Yeremĩa 50 - AMASAKO ABOYTRTRE WA NYAMUHANGA AWAKAHULAWA MO BIBLIA

Erihera lyʼeBabelĩ nʼerilama lya Ĩsraelĩ

¹ Ekĩnywa ekyo Mwami Mukulu abũga oko mũmĩnyererĩ Yeremĩa busana nʼeBabelĩ na busana nʼekihugo kyʼAbakaldea.

² Mũtũlego omo katĩkatĩ kʼebihanda, mũbũge, mũtũlego, muhanganaye ebendera. Sĩmũbĩsego, muti, Babelĩ abĩrĩhũngwa, Belĩ abirihemuka, Merodakĩ abirikonongoka. Esyosanamu syako syabirihemuka, esyosanamu syako syabirikonongoka.

³ Kusangwa ekihanda ekĩkalũa elutambi lwʼendata kikalwa nako, nakyo kikayira ekihugo kyago mo kindu kyʼesyonye, isihali mundu Wasyĩkala mukyo. Abandu nʼesyonyama babiritibita, babiriyigendera!

⁴ Omwami Mukulu ati, Omo biro ebyo nʼoko mugulu oyo, abandu ba Ĩsraelĩ basyasa, ibo nʼabana ba Yũda haguma. Basyalolya omo nzira yabo bakalira, kandi basyasonda-sonda Omwami Mukulu Nyamuhanga wabo.

⁵ Basyabũlya busana nʼenzira yʼeSĩonĩ nʼamũsũ wabo asyalolya eyo. Basyasa bati bamatane nʼOmwami Mukulu omo ndagano ya kera na kera, eyitendisyibiriranwa.

⁶ Abandu bage babiribya mbũlĩ sitere. Abalĩsya babo babĩrĩtalyabo. Babĩrĩtalĩryabo omo bitwa. Babirigenda oko kitwa nʼoko katwa. Babiribirirwa ahʼeriluhukira.

⁷ Abosĩ ababanabo mobalyabo. Esyonzĩgũ syabo mosyabũga siti, Situli nʼolubanza, kusangwa babĩrĩhalya oko Mwami Mukulu oyuli ahʼerĩĩkala lyʼeritunganene, Iye Omwami Mukulu, amaha wʼabotata wabo.

⁸ Mutibite erĩlũa eBabelĩ, muhulukire omo kihugo kyʼAbakaldea, mubye ngʼesyombaya embere wʼebĩhyo.

⁹ Kusangwa lebaya, nasyahanganĩa nʼerireta oko Babelĩ emilondo yʼebihanda binene ebĩkalũa omo kihugo kyʼelutambi lwʼendata. Nʼabo basyateka milondo yʼerilwa nago. Nʼaho asyahambwa mo munyegwa. Emisoha yabo yasyabya ngʼeyʼembangĩ, eyitesubula busa.

¹⁰ Omwami Mukulu ati, EKaldea kyasyabya bunyegwa, nʼabosĩ abakanyegakyo basyalya bingaho.

¹¹ Abandu bʼeBabelĩ, momwahũnga ekihanda kyage. Nomo mũnatsemĩre nʼeritsanga, mukalendera ngʼenyana eyĩkahũmba engano, kutse ngʼesabayĩrĩ eyikama.

¹² Koyo wenyũ asyahemuka kutsibu. Nʼoyo wababuta asyabya nʼesĩsonĩ. Lebaya, asyabya owʼenyũma-nyũma wʼebihanda, asyabya mbwarara, nʼekitaka kyũmĩre, nʼolukurutsu.

¹³ Busana nʼerihitana lyʼOmwami Mukulu sikyendĩsyĩkalwamo nʼomundu, nĩkwa kyasyabya mulala musa. Nʼoyukalaba hakũhĩ nʼeBabelĩ asyasweka, asyasyolya busana nʼebironda byako byosĩ.

¹⁴ Mũyĩtegekanaye busana nʼerilwa nʼeBabelĩ oko mbande syosĩ, ĩnywe bosĩ abakakanda amata. Mumulase, sĩmũsĩgalire nʼomusoha, kusangwa abĩrĩhalya oko Mwami Mukulu.

¹⁵ Mũmũte obogo bwʼamalwa oko mbande syosĩ! Abiriwa. Esyondũyĩ siwe syabiriwa, nʼesyombĩmbo syako syabĩrĩterĩbwa. Kusangwa nĩ ʼkĩsya lyʼOmwami Mukulu. Mũmũkĩsaye. Ngoko akola abandi, mumukole mutya.

¹⁶ Mugogole omũbĩbĩ wʼeBabelĩ, nʼoyukahamba omũtemĩ oko mugulu wʼerigesa. Busana nʼomũyalĩ wʼoyũkanũbaya, basyabũnũkala oko kĩtũnga kyabo, kandi basyatibita obuli mundu omo kihugo kiwe.

¹⁷ Ĩsraelĩ nĩ mbũlĩ ĩpanzĩrwe. Esyondale syabirimuhiyira hali. Erĩmbere omwami wʼeAsũrĩa mwamulya, na lino enyũma ni Nebũkadeneza omwami wʼeBabelĩ oyũ abĩrĩbũnanga amakũha wuwe.

¹⁸ Neryo Omwami Mukulu wʼemilondo, Nyamuhanga wa Ĩsraelĩ ati, Lebaya, nasyasuyira omwami wʼeBabelĩ nʼekihugo kiwe, ngoko nabirisuyira omwami wʼeAsũrĩa.

¹⁹ Nasyaswaleta Ĩsraelĩ oko lũlĩsĩryo luwe, naye asyalira eKaramelĩ nʼeBasanĩ, nʼomutima wuwe asyũgũtĩra oko bitwa bya Efũraĩmũ nʼomo Gĩleadĩ.

²⁰ Oko biro ebyo, nʼoko mugulu oyo, Omwami Mukulu ati, ekibi kyʼeĨsraelĩ kyasyasondĩbwa, isikiri, nʼebibi bya Yũda, sibyendisyabanika. Kusangwa nasyabuyira abo nasyasĩga mo bĩsĩgalira.

²¹ Muyalwe nʼekihugo kya Merataĩmũ, muyalwe nakyo, mulwe nʼesyondũlanĩ syʼePekodĩ. Mũtĩndebo, kandi mũheraye bo kutsibu, Omwami Mukulu atya, mukole ebyosĩ ngoko nabiribahana.

²² Omulenge wʼamalwa ali omo kihugo, nʼowʼerĩherya ĩnene.

²³ Enyondo yʼekihugo kyosĩ yamatũbwa mo bitswe bibiri nʼeritulika iti! eBabelĩ yabiribya kindu kyʼesyonye omo katĩkatĩ kʼebihanda yiti!

²⁴ Nabirikutega, nawe wabirihambwa, uwe Babelĩ, siwabya wasĩ. Wamabanika, wabirihambwa, kusangwa wabirilwa nʼOmwami Mukulu.

²⁵ Omwami Mukulu abirikingula embĩso yiwe yʼebindu byʼamalwa, abĩrĩhũlũkya ebindu byʼamalwa byʼerihitana liwe, kusangwa nĩ mũbĩrĩ wʼomukama, Omwami Mukulu wʼemilondo omo kihugo kyʼAbakaldea.

²⁶ Mũmũhĩkeko mũkalũa oko mitano yʼehali. Mukingule esyombĩso siwe. Mumuyire ngʼebilundo, mũmũheraye kũndũ. Sĩmũmũsĩge ko nʼakake.

²⁷ Mwĩte abasĩrĩkanĩ buwe bosĩ omo mũyalĩ: mukerebo! Obũlĩge kubo, kusangwa ekiro kyabo kyabĩrĩhĩka, nʼomugulu wʼerisuyirabo.

²⁸ Abandu abatibita nʼeribala bakalũa omo kihugo kyʼeBabelĩ, bakatũlago eSĩonĩ omwatsi wʼerĩkĩsya lyʼOmwami Mukulu Nyamuhanga wetu, erĩkĩsya lyʼeHekalũ yiwe.

²⁹ Mubirikire haguma abalasĩ bʼemisoha erilwa nʼeBabelĩ, nʼabosĩ abakakanda obuta. Muhande enganda erĩmũtĩmbako, sĩhabalĩbawe nʼomuguma wa kubo. Mumulihe ngʼemĩbĩrĩ yiwe. Ngʼebyosĩ abirikola, mukolebyo mutya, kusangwa abĩrĩyĩhamya nʼerilwa nʼOmwami Mukulu, nʼerilwa nʼoyũbũyĩrĩre wa Ĩsraelĩ.

³⁰ Omwami Mukulu ati, Busana nʼekyo, abalwana buwe basyawa omo nzira siwe, nʼabalume buwe bʼamalwa abosĩ basyagasamĩbwa oko kiro ekyo.

³¹ Omukama Omwami Mukulu wʼemilondo ati, Lebaya, ngalwa nawe, uwe ukayanza, kusangwa ekiro kyawe kyamahĩka, omugulu oyonasyakusuyira.

³² Nʼoyukayanza asyatwĩkala nʼeriwa, isihali oyo wasyamũhanganĩa. Nage nasyakya omuliro omo mĩyĩ yiwe, nago asyalya ehosĩ ahamũtĩmbĩreko.

³³ Omwami Mukulu wʼemilondo ati, Abana ba Ĩsraelĩ nʼabana ba Yũda bakanũbĩbawa haguma. Nʼabosĩ abanyegabo bakahambabo kutsibu. Bakagana erĩlwĩkabo.

³⁴ Omũtongolya wabo nĩ mbangĩ. Erĩna liwe ni Mwami Mukulu wʼemilondo. Asyatonganira omwatsi wabo go ndeke, iniabana erĩlũhũkya ekihugo, nĩkwa erireta omwaga oko syondũlanĩ syʼeBabelĩ.

³⁵ Omwami Mukulu ati, Omũyalĩ akalwa nʼAbakaldea, nʼerilwa nʼesyondũlanĩ syʼeBabelĩ, nʼoko bakulu bayo, nʼoko bandu buwe bʼamenge!

³⁶ Omũyalĩ akalwa nʼabamĩnyererĩ bʼamabehĩ, nabo basyabya bakĩrũ. Omũyalĩ ali oko mbangi siwe, nabo basyakwa.

³⁷ Omũyalĩ ali oko syosabayĩrĩ syabo nʼoko syogalĩ syabo syʼamalwa, nʼoko bandu bosĩ bʼehandi abali omo katĩkatĩ kago, nabo basyabya bakalĩ! Omũyalĩ abye oko bũsokĩ buwe, nabo bwasyahũngwa!

³⁸ Engarayi yʼomwisi iri oko magetsi wayo, nago asyũmĩbwa! Kusangwa ni kihugo kvʼesyosanamu nabo babirigunga busana nʼesyosanamu syʼerĩũbahya.

³⁹ Neryo esyonyama syʼomo mbwarara haguma nʼesyoboha syʼomolĩ syasyĩkalaho, nʼembũnĩ yasyĩkala mukyo. Kandi sĩkyendĩsyĩkalwamo kandi na kera, kutse omundu sĩendĩsyĩkalamo erĩhĩka oko ndengo syosĩ.

⁴⁰ Omwami Mukulu ati, Ngoko omugulu Nyamuhanga aheraya eSodomo nʼeGomora nʼemĩyĩ ĩhererenĩe nayo, litya sihali mundu wasyĩkalayo, kutse omugala wʼomundu erĩĩkalamo.

⁴¹ Lebaya, abandu bakalũa elutambi lwʼendata, nʼekihanda kinene, nʼabami bangĩ basyahanganĩbwa, bakalũa oko bihande byʼesyondũlĩ syʼekihugo.

⁴² Bakahamba obuta nʼerĩtũmo lyabo. Bakalĩre, kandi sibeganyira. Omulenge wabo akahuha ngʼengetsi, kandi bakagenda oko syosabayĩrĩ, obuli mundu ĩnĩabĩrĩyĩtegekanĩa ngʼomundu ukaya oko malwa, erilwa nawe, uwe mwali wʼeBabelĩ.

⁴³ Omwami wʼeBabelĩ amowa engulu yabo, nʼebyala biwe byamogokala. Obwagalĩ bwabirimuhamba, nʼerĩsĩrĩkalira ngʼeryʼomũkalĩ ukakunda.

⁴⁴ Lebaya, ĩngye Mwami Mukulu nasyahetuka ngʼendale eyĩkalũa omo kisaka kyʼeYorodanĩ oko lũlĩsĩryo lubisi. Kandi nasyaleka ibatibita lũba, nʼoyo nayisoga nasyamũhĩra endata kubo; kusangwa nindi ali nga ngye kwehĩ? Kandi nindi angalwa nage, nʼomũtabalĩ nindi oyukatoka erihangana embere syage kwehĩ?

⁴⁵ Neryo muhulikirire erĩyĩsũnza lyʼOmwami Mukulu, eryo ayĩsũnza busana nʼeBabelĩ. Nʼobũlengekanĩa buwe obo aganĩraya erilwa nʼekihugo kyʼAbakaldea. Kwenene basyakurabo, nʼabana babo basyahũngwa. Kwenene asyayira olũlĩsĩryo lwabo mo kĩma busana nabo.

⁴⁶ Oko mulenge ati, eBabelĩ yabirihambwa! Ekihugo kyasyatitimana, nʼomulake asyogũbwa omo bihanda.