Yeremĩa 7 - AMASAKO ABOYTRTRE WA NYAMUHANGA AWAKAHULAWA MO BIBLIA

Babindule esyonzira nʼemĩbĩrĩ yabo

¹ Ekĩnywa ekyahĩka uku Yeremĩa kĩkalũa oko Mwami Mukulu kiti,

² Uhangane oko lũkyo lwʼenyũmba yʼOmwami Mukulu, ũkanganayeho ekĩnywa ekĩ, uti, Muhulikirire ekĩnywa kyʼOmwami Mukulu, ĩnywe bosĩ bʼeYũda, abakingira omo syongyo esĩ erĩramya Omwami Mukulu.

³ Omwami Mukulu wʼemilondo, Nyamuhanga wa Ĩsraelĩ ati, Mũsũbaye esyonzira syenyũ nʼemĩbĩrĩ yenyũ, neryo nage nasyabĩkalya omo mwanya ono.

⁴ Simuyiketere ebĩnywa byʼeriteba muti, Eyĩ nĩ Hekalũ yʼOmwami Mukulu, eHekalũ yʼOmwami Mukulu, eHekalũ yʼOmwami Mukulu.

⁵ Kusangwa mwamatũngananĩa esyonzira syenyũ syo ndeke, nʼemĩbĩrĩ yenyũ. Mwamatswera erĩbanza lyo ndeke omundu na mũlĩkyabo,

⁶ mwamatendĩnũbya omũgendĩ, nʼengũbĩ, nʼomũkwakalĩ, kutse erĩtendĩũta omusasi ate ko musango go hano, kutse erikwama esindi nyamuhanga okwʼihera lyenyũ.

⁷ Neryo nasyabĩkalya omo mwanya oyũ, omo kihugo ekyo naha abotata wenyũ, erĩtsũka kera, nʼerĩhĩka na kera na kera.

⁸ Mũlebaye, mukayiketera emyatsi yʼeriteba, eyitebaletera ndũndĩ.

⁹ Mwasyĩba kwehĩ, nʼerĩĩta, nʼerĩsĩngĩra, nʼerĩlahĩrya nʼamabehĩ, nʼeriherera Baalĩ yʼobukwa, nʼerikwama esindi nyamuhanga esyo mũtasĩ,

¹⁰ neryo mukasa nʼerihangana embere syage omo nyũmba eno, eyikahulawa oko lĩna lyage muti, Twabĩrĩlamĩbwa! Imwatoka erikola esyonye esĩ syosĩ kwehĩ?

¹¹ Enyũmba eyĩ eyikahulawa oko lĩna lyage, yabiribya mwangalũ wʼabanyeyĩ omo meso wenyũ kwehĩ? Lebaya, ĩngye ĩngyowene nabirilangirakyo, Omwami Mukulu atya.

¹² Nĩkwa lino muye aho wage ahabya eSĩlo aho natsũka erĩĩkalya erĩna lyage, mũlebaye ekyo nabirikolaho busana nʼebibi byʼabandu bage Ĩsraelĩ.

¹³ Na lino, Omwami Mukulu ati, Kusangwa mwabirikola emĩbĩrĩ yosĩ eyĩ, nage monabũga nenyũ, eribuka omo ngyakya-ngyakya nʼerĩbũga, nĩkwa momũtowa, nage monababirikira, nĩkwa momutitaba.

¹⁴ Busana nʼekyo nasyakola enyũmba eno eyikahulawa oko lĩna lyage eyo mukayiketera, nʼaho nabaha nʼabotata wenyũ, ngoko nakola eSĩlo.

¹⁵ Nasyabagusa hali oko meso wage, ngoko nabirigusa abagala benyũ bosĩ, abana bosĩ ba Efũraĩmũ.

¹⁶ Neryo Yeremĩa, susabire abandu aba, kutse subatandire omulenge kutse erisabirabo, kutse Sunyihatikane busana nabo, kusangwa sĩndĩendĩsyakowa.

¹⁷ Sũlangĩre ebyo bakakola omo mĩyĩ ya Yũda nʼomo syonzira syʼeYerũsalema kwehĩ?

¹⁸ Abana bakakuma-kuma esyongwĩ, nʼabotata wabo bakakaya omuliro, nʼabakalĩ bakatsumba eyĩsyano, erĩkokotya ehitole busana nʼomwami-kalĩ wʼelubula. Kandi bakũtũlĩra, amahere wʼerĩpũlya oko Sindi nyamuhanga, batoke erinyipona.

