩryabo ati, Oyũlyanyĩlamaya yuliambwira ati, Uheke engyingo yawe, uyigendere.

¹² Nabo mobamũbũlya bati, Omundu oyo yondi oyukakubwira ati, Uheke engyingo yawe uyigendere kwehĩ?

¹³ Nĩkwa oyo walamĩbawa mwataminya nga nindi, kusangwa Yesu iniamabĩlũaho omugulu endeko yabyaho.

¹⁴ Enyũma wʼaho, Yesu mwamweya omo Hekalũ, mwamubwira ati, Lebaya, wabirilama. Suswekola ekibi, Ukasyabya ko mwatsi akalĩre kwʼaho.

¹⁵ Neryo omundu oyo mwalũaho, mwayabwira Abayũda kwʼali ini Yesu oyo wamũlamaya.

¹⁶ Busana nʼomwatsi oyũ Abayũda mobatsũka erĩendererya Yesu, kusangwa abya akakola emyatsi eyĩ oko kiro kyʼeSabato.

¹⁷ Nĩkwa Yesu mwasũbĩryabo ati, Tata wage akakola emigulu yosĩ, ĩngye nage ngakola.

¹⁸ Busana nʼomwatsi oyũ Abayũda mobasonda-sonda erĩmwĩta kwilaba; kusangwa ambu abya akaketa omugambo wʼeSabato, kandi kusangwa abya akahula Nyamuhanga mo Tata wuwe, ĩnĩakayĩrĩngĩrĩranaya na Nyamuhanga.

Ehamũlĩy ʼOmugala

¹⁹ Neryo Yesu mwasũbĩryabo ati, Kwenene, kwenene ngabũga nenyũ nyiti, Omugala sialikola kindu ĩyowene, nĩkwa akakola ebyo akalangira Tata wuwe akakola; kusangwa ebyosĩ Ĩse akakola, byo Mugala akakola atya nibya.

²⁰ Kusangwa Ĩse anzĩre Mugala, kandi akamũkangaya emyatsi yosĩ eyo akakola. Kandi emĩbĩrĩ minene ũkwʼeyĩ asyamũkangyayo, imwatoka erisweka.

²¹ Kusangwa ngoko Tata akalũbũkaya abaholĩ nʼerihabo engebe, litya Omugala akaha engebe ukwʼabo anzĩre erihayo.

²² Kandi Tata sialitswera omundu nʼomuguma. Nĩkwa abiriha Omugala ehamũlĩ yʼeritswera lyosĩ.

²³ Neryo abosĩ batoke erĩsĩkya Omugala, ngoko bakasĩkaya Tata. Oyũtesĩkaya Omugala, sĩalĩsĩkaya Tata oyo wamutuma.

²⁴ Kwenene, kwenene ngababwira, oyũkowa ebĩnywa byage, nʼerĩkĩrĩrya oyo wanyituma, awite engebe yʼerikota. Kandi siendisyatswerwa, nĩkwa abĩrĩlũa omo luholo, abiringira omo ngebe.

²⁵ Kwenene, kwenene, ngababwira, endambĩ ikasa, na lino ineho, omugulu abaholĩ basyowa omulenge wʼomugala wa Nyamuhanga, nʼabo abakowa basyabyaho.

²⁶ Kusangwa ngoko Tata ni mwenye engebe, litya abiriha Omugala eribya Omwenye engebe.

²⁷ Kandi abiriha Omugala ehamũlĩ yʼeritswera esyombanza, kusangwa iye ni Mugala wʼOmundu.

²⁸ Simusweke busana nʼekĩ; kusangwa endambĩ ikasa, oko mugulu oyo, abosĩ abali omo masinda basyowa omulenge wuwe.

²⁹ Basyalũa omo masinda wabo; abakola emĩbĩrĩ mibuya basyalũbũka oko ngebe, nʼabakola ebibi basyalũbũka oko lubanza lwʼeritswerwa.

Erĩtũlago lya Yesu

³⁰ Sinditoka erikola kindu omwʼiyihana lyage; ngatswera ngoko Nyamuhanga akambwira, nʼeritswera lyage ritunganene; kusangwa sindisonda erikola ebyo nyanzĩre, nĩkwa erianza lyʼoyo wanyituma.

³¹ Namatũla omwatsi wage ĩngyowene, erĩtũlago lyage si kwenene.

³² Hali gundi oyũkatũlago busana nage; kandi nyĩnasĩ ebyo akabũga busana nage ni kwenene.

³³ Mwabiritumira Yoane yʼabakwenda, naye abĩrĩtũla omwatsi wʼekwenene.

³⁴ Nĩkwa ĩngye Sindi nʼobwaga bwʼerĩtũlago lyʼabandu; nĩkwa ngabũga emyatsi eyĩ, imwatoka erĩlamĩbwa.

³⁵ Yoane abya tala eyikaka nʼerĩkolerya, nenyũ mwabya mwanzĩre eritsema katambĩ omo kyakakala kiwe.

³⁶ Nĩkwa ĩngye ngwite erĩtũlago lĩnene-kwilaba erya Yoane; kusangwa emĩbĩrĩ eyo Tata abirimba eribugirira, emĩbĩrĩ eyo ngakola ĩkatũlago busana nage, iti Tata abirinyituma.

³⁷ Na Tata oyo wanyituma, iye abĩrĩtũla omwatsi busana nage. Inywe Sĩmwetowa omulenge wuwe na kera, kutse erilangira ekĩsosekanĩo kiwe.

³⁸ Kandi simuwite ekĩnywa, kusangwa sĩmũlĩkĩrĩraya oyo atuma.

³⁹ Mukasoma Amasako, kusangwa mũkaganĩraya muti muwite engebe yʼerikota. Kandi Amasako ayo akatũlago busana nage!

⁴⁰ Nĩkwa sĩmũlĩrĩga erĩmbĩkako imwatoka eribana engebe.

⁴¹ Sindisonda eripipwa nʼabandu.

⁴² Nĩkwa nyĩbasĩ; simuwite olwanzo lwa Nyamuhanga omo mitima yenyũ.

⁴³ Nabĩrĩhĩka omo lĩna lya Tata wage, nenyũ sĩmũlĩtanyĩkokya; ogundi amasa omo lĩna liwe ĩyowene, mwasyamũkokya.

⁴⁴ Mukatoka erĩkĩrĩrya muti, omugulu mukabana erĩsĩkanĩa omuguma oko gundi kwehĩ, isimulisonda-sonda erĩsĩkya erĩkalũa uku Nyamuhanga ĩyowene.

⁴⁵ Sĩmũganĩraye muti nasyabahandikirira embere sya Tata. Musa yo wasyabahandikirira. Ni Musa oyo mũkahĩra kwʼamaha.

⁴⁶ Kusangwa kumbe mwĩkĩrĩraya uku Musa, nga mwanganyĩkĩrĩrye; kusangwa iye mwasaka emyatsi yage.

⁴⁷ Nĩkwa mwamatendĩkĩrĩrya Amasako wuwe, mwasyĩkĩrĩrya ebĩnywa byage byo muti kwehĩ?