Yoane 13 - AMASAKO ABOYTRTRE WA NYAMUHANGA AWAKAHULAWA MO BIBLIA

Yesu akeraya ebisando byʼabiga buwe

¹ Nĩkwa embere wʼEbiro Bikulu byʼErikiruka, Yesu mwaminya kwʼendambĩ yiwe yamabĩhĩka eyʼerĩlũa omo kihugo kino, nʼeriya eyiri Ĩse. Abya iniabirianza abuwe ababya omo kihugo, kandi mwanzabo erĩhĩka oko ndũlĩ.

² Neryo babere bakalya omwʼĩgologolo, Satanĩ yabya ĩyabĩrĩhĩra omo mutima wa Yũda Ĩskarĩota mugala wa Sĩmonĩ erihotera Yesu.

³ Kandi Yesu abya asĩ kwʼĨse abĩrĩhĩra emyatsi yosĩ yʼomo hamũlĩ yiwe. Kandi abya asĩ kwʼalũa ewa Nyamuhanga iniakasyaya ewa Nyamuhanga.

⁴ Neryo Yesu mwahangana aho balira. Neryo mwambula olundi lukimba, neryo mwĩmya ekĩsangũlĩryo, neryo mwayihangakyo.

⁵ Neryo Yesu mũta amagetsi okwʼĩtũba, neryo mwatsũka erĩnabya ebisando byʼabiga, nʼerisangulabyo omo kĩsangũlĩryo ekyo abya ayĩhangĩre.

⁶ Neryo mwahĩka uku Sĩmonĩ Petero. Naye mwamubwira ati, Mukama, ũkanabaya ebisando byage kwehĩ?

⁷ Yesu mwamũsũbĩrya ati, Ekyo ngakola sĩwasĩkyo lino, nĩkwa wasyaminyakyo enyũma.

⁸ Petero mwamubwira ati, Siwendĩsyanabya ebisando byage na kera. Yesu mwamũsũbĩrya ati, Namatendĩnabya ebisando byawe, isuli nʼobusangi haguma nage.

⁹ Sĩmonĩ Petero mwamubwira ati, Mukama, sũnabaye ebisando byage, ĩbyobyene! Nĩkwa ũnabaye ebyala byage nʼomutwe wage nibya!

¹⁰ Yesu mwamubwira ati, Oyo wabirinaba erĩre, nĩkwa atolere erinaba oko bisando biwe bisa. Nenyũ mwerĩre, nĩkwa butsira ĩnywe bosĩ.

¹¹ Kusangwa Yesu abya asĩ oyukandisyamuhotera. Kyaleka ĩnĩabũga ati, Sĩmwerĩre ĩnywe bosĩ.

¹² Neryo abere abĩnabya ebisando byabo, neryo mwaswĩkala oko mesa. Neryo mwabũlyabo ati, Mwanamaminya ekyo ngabibakolera kwehĩ?

¹³ Mukanyahula mo Mũkangĩrĩrya nʼomukama, mũkabũga ndeke, kusangwa ĩngye ko nyine nyitya,

¹⁴ ngye indi Mukama nʼOmũkangĩrĩrya, neryo nabĩrĩbanabya oko bisando byenyũ. Nenyũ mutolere ĩmwanabanĩa oko bisando byenyũ.

¹⁵ Kusangwa nabiribaha ekĩmĩnyĩsyo, imwakola ngoko nabiribakolera.

¹⁶ Kwenene, kwenene ngabũga nenyũ, omugombe sialengĩre omukama wuwe, nʼomukwenda sialengĩre oyuliamutuma.

¹⁷ Mwamaminya emyatsi eyĩ, muli nʼobutseme mwamakolayo.

¹⁸ Sindibahula ĩnywe bosĩ. Nyĩnasĩ abo nayisoga. Nĩkwa ni busana nʼerĩberererya Amasako, awakabũga ati, Oyukalya akalyo kage, abĩrĩnyĩlolya kʼomugongo.

¹⁹ Ngababwira lino, ebĩ bite byahĩka, neryo ekiro byasyahĩka, imwatoka erĩkĩrĩrya ĩngye kwʼindi ye.

²⁰ Kwenene, kwenene ngababwira, oyũkakokaya omundu oyo ngatuma, iniakanyĩkokaya; nʼoyũkanyĩkokaya, akakokaya oyo wanyituma.

Yesu akaminyerera erihoterwa liwe

²¹ Neryo Yesu abere abĩbũga ebĩ, mwasũsũmana omo mutima mwatũlago ati, Kwenene, kwenene ngababwira nyiti, Omuguma wʼũkwʼĩnywe asyanyihotera.

²² Abiga mobasamalirana ĩsĩbasĩ ngʼakahulandi.

²³ Omuguma gʼoko biga oyo Yesu abya anzĩre mwabya akegemera oko kĩkũba kya Yesu.

²⁴ Neryo Sĩmonĩ Petero mwamũkoherya ati, Utubwire ngʼakahulandi.

²⁵ Naye, kusangwa abya akegemera oko kĩkũba kya Yesu, mwamũbũlya ati, Mukama, nindi kwehĩ?

²⁶ Yesu mwamũsũbĩrya ati, Yoyo ngandĩkolerya ekitole kyʼomo kibindi nʼerimuhakyo. Neryo Yesu mwakolerya ekitole kyʼomo kibindi mwahakyo Yũda, omugala wa Ĩskarĩota.

²⁷ Neryo Yũda abere abĩmya ekitole ekyo, Satanĩ mwingira omwisi wuwe. Yesu mwamubwira ati, Ekyo ukandikola, ukolekyo lũba.

²⁸ Nĩkwa sihabya mundu oko mesa oyo waminya nga ni mwatsi wahi aleka Yesu iniamubwira atya.

²⁹ Abandi baganĩraya bati kusangwa Yũda abya nʼengunza yʼesyofranka, Yesu mwamubwira ati, agule ebindu ebitutolere busana nʼeBiro Bikulu; kutse ahe ekindu oko bera.

³⁰ Neryo Yũda abere abĩĩmya ekitole ekyo, mwahuluka lũba. Kandi ibwamabihumbera.

Eritegeka lihya-lihya

³¹ Neryo omugulu Yũda ahuluka, Yesu mwabũga ati, Lino Omugala wʼOmundu amabana olukengerwa, kandi Nyamuhanga amabana olukengerwa omwisi wuwe.

³² Neryo Nyamuhanga amabana olukengerwa omwisi wuwe, Nyamuhanga ĩyowene asyabanira Omugala wʼOmundu yʼolukengerwa. Kandi asyamubanira olukengerwa neryo-neryo.

³³ Abana balere, indi haguma nenyũ katambĩ kake. Mwasyanyisonda-sonda, neryo ngoko nabwira Abayũda, nenyũ ngababwira nyiti, Eyo ngaya Simwangatoka erĩhĩkayo.

³⁴ Ngabaha ekihano kihyakihya nyiti, Mwanzane. Ngoko nabiribanza, nenyũ mwanzane mutya.

³⁵ Neryo mwamabya nʼolwanzo, omuguma busana nʼogundi, abandu bosĩ basyaminya ko muli biga bage,

Yesu akaminyerera eriyigana lya Petero

³⁶ Sĩmonĩ Petero mwabũlya Yesu ati, Mukama, ukayahi kwehĩ? Yesu mwamũsũbĩrya ati, Eyo ngaya siwangatoka erinyikwama lino; nĩkwa wasyanyikwama bolo.

³⁷ Petero mwamũbũlya ati, Mukama, busana nakĩ sinangatoka erikukwama lino-lino kwehĩ? Nasyasiga engebe yage busana nawe.

³⁸ Yesu mwamũsũbĩrya ati, Wasyasiga engebe yawe busana nage kwehĩ? Kwenene, kwenene ngabũga nawe, engoko-lume siyendibika utewanyigana ngendo ĩsatu.