¹⁹ Omwami Mukulu ati, Nĩ ngye bakapona kwehĩ? Sibeyipona ĩbobene, nʼeriyihemula kwehĩ?

²⁰ Busana nʼekyo Omukama Omwami Mukulu ati, Lebaya, erihitana nʼeriagalirwa lyage lyasyũtũlĩrwa hano, oko bandu, nʼoko syonyama, nʼoko miti yʼomolĩ, nʼoko bĩgũma byʼekitaka. Naho hasyahya, sihendĩsyalĩma.

²¹ Omwami Mukulu wʼemilondo, Nyamuhanga wa Ĩsraelĩ ati, Mutomekere amahere wenyũ wʼerĩokererya oko syohongo syenyũ, mulye esĩswĩ.

²² Kusangwa mondabũga nʼabotata wenyũ kutse mondahanabo oko kiro nalũsayabo omo kihugo kyʼeMĩsĩrĩ, busana nʼamahere wʼerĩokererya nʼesyohongo.

²³ Nĩkwa omwatsi muguma ogo nahanabo nyiti, Muhulikirire omulenge wage, nage nasyabya Nyamuhanga wenyũ, nenyũ mwasyabya bandu bage. Kandi mwasyaiendera omo nzira syosĩ esyo ngabahamulira, imwatoka eribana obutseme.

²⁴ Nĩkwa mobatowa, kutse eritega okũtũ kwabo, nĩkwa mobalendera omo syombĩta syabo nʼomo butsibu bwʼomutima mubi wabo, mobasuba enyũma, butsira embere.

²⁵ Erĩtsũka ekiro abotata wenyũ balũa omo kihugo kyʼeMĩsĩrĩ erĩhĩka mũnabwĩre, nabiribatumako abagombe bage bosĩ abamĩnyererĩ, iningahangana obuli kiro omo ngyakya-ngyakya eritumabo.

²⁶ Nĩkwa mobatanyowa, kutse eritega okũtũ kwabo, nĩkwa mobakongomĩa engoto yabo. Mobakola ebibi kwilaba abotata wabo.

²⁷ Nawe Yeremĩa, wasyabwirabo ebĩnywa ebĩ byosĩ, nĩkwa sibendisyakuhulikirira. Wasyabirikirabo nibya, nĩkwa sibendisyakwitaba.

²⁸ Kandi wasyabwirabo uti, Ekĩ kyo kihanda ekitahulikirira omulenge wʼOmwami Mukulu Nyamuhanga wabo, kutse erĩrĩga erikungwa. Ekwenene yabirihola, Sibakyahulayo.

²⁹ Ũtwe esyonzwiri syawe, ugusesyo, uyalirire oko bitwa ebite kokĩ, kusangwa Omwami Mukulu abirigana nʼerĩsĩganĩa ekihanda ekyamũhĩtanaya.

³⁰ Kusangwa Omwami Mukulu ati, Abana ba Yũda babirikola ekibi omo meso wage. Babĩrĩhĩra ebyʼesyonye omo nyũmba eyikahulawa oko lĩna lyage, erĩtsandyayo.

³¹ Kandi babĩrĩhĩmba ahayĩsũmbĩre hʼeTofetĩ, ebiri omo musya wʼomugala wa Hĩnomũ, erĩhĩsya abagala nʼabali omo muliro, ekyo ndahamula, kutse mokĩtahĩka omo bũlengekanĩa bwage.

³² Neryo Omwami Mukulu ati, Lero, ebiro bikasa sikyendisyaswahulwa mo Tofetĩ, kutse omusya wʼomugala wa Hĩnomũ, nĩkwa kyasyahulwa mo musya wʼeRĩsĩnzĩro kusangwa basyata eTofetĩ, kusangwa aho omwanya asyahula owʼerĩĩta.

³³ Ebĩnda byʼabandu aba byasyabya kalyo busana nʼesyonyonyũ syʼomo kyanya, na busana nʼesyonyama syʼahisi. Kandi sihali oyo wasyabingasyo.

³⁴ Neryo nasyahũnerya omo mĩyĩ yʼeYũda nʼomo syonzira syʼeYerũsalema, omulenge wʼeritsanga, nʼomulenge wʼobutseme, nʼomulenge wʼĩba wʼomũherũkĩ, nʼomulenge wʼomũherũkĩ, kusangwa ekihugo kyasyabya mulala.