Yeremĩa 52 - AMASAKO ABOYTRTRE WA NYAMUHANGA AWAKAHULAWA MO BIBLIA

Erihona lya Zedekĩa nʼerihya lyʼeYerũsalema

¹ Zedekĩa abya wʼemyaka makũmĩ abiri nʼomuguma omugulu atsũka eribya mwami, neryo mwatabala emyaka erĩkũmĩ nʼomuguma eYerũsalema. Erĩna lya koyo wuwe lyabya Hamũtalĩ mwali wa Yeremĩa wʼeLĩbũna.

² Naye mwakola ekibi omo meso wʼOmwami Mukulu ngʼebyosĩ ebyo Yehoyakĩmũ akola.

³ Kusangwa busana nʼemyatsi eyĩ, erihitana lyʼOmwami Mukulu molyahĩka eYerũsalema nʼeYũdea, erĩhĩka aho agusirabo erĩlũa embere siwe. Na Zedekĩa mwahona oko mwami wʼeBabelĩ.

⁴ Neryo oko mwaka wʼomwenda wʼeritabala liwe, oko mukera wʼerĩkũmĩ, nʼoko kiro kyʼerĩkũmĩ kyʼomukera oyo, Nebũkadeneza omwami wʼeBabelĩ mwasa, iye nʼomulondo wuwe gosĩ, erilwa nʼeYerũsalema, mwahanda endwĩro yoko; kandi mwahĩmba olũhĩmbo lwʼeribambiraho erĩtĩmbaho.

⁵ Litya omũyĩ oyo mwagoterwa erĩhĩka oko mwaka wʼerĩkũmĩ nʼomuguma wʼOmwami Zedekĩa.

⁶ Oko mukera wʼakani, nʼoko kiro kyʼomwenda kyʼomukera, enzala moyakala omo mũyĩ, isihali akalyo kʼabandu bʼekihugo.

⁷ Neryo mobatula ekyũna omo lũhĩmbo lwʼomũyĩ, nʼabalume bosĩ bʼamalwa mobatibita, mobahuluka bakalũa omo mũyĩ omo kiro omo nzira yʼolũkyo omo katĩkatĩ kʼesyombĩmbo ĩbĩrĩ, olwabya hakũhĩ nʼeririma lyʼOmwami, neryo Abakaldea babya batĩmbĩre oko mũyĩ. Nabo mobalaba omo nzira yʼeAraba.

⁸ Nĩkwa abasĩrĩkanĩ bʼAbakaldea mobakwama omwami mobahĩka uku Zedekĩa omo bwerere bwʼeYerĩko, nʼomulondo wuwe gosĩ wʼabasĩrĩkanĩ iniabiripanzikana nʼerĩmũsĩga.

⁹ Neryo mobahamba omwami, mobamutwala oko mwami wʼeBabelĩ eRĩbla omo kihugo kyʼeHamatĩ, naye mwamutswerera aho.

¹⁰ Nʼomwami wʼeBabelĩ mwĩtĩra abagala ba Zedekĩa omo meso wuwe. Mwĩtĩra abanya-mwami bosĩ bʼeYũda nibya eRĩbla.

¹¹ Kandi mwatobongola ameso wa Zedekĩa. Nʼomwami wʼeBabelĩ mwamuboha omo mĩrĩkĩ yʼomulinga, mwamutwala eBabelĩ, kandi mwamũhĩra omo mũlĩkĩ erĩhĩka okwʼihola liwe.

¹² Neryo oko mukera wʼakatanu, oko kiro kyʼerĩkũmĩ kyʼomukera, oyo ni mwaka wʼerĩkũmĩ nʼomwenda wʼeritabala lyʼOmwami Nebũkadeneza omwami wʼeBabelĩ, Nebũzaradanĩ omukulu wʼabateya, oyo wabya omo mũbĩrĩ wʼOmwami wʼeBabelĩ, mwahĩka eYerũsalema.

¹³ Naye mwahĩsya enyũmba yʼOmwami Mukulu, nʼenyũmba yʼOmwami, nʼamanyũmba gosĩ wʼeYerũsalema, obuli nyũmba nene, mwahĩsyago omo muliro.

¹⁴ Nʼomulondo gosĩ wʼabasĩrĩkanĩ bʼAbakaldea, owabya haguma nʼomukulu wʼabateya mobasambula esyombĩmbo syosĩ syʼeYerũsalema erĩtĩmba ehosĩ.

¹⁵ Neryo Nebũzaradanĩ omukulu wʼabateya mwatwalabo mo banyegwa abera bʼabandu nʼabasĩgalira bʼabandu abasĩgawa omo mũyĩ, nʼabandu abatswa, bakaya oko mwami wʼeBabelĩ, nʼabanyima-nyima abasĩgalira.

¹⁶ Nĩkwa Nebũzaradanĩ omukulu wʼabateya mwasĩga ababya bera kutsibu eribya abakolerĩ nʼabalĩmĩ.

¹⁷ Nʼesyondũyĩ syʼomulinga esyabya syʼenyũmba yʼOmwami Mukulu nʼehibuno, nʼengetsi yʼomulinga ebyabya omo nyũmba yʼOmwami Mukulu, Abakaldea mobatsũtsangabyo mo bitswe-bitswe, mobahekera omulinga gosĩ wamo eBabelĩ,

¹⁸ Nʼesyonyungu nibya, nʼesyoruho, nʼesyorũpanĩ, nʼebibindi, nʼemyũko, nʼesyonyungu syosĩ syʼomulinga esyo babya bakakolamo, mobahekabyo.

¹⁹ Nʼesyondehĩ, nʼebĩbĩrĩryo byʼomuliro, nʼebibindi, nʼesyonyungu, nʼemitagala yʼesyotala, nʼemyũko, nʼeminaga, eyabya yʼesyamagetsi esĩtũkwĩre nʼebyabya byʼekĩtsĩpa ekĩtũkwĩre, omukulu wʼabateya mwahekabyo.

²⁰ Esyondũyĩ ĩbĩrĩ, engetsi nguma, nʼesyonume syʼomulinga ĩkũmĩ nʼĩbĩrĩ esyabya omwisi wʼakabuno kayo, nʼebĩhambĩrĩrĩ ebyo mwami Solomono akokotaya busana nʼenyũmba yʼOmwami Mukulu—omulinga wʼesyonyungu esĩ syosĩ abya alengĩre kĩlo.

²¹ Kandi busana nʼesyondũyĩ, obuli bwʼendũyĩ nguma bwabya metere 8, nʼerĩtĩmba lyayo lyabya metere 6, nʼobunene bwayo ini minwe ĩnĩ, nʼekyũna omo katĩkatĩ kayo.

²² Nʼendata wayo habya embĩta yʼomulinga nʼobuli bwʼembĩta nguma bwabya metere 2, haguma nʼerĩsũgwa nʼamakomamanga oko mutwe erĩtĩmba kuyo, ebyosĩ byʼomulinga. Nʼendũyĩ yʼakabiri ko yanabya yitya nʼamakomamanga.

²³ Kandi habya amakomamanga amakũmĩ mwenda nʼendatu (96) oko bihande byayo. Amakomamanga gosĩ abya erĩgana liguma (100) okwʼĩsũgwa erĩtĩmbaho.

²⁴ Nʼomukulu wʼabateya mwĩmya Seraya omũhererĩ mukulu, na Zefania, omũhererĩ wʼakabiri, nʼabateya basatu bʼolũkyo.

²⁵ Nʼomo mũyĩ mwĩmya omukulu muguma oyo wabya mwĩmanĩrĩ wʼabandu bʼamalwa, nʼabandu balinda ukwʼabo bahana omwami, ababanika omo mũyĩ. Nʼomũhandĩkĩ wʼomukulu wʼabasĩrĩkanĩ oyo wasaka abandu bʼekihugo, nʼabandu makũmĩ ndatu abʼekihugo, ababanika omo katĩkatĩ kʼomũyĩ.

²⁶ Na Nebũzaradanĩ omukulu wʼabateya mwĩmyabo mwaletabo oko mwami wʼeBabelĩ aho eRĩbla.

²⁷ Nʼomwami wʼeBabelĩ mwĩtabo, mwĩtĩrabo eRĩbla omo kihugo kyʼeHamatĩ. Litya Yũda mwahũngwa mo banyegwa erĩlũa omo kihugo kiwe.

²⁸ Aba bo bandu abo Nebũkadeneza aheka mo banyegwa: omo mwaka wʼakalinda Abayũda elfu ĩsatu nʼamakũmĩ abiri nʼabasatu (3,023).

²⁹ Oko mwaka wʼerĩkũmĩ nʼomunani wa Nebũkadeneza mwaheka abandu amagana munani nʼamakũmĩ asatu nʼababiri (832) mo banyegwa bakalũa eYerũsalema.

³⁰ Nʼomo mwaka wʼamakũmĩ abiri nʼeyĩsatu wa Nebũkadeneza, Nebũzaradanĩ omukulu wʼabateya mwaheka omo Bayũda abandu magana alinda nʼamakũmĩ ani nʼabatanu (745) mo banyegwa. Abandu bosĩ babya elfu ĩnĩ nʼamagana ndatu (4,600).

³¹ Neryo oko mwaka wʼamakũmĩ asatu nʼeyirinda wʼobunyegwa bwa Yehoyakĩnĩ omwami wʼeYũda, oko mukera wʼerĩkũmĩ nʼeyĩbĩrĩ, oko kiro kyʼamakũmĩ abiri nʼebitanu kyʼomukera, Ebĩrĩmerodakĩ omwami wʼeBabelĩ omo mwaka wʼerĩmbere wʼeritabala liwe, mwaganyira Yehoyakĩnĩ, omwami wʼeYũda, mwamũlũsya omo mũlĩkĩ.

³² Kandi mwabũga naye ndeke, mwahĩra ekĩtũmbĩ kiwe kyʼobwami endata oko bĩtũmbĩ byʼabami ababya haguma naye aho eBabelĩ.

³³ Litya Yehoyakĩnĩ mwabindula esyongĩmba siwe syʼomũlĩkĩ, neryo mwabya akalya akalyo kuwe embere syʼOmwami ebiro byosĩ oko biro byosĩ byʼeribyaho liwe.

³⁴ Na busana nʼerĩgabo liwe, erĩgabo lyʼobutusa mwahabwalyo nʼomwami wʼeBabelĩ, obuli kiro mwahabwa erĩgabo erĩhĩka oko kiro kyʼerihola liwe.