Yeremĩa 9 - AMASAKO ABOYTRTRE WA NYAMUHANGA AWAKAHULAWA MO BIBLIA

Eririra busana na Ĩsraelĩ

¹ Kumbe omutwe wage ni magetsi, nʼameso wage eribya ngũnũnũko yʼemĩsonĩa, neryo inatoka eririra omo musibo nʼomo kiro busana nʼabandu bĩtawa bʼomwali wʼabandu bage!

² Kumbe ngwite obugotsero bwʼabagendĩ omo mbwarara, inatoka erĩsĩga abandu bage, nʼerĩlũa kubo! Kusangwa abosĩ nĩ basĩngĩrĩ, endeko yʼabandu bagobya.

³ Bakakondomaya olulimi lwabo ngʼobuta bwabo, amabehĩ nʼebite kwenene biri omo kihugo. Kusangwa abakakwamirira ebibi oko bibi, kandi sĩbanyasĩ, Omwami Mukulu atya.

⁴ Mũyĩrebaye, obuli mundu na mũlĩkyabo, kandi Simuyiketere mugala wenyũ nomo angabyandi, kusangwa obuli mugala wabo nĩ mũsĩngũlĩ, nʼobuli mũlĩkyabo akagala-ganda busana nʼerirega ogundi.

⁵ Nabo bakateba obuli mundu mũlĩkyabo, kutse sĩalĩbũga kwenene. Babĩrĩyĩgĩsya omo lulimi lwabo erĩbũga amabehĩ. Bakayĩlũhaya okwʼikola ebibi.

⁶ Omwami Mukulu ati, Ahʼerĩĩkala lyawe hali omo katĩkatĩ kʼeriteba. Busana nʼeriteba bakagana erinyiminya.

⁷ Busana nʼekyo Omwami Mukulu ati, Lebaya, nasyayayũkyabo nʼerirengabo. Kusangwa nangaswakola nyiti busana nʼomwali wʼabandu bage kwehĩ?

⁸ Olulimi lwabo ni musoha wʼerĩĩta. Lũkabũga amatebo. Omundu akabũga na mũlĩkyabo ebyʼobuholo omo buno buwe, nĩkwa omo mutima wuwe akamũlĩmbaya.

⁹ Omwami Mukulu ati, Sinangasuyirabo busana nʼemyatsi eyĩ kwehĩ? Omutima wage syangayĩkĩsĩrya busana nʼekihanda ngʼekĩ kwehĩ?

¹⁰ Nasyalira nʼerĩsũsũmana busana nʼebitwa, na busana nʼamalĩsĩryo agʼomo mbwarara nasyayira ekiriro, kusangwa byabĩrĩhĩrwa mo kĩma, kikaleka ihatalaba mundu. Kutse abandu sibetoka erĩowa eriama lyʼende. Esyonyonyũ syʼekyanya nʼesyonyama syabirisaga, syabirigenda.

¹¹ Kandi nasyayira eYerũsalema mo kilundo kyʼomulala ahʼerĩĩkala hʼesyoboha. Nage nasyayira emĩyĩ yʼeYũda mo kĩma, isihali ndũlanĩ.

¹² Omundu wʼamenge nindi, atoke eriminya ekĩ kwehĩ? Kandi nindi oyo wabiribwirwa omo buno bwʼomwami Mukulu kwehĩ? Atoke erĩtũlago. Busana nakĩ ekihugo kyabiritsanda nʼeriyirwa ngʼembwarara, kikaleka omundu atalaba mukyo kwehĩ?

¹³ Kandi Omwami Mukulu ati, Kusangwa babirireka omugambo wage ogo nahĩra embere syabo, sibetakenga omulenge wage, kutse erirendera mugo.

¹⁴ Nĩkwa babirirendera omo butsibu bwʼemitima yabo, nʼerikwama Baalĩ ebyo abotata wabo bakangĩrĩrayabo.

¹⁵ Busana nʼekyo Omwami Mukulu wʼemilondo, Nyamuhanga wa Ĩsraelĩ ati, Lebaya, nasyalĩsyabo, ba bandu aba, omo biti bĩkalĩhĩre, nʼerĩnywĩsyabo amagetsi wʼobuti.

¹⁶ Nasyapanza-panzirabo omo katĩkatĩ kʼebihanda ebyo batasĩ kutse abotata wabo. Kandi nasyatuma omũyalĩ enyũma kubo, erĩhĩka aho nasyahereryabo.

¹⁷ Omwami Mukulu wʼemilondo ati, Mũganĩraye, mubirikire abakalĩ abakalira, base. Mubirikire abakalĩ bʼekiriro, nabo base!

¹⁸ Banguhe, erĩsũsũmana busana netu, ameso wetu atoge mwʼemĩsonĩa, nʼebĩkoheryo byetu bisende mwʼamagetsi.

¹⁹ Kusangwa omulenge wʼekiriro akogũbawa erĩlũa eSĩonĩ. Twamahera tuti! Twamahemulwa kutsibu kusangwa twabĩrĩsĩga ekitaka, kusangwa babĩrĩterya amanyũmba wetu.

²⁰ Nĩkwa ĩnywe bakalĩ, mowe ekĩnywa kyʼOmwami Mukulu nʼokũtũ kwenyũ kwangirire ekĩnywa kyʼobuno buwe. Mũkangĩrĩraye abali benyũ eririra, nʼobuli mundu akangĩrĩraye mũlĩkyabo erĩsũsũmana.

²¹ Kusangwa oluholo lwabirihetukira omo madĩrĩsa wetu. Lwabiriingira omo bikali byetu erĩĩta abana betu omo syonzira, nʼabalwana betu omo bibuga.

²² Ũbũge uti, Omwami Mukulu ati, Ebĩnda byʼabandu byasyawa ngʼebise omo malima, kandi ngʼerĩkũndĩ ryʼengano enyũma wʼomũgesĩ. Isihali omundu wasyakumakumabyo.

²³ Omwami Mukulu ati, Omundu wʼamenge siayipipe busana nʼamenge wuwe, kutse owʼamaka siayipipe busana nʼamaka wuwe, owʼebindu siayipipe busana nʼobuteke buwe,

²⁴ nĩkwa oyukayihalamba, ayihalambe Ũmwʼekĩ, ati akowa nʼerinyiminya ko nyiri Mwami Mukulu, oyukakola ebibuya nʼerĩbanza libuya, nʼeritunganene omo kihugo. Kusangwa Omwami Mukulu ati, Ngatsema omo myatsi eyĩ.

²⁵ Omwami Mukulu ati, Lebaya, ebiro bikasa, nasyasuyira abosĩ babanĩbawa nĩkwa sibabwene:

²⁶ EMĩsĩrĩ, nʼeYũda, nʼeEdomũ, nʼabana ba Amonĩ, nʼeMoabũ, nʼabosĩ abakatũa esyonzwiri oko mbũmo syabo, abĩkere omo mbwarara. Kusangwa ebihanda byosĩ sibibwene, nʼekĩtũnga kyosĩ kyʼeĨsraelĩ sikibwene omo mutima.