Yoane 2 - AMASAKO ABOYTRTRE WA NYAMUHANGA AWAKAHULAWA MO BIBLIA

Erirya lyʼerĩherũkya eKana

¹ Enyũma wʼebiro bisatu habya erĩherũkya omo mũyĩ wʼeKana yʼeGalĩlaya, kandi nyĩnya wa Yesu abyaho.

² Nĩkwa Yesu nʼabiga buwe mobabirikirwa okwʼĩherũkya eryo.

³ Neryo omugulu ebĩnyũ byosĩea byahwa, nyĩnya wa Yesu mwamubwira ati, Sibawite bĩnyũ.

⁴ Neryo Yesu mwabũga naye ati, Mugole, siritolere ukambwira ebyo nangakola, endambĩ yage siriyahĩka.

⁵ Neryo nyĩnya wuwe mwabwira abagombe ati, Ebyosĩ akababwira, mukolebyo.

⁶ Nĩkwa habya malega ndatu bahĩraho omo mitsye yʼAbayũda yʼerĩeryamo. Omo buli rĩrega mwabya lĩtre makũmĩ munani kutse erĩgana nʼamakũmĩ abiri.

⁷ Yesu mwabwira abagombe ati, Mũsũlaye amalega wʼamagetsi. Neryo mobũsũlyago ndeke erĩhĩka oko mũnywa gʼobuli rĩrega.

⁸ Neryo Yesu mwabwira abagombe ati, Lino mutehebyo muhekerebyo omukama wʼerĩherũkya. Nabo mobamutwalirabyo.

⁹ Neryo omukama wʼerĩherũkya abere abigerya amagetsi awabiribya bĩnyũ, ĩsĩasĩ ebĩnyũ nga bĩryalũahi, nĩkwa abagombe abateha amagetsi ĩbanasĩ, omukama wʼerirya oyo mwabirikira ĩba wʼomũherũkĩ.

¹⁰ Mwabũga naye ati, Abandi bandu bakatsũka erĩhĩra ebĩnyũ byowene; neryo abandu bakabya babĩpũlya ndeke, bakahĩra ebĩnyũ ebĩtowene. Nĩkwa uwe wabiribika ebĩnyũ byowene erĩhũlũkyabyo lino.

¹¹ Yesu akola enzũko eyĩ yʼebitikotiko eKana yʼeGalĩlaya. Kandi mwamĩnyĩsya olukengerwa luwe, nʼabiga buwe mobamwĩkĩrĩrya.

¹² Enyũma wʼaho Yesu, na nyĩnya wuwe, nʼabagala babo, nʼabiga buwe, mobandagalira eKapernaũmũ, kandi mobĩkalayo biro bike.

Yesu akaya omo Hekalũ

¹³ Neryo Ekiro kyʼErikiruka kyʼAbayũda kyabya hakũhĩ, kandi Yesu mwahetukira eYerũsalema.

¹⁴ Omo Hekalũ Yesu mwabana abandu abagũlaya esyonde, nʼesyombũlĩ, nʼehĩrĩkũkũ, nʼabahĩnganĩa bʼesyofranka ĩbanĩkere oko himesa hyabo.

¹⁵ Neryo Yesu mwakokotya enyambĩ yʼomukoba, neryo mwahigira abosĩ bʼeyĩhya oko Hekalũ, haguma nʼesyombũlĩ nʼesyonde. Kandi mũta esyofranka syʼabahĩnganĩa, nʼerikubula ehimesa hyabo.

¹⁶ Kandi mwabũga nʼabagũlaya ehĩrĩkũkũ ati, Mũlũsaye hino hyo muno! Muleke eriyira enyũmba ya Tata wage mo nyũmba yʼakatale.

¹⁷ Abiga ba Yesu mobibuka ngoko kyasakawa kiti, Obũha bwʼenyũmba yawe bũkanyĩta.

¹⁸ Neryo Abayũda mobamũsũbĩrya bati, Ũkatũkangaya ekitiko-tiko kyahi kusangwa ukakola emyatsi eyĩ kwehĩ?

¹⁹ Yesu mwasũbĩryabo ati, Mũhĩmbũle eHekalũ eyĩ, nage nasyahanganĩayo omo biro bisatu.

²⁰ Neryo Abayũda mobabũga bati, Nawe wasyahanganĩayo omo biro bisatu kwehĩ? Mobahĩmba eHekalũ eyĩ omo mĩaka makũmĩ ani nʼendatu!

²¹ Nĩkwa Yesu ahula ehekalũ yʼomubiri wuwe.

²² Neryo omugulu Yesu alũbũkĩbawa oko baholĩ, abiga buwe mobibuka ngoko Yesu abũga ekĩ; neryo mobĩkĩrĩrya Amasako, nʼekĩnywa ekyo Yesu abũga.

Yesu asĩ abundu bosĩ

²³ Omugulu Yesu abya eYerũsalema okwʼĨkiruka, omo biro bikulu ebyo, abangi mobamwĩkĩrĩrya, ibakalangira emĩbĩrĩ ĩkalĩre eyo akola.

²⁴ Nĩkwa Yesu mwatalĩgabo, kusangwa abya asĩ abandu bosĩ.

²⁵ Kusangwa siabya nʼobwaga bwʼeribwirwa omwatsi wʼabandu, kusangwa iye abya asĩ ebiri omo mitima yʼabandu.