Yoane 3 - AMASAKO ABOYTRTRE WA NYAMUHANGA AWAKAHULAWA MO BIBLIA

Yesu na Nĩkodemo

¹ Neryo habya mundu wʼAbafarĩsayo, omũtabalĩ wʼAbayũda, oyukahulawa mo Nĩkodemo.

² Omundu oyo mwasa uku Yesu omo kiro, ati, Mũkangĩrĩrya, tũnasĩ kʼuli mũkangĩrĩrya oyo walũa ewa Nyamuhanga. Kusangwa sihali mundu oyo wangatoka erikola ebitiko-tiko ebyo ukakola, Nyamuhanga ate haguma naye.

³ Yesu mwamũsũbĩrya ati, Kwenene, kwenene, ngabũga nawe, nyiti, Omundu amatendibutwa kandi, siangatoka erilola oko Bwami bwa Nyamuhanga.

⁴ Nĩkodemo mwabũlya Yesu ati, ko mundu angatoka eributwa ati, amabibya mukulu kwehĩ? Angatoka eriingira omo nda ya koyo wuwe nʼeriswabutwa kwehĩ?

⁵ Yesu mwamũsũbĩrya ati, Kwenene, kwenene, ngakubwira nyiti, Omundu amatendibutwa oko magetsi nʼoko Mũlĩmũ, siangatoka eriingira omo Bwami bwa Nyamuhanga.

⁶ Omubiri akabuta omubiri, nʼOmũlĩmũ akabuta Omũlĩmũ.

⁷ Susweke kusangwa mongakubwira nyiti, Litolere imwabutwa kandi.

⁸ Erihunga likabuhirira eyo lyanzĩre, nawe ũkowa erihuha lyalyo, nĩkwa ĩsĩwasĩ eyo lĩkalũa, kutse eyo likaya; kwʼali atya obuli mundu oyo Mũlĩmũ akabuta.

⁹ Neryo Nĩkodemo mwamũsũbĩrya nʼerĩmũbũlya ati, Kwʼemyatsi eyĩ yangabya iti kwehĩ?

¹⁰ Yesu mwasũbĩrya ati, Uwe uli mũkangĩrĩrya wa Ĩsraelĩ isuliminya emyatsi eyĩ kwehĩ?

¹¹ Kwenene, kwenene, ngabũga nawe, ĩtwe tũkabũga ebyo twasĩ, kandi tũkatũla omwatsi wʼebyo twabirilangira, nenyũ sĩmũlĩrĩga erĩtũlago lyetu.

¹² Namabya ngababwira emyatsi yʼekihugo ĩsĩmũlĩtĩkĩrĩryayo, namababwira emyatsi yʼelubula, mwasyĩkĩrĩryayo muti kwehĩ?

¹³ Sihali omundu oyo wahetukira elubula, yo nʼomugala wʼOmundu oyo wandagala akalũa elubula.

¹⁴ Ngoko Musa asumbira enzoka yʼendata omo mbwarara, litya Omugala wʼOmundu atolere erisumbirwa endata.

¹⁵ Neryo Omundundi oyũkamwĩkĩrĩraya abane engebe yʼerikota.

¹⁶ Kusangwa Nyamuhanga mwanza ekihugo kyʼatya, kyaleka iniaha Mugala wuwe, Ekyusa kiwe, neryo oyũkamwĩkĩrĩraya siahere, nĩkwa abye nʼengebe yʼerikota.

¹⁷ Kusangwa Nyamuhanga mwatatuma Mugala wuwe omo kihugo eribya Mũtswerĩ wakyo, nĩkwa abye Omũlamya wakyo.

¹⁸ Oyũkĩkĩrĩraya Omugala sialitswerawa, nĩkwa oyũtetĩkĩrĩrya iniamabitswerwa, kusangwa sĩalĩtĩkĩrĩrya oko Mugala, Ekyusa kya Nyamuhanga.

¹⁹ Neryo eritswera lyerĩ, ekyakakala kyabiriasa omo kihugo, nʼabandu mobanza omwĩrĩmya kwilaba ekyakakala, kusangwa emĩbĩrĩ yabo yabya mibi.

²⁰ Kusangwa obuli mundu oyukakola ebibi akakwa ekyakakala kyʼobusu, kandi sĩalĩhĩka oko kyakakala, emĩbĩrĩ yiwe mibi ĩkasyamĩnyĩkalĩbwa.

²¹ Nĩkwa oyukakola ekwenene akasa oko kyakakala, emĩbĩrĩ yiwe iminyikale kwʼikakolawa omo nzira yʼerĩowa Nyamuhanga.

Yesu na Yoane

²² Enyũma wʼemyatsi eyĩ, Yesu nʼabiga buwe mobasa omo kihugo kyʼeYũdea. Eyo, Yesu mwasiba nabo ĩnĩakabatĩsaya.

²³ Yoane nibya abya akabatĩsĩrya eAĩnonĩ hakũhĩ nʼeSalĩmũ, kusangwa ho habya magetsi mangi; kandi abandu babya bakahĩka nʼerĩbatĩsĩbwa.

²⁴ Kusangwa Yoane isialiaguswa omo mũlĩkĩ.

²⁵ Neryo obuhaka mobwahuluka omo katĩkatĩ kʼabiga ba Yoane nʼOmũyũda oko mwatsi wʼerĩerya.

²⁶ Neryo abiga abo mobahĩka uku Yoane, mobamubwira bati, Mũkangĩrĩrya, oyo wabya haguma nawe eyisirya wʼeYorodanĩ, oyo wahula, lebaya, akabatĩsaya, nʼabandu bosĩ bakamũhĩkako!

²⁷ Yoane mwasũbĩryabo ati, Omundu sialibana ekindu ekyo Nyamuhanga atamuha, kĩkalũa elubula.

²⁸ Nenyũ muli batũlĩ bʼomwatsi wage ngoko nabũga nyiti, Ingye Sindi Kristo, nĩkwa natumawa embere siwe.

²⁹ Oyuwite Omũherũkĩ, nĩ ĩba wʼomũherũkĩ; nĩkwa omwĩra wʼĩba wʼomũherũkĩ, oyo wimene nʼerimuhulikirira, akatsema kutsibu erĩowa omulenge wʼĩba wʼomũherũkĩ. Litya obutseme bwage bwamahĩkana.

³⁰ Litolere iniahama, nage inakeha.

Oyũkalũa elubula

³¹ Oyũkalũa endata alengĩre abosĩ, nʼowʼekihugo ni wʼekihugo, kandi akabũga ebyʼekihugo. Oyũkalũa elubula alengĩre abosĩ.

³² Akatũla omwatsi wʼebyo abirilangira nʼebyo abĩrĩowa, kandi sihali mundu oyũkalĩga erĩtũlago liwe.

³³ Oyũkalĩga erĩtũlago liwe, akakangaya ngoko Nyamuhanga ni kwenene.

³⁴ Kusangwa oyo Nyamuhanga abirituma akabũga ebĩnywa bya Nyamuhanga, kusangwa Nyamuhanga sialirengera mundu yʼOmũlĩmũ wuwe.

³⁵ Tata anzĩre Omugala, kandi abĩrĩhĩra emyatsi yosĩ omo byala biwe.

³⁶ Oyũkĩkĩrĩraya Omugala awite engebe yʼerikota; nĩkwa oyutekenga Omugala siendisyalola oko ngebe, nĩkwa erihitana lya Nyamuhanga lĩmwĩkereko kera na kera.