Yeremĩa 48 - AMASAKO ABOYTRTRE WA NYAMUHANGA AWAKAHULAWA MO BIBLIA

Eriminyerera busana na Moabũ

¹ Busana na Moabũ. Omwami Mukulu wʼemilondo, Nyamuhanga wʼeĨsraelĩ akabũga ati, Obũlĩge uku Nebo! Kusangwa abĩrĩtsandĩbwa. Kĩrĩataĩmũ abirihemulwa, abĩrĩhũngwa. Ahakongotere hayo habirihemulwa nʼerisambulwa.

² Eripipa busana na Moabũ sirikiri. Babiriya embĩta yʼerĩkwa busana nʼeHesĩbonĩ. Mwase, tũheraye ekihanda kya Moabũ. Nawe Madĩmenĩ, wasyahũnerĩbwa. Omũyalĩ asyakukwama.

³ Omulenge wʼekiriro akalũa eHoronaĩmũ, erĩkwa nʼerĩherĩbwa ĩnene!

⁴ Moabũ abĩrĩherĩbwa. Abana bako babirilaka emilake yʼobũlĩge.

⁵ Kusangwa basyahetuka omo bwiruka bwʼeLũhĩtĩ bakalira omugulu gosĩ. Kusangwa oko bwandagala bwʼeHoronaĩmũ babĩrĩowa obũlĩge bwʼekiriro kyʼerĩherĩbwa.

⁶ Mutibite, mũlamaye esyongebe syenyũ, mubye ngʼekĩlagũ kyʼomo mbwarara.

⁷ Kandi, kusangwa wabiriyiketera emĩbĩrĩ yawe nʼebindu byawe, nawe nibya wasyanyegwa. Kemosĩ asyahuluka omo bunyegwa, abahererĩ buwe nʼabanya-mwami buwe haguma.

⁸ Nʼoyũkaheraya asyahĩka oko buli mũyĩ, isihali omũyĩ owasyabala. Omusya asyahera, nʼobwerere bwasyaherĩbwa, ngoko Mwami Mukulu abĩrĩbũga.

⁹ Muhe Moabũ yʼebĩpũpa asyatibita nʼeriyitwala. Emĩyĩ yago yasyabya kĩma, isihali oyo Wasyĩkala mugo.

¹⁰ Atakirawe oyukakola omũbĩrĩ wʼOmwami Mukulu omwʼiteba. Atakirawe oyũkakakĩraya omũyalĩ wuwe oko musasi.

¹¹ Moabũ abirihumula okwʼĩtsũka obũlwana buwe. Abiriluhuka busana nʼebindu ebyo abĩkĩre, sialitabũngũlĩkanĩbwa omo syonyungu, kutse sialitaya omo bunyegwa. Busana nʼekyo erĩgerya liwe likamubyako nʼerikumba liwe siryetahinduka.

¹² Omwami Mukulu ati, Lebaya, ebiro bikasa nasyamutumira abakũta esyonyungu, nabo basyamũta. Basyakombĩa esyonyungu siwe, nʼeritulanga amalega wabo mo bihande-bihande.

¹³ Na Moabũ asyakwa esĩsonĩ busana nʼeKemosĩ, ngʼekihanda kya Ĩsraelĩ kyahemuka busana nʼeBetelĩ, eriyiketera lyabo.

¹⁴ Mũkabũgakĩ muti, tuli bandu bʼamaka bʼamalwa nʼesyombangĩ syʼamalwa kwehĩ?

¹⁵ Moabũ abĩrĩherĩbwa, nʼabandu babirihetukira emĩyĩ yako, nʼabalwana bako abayisogawa babĩrĩkĩmĩra okwʼikerwa, Omwami, oyukahulawa mo Mwami Mukulu wʼemilondo atya.

¹⁶ Erĩkwa lya Moabũ liri hakũhĩ nʼerĩhĩka, nʼamalĩge wako akanguha lũba.

¹⁷ Ĩnywe bosĩ mũmũtĩmbĩreko, mulirego, nenyũ abosĩ abasĩ erĩna lyago, mũbũge muti, Omũtso wʼamaka, omũtso mubuya, atwĩkĩre ati!

¹⁸ Uwe ndũlanĩ yʼeDĩbonĩ, Wandagale Ũlũe oko lukengerwa lwawe, Wĩkale oko kitaka kyũmĩre kusangwa omũherya wʼeMoabũ abĩrĩhĩka erilwa nawe, abĩrĩherya ahakongoterere hawe.

¹⁹ Uwe ndũlanĩ yʼeAroerĩ, uhangane oko mũsĩke wʼenzira, ulinge. Ũbũlaye oyukatibita nʼoyukabala uti, Yamakolwakĩ kwehĩ?

²⁰ Moabũ abirihemulwa, kusangwa abirisambulwa. Ulire, ũsũsũmane nʼeririra. Mũtũlego omo Amonĩ ngoko Moabũ yabĩrĩherĩbwa.

²¹ Nʼeritswera lyabĩrĩhĩkĩrĩra oko kihugo kyʼerirungu, nʼoko Holonĩ, nʼendata oko Yahaza, nʼoko Mefatĩ.

²² Nʼoko Dĩbonĩ, nʼoko Nebo, nʼoko Bete-deblataĩmũ,

²³ nʼoko Kĩrĩataĩmũ, nʼoko Bete-gamũlĩ, nʼoko Bete-meonĩ,

²⁴ nʼoko Kĩrĩotĩ, nʼoko Bozra, nʼoko mĩyĩ yosĩ yʼekihugo kyʼeMoabũ, eyiri hali nʼeyiri hakũhĩ.

²⁵ Amaka wa Moabũ abĩrĩhĩnongokalĩbwa nʼobũtokĩ buwe bwabĩrĩbũnĩka, Omwami Mukulu atya.

²⁶ Mũmũkũndaye, kusangwa abĩrĩyĩhamya mo bũyĩgũ bwʼomwami Mukulu. Neryo Moabũ asyayĩnũba-nũbya omo bisalo biwe, kandi asyasekererĩbwa.

²⁷ Kandi nawe mũtasekererya Ĩsraelĩ kwehĩ? Kutse mwabanika omo katĩkatĩ kʼabarahĩ kwehĩ? Kusangwa emigulu yosĩ ukamwahula ĩnũkatsĩngaya omutwe.

²⁸ Ĩnywe ndũlanĩ syʼeMoabũ mũhũme oko mĩyĩ, mwĩkale omo lukuka mubye ngʼakalĩkũkũ akakahĩmba Olutu lwako omo kyũna.

²⁹ Twabĩrĩowa eriyiheka lyʼeMoabũ, kwʼakayiheka kutsibu, epono yiwe, nʼeriyianza liwe, nʼerĩyĩhamya liwe, nʼobutsibu bʼomutima wuwe.

³⁰ Omwami Mukulu ati, Nyĩnasĩ erihitana liwe, ko liri buyira. Eriyipipa liwe siryetakola kyahi.

³¹ Neryo nasyasũsũmanira Moabũ, ega nasyalaka busana na Moabũ. Kusangwa nasyasĩmba busana nʼabalume bʼeKĩrĩheresĩ.

³² Kwilaba eririra busana nʼeYazerĩ, nasyakulira uwe mũlĩkĩ wʼebĩnyũ bya Sĩbũma. Emitahi yawe yabirisoka engetsi, yabĩrĩhĩka oko ngetsi ya Yazerĩ. Omũnyeyĩ abĩrĩherya ebĩgