Yoane 14 - AMASAKO ABOYTRTRE WA NYAMUHANGA AWAKAHULAWA MO BIBLIA

Yesu ni nzira yʼerĩhĩka uku Tata

¹ Sĩmũhanga-hangaye emitima yenyũ; mwĩkĩrĩraye Nyamuhanga, nage mũnyĩkĩrĩraye.

² Omo nyũmba ya Tata muli byumba bingi byʼerĩĩkalamo. Ngayakokotaya aho wenyũ, kumbe si kwenene, kumbe nabiribabwira.

³ Kandi namayakokotya aho wenyũ, nasyaswasa, nʼeribatwala ewage; neryo imwatoka eribya aho nyiri.

⁴ Kandi mũnasĩ enzira yʼeriya eyo ngaya.

⁵ Toma mwamubwira ati, Mukama, Sĩtwasĩ eyo ukaya, twasyaminya enzira yo tuti kwehĩ?

⁶ Yesu mwamubwira ati, Ĩngye indi nzira, ĩngye indi mwatsi wʼekwenene, ĩngye indi ngebe; sihali mundu ũkahĩka uku Tata ate kwĩngye.

⁷ Kumbe mwabya mũnyasĩ, nga mwabiriminya Tata wage nibya. Nʼerĩtsũka lino mũmwasĩ, kandi mwabirimulolako.

⁸ Fĩlĩpo mwamubwira ati, Mukama, ũtũkangaye Tata, ekyo kyasyatutolera.

⁹ Yesu mwamubwira ati, Nabiribya nenyũ omugulu ungaha, nĩkwa sulitanyiminya kwehĩ Fĩlĩpo? Oyo wamanyilangira iniabirilangira Tata. Busana nakĩ ũkabũga uti, Ũtũkangaye Tata kwehĩ?

¹⁰ Fĩlĩpo, sũlĩkĩrĩraya ko nyimatikene na Tata, na Tata kwʼamatikene ũkwʼĩngye kwehĩ? Ebĩnywa ngababwira sĩndĩbũgabyo omwʼiyihana lyage. Nĩkwa Tata oyumatikene nage akakola emĩbĩrĩ yiwe.

¹¹ Mũnyĩkĩrĩraye ko nyimatikene na Tata, na Tata amatikene ũkwʼĩngye. Kutse mwĩkĩrĩraye busana nʼemĩbĩrĩ ĩyoyene.

¹² Kwenene, kwenene ngababwira, oyũkanyĩkĩrĩraya, emĩbĩrĩ eyo ngakola, asyakolayo nibya; kandi asyakola emĩbĩrĩ eyĩrengĩre eyĩ, kusangwa ngaya uku Tata.

¹³ Kandi nasyakola obuli mwatsi ogo mwasyabũlya omo lĩna lyage, Tata apipawe umu Mugala.

¹⁴ Emyatsi yosĩ mũkabũlaya omo lĩna lyage, nasyakolayo.

Endagane yʼOmũlĩmũ Abũyĩrĩre

¹⁵ Mwamanyanza, mwasyakenga ebihano byage.

¹⁶ Kandi nasyabũlya Tata, naye asyabaha ogundi Mũwatĩkya, Omũlĩmũ wʼomwatsi wʼekwenene iniabya haguma nenyũ kera na kera.

¹⁷ Ekihugo sikiritoka erĩmũkokya, kusangwa sikyemulolako, kutse erimuminya. Nĩkwa ĩnywe mũmwasĩ, kusangwa ĩkere nenyũ, kandi amatikene nenyũ.

¹⁸ Sindiendĩsyabasĩga nga ngũbĩ; nasyaswasa ũkwʼĩnywe.

¹⁹ Enyũma wʼakatambĩ kake ekihugo sikyendisyaswanyilolako, nĩkwa ĩnywe mwasyanyilolako; kusangwa nyiriho, nenyũ mwasyabyaho nibya.

²⁰ Oko kiro ekyo mwasyaminya ko nyimatikene uku Tata wage, nenyũ mumatikene ũkwʼĩngye nage nyimatikene ũkwʼĩnywe.

²¹ Oyuwite ebihano byage, nʼerikengabyo, yo yukanyanza; kandi Tata wage asyanza oyukanyanza; nage nasyamwanza, nasyayĩkangya ukwʼiye.

²² Yũda, oyute Ĩskarĩota, mwamũbũlya ati, Mukama, byamabya biti kwehĩ? uti, wasyayĩkangya ũkwʼĩtwe, ũteyĩkangaya oko kihugo kwehĩ?

²³ Yesu mwamũsũbĩrya ati, Omundu amanyanza asyakenga ekĩnywa kyage. Kandi Tata wage asyamwanza netu twasyamũhĩkako, ĩtwakokotya obwĩkalo bwetu haguma naye.

²⁴ Oyũtanyanzĩre sialikenga ebĩnywa byage. Kandi ekĩnywa ekyo mũkowa si kyage, nĩkwa ni kya Tata oyo wanyituma.

²⁵ Nabiribabwira emyatsi eyĩ omugulu nyikine haguma nenyũ.

²⁶ Nĩkwa Omũwatĩkya, Omũlĩmũ Abũyĩrĩre, oyo Tata asyatuma omo lĩna lyage, iye akandisyabakangĩrĩrya emyatsi yosĩ, kandi asyabĩbũkya emyatsi yosĩ eyo nababwira.

²⁷ Obuholo ngabasĩgĩra, ngabaha Obuholo bwage. Ngabahabo, butsira ngʼekihugo ko kikaha. Sĩmũhangahangaye emitima yenyũ, kandi simubahe.

²⁸ Momowa ngababwira nyiti, Ngagenda, kandi nasyaswasa ũkwʼĩnywe. Kumbe mulwe mũnyanzĩre, nga mwabiritsema, kusangwa ngaya uku Tata; kusangwa andengĩre.

²⁹ Lino nabiribabwira ebĩ bite byahĩka, neryo omugulu byasyahĩka, imwatoka erĩkĩrĩrya.

³⁰ Sindiendĩsyabũga nenyũ kandi bingi, kusangwa omũtabalĩ wʼekihugo akahĩka, kandi siawite ehamũlĩ ũkwʼĩngye.

³¹ Ngoko Tata anyihana, ko ngakola nyitya, ekihugo kitoke eriminya ko nyanzĩre Tata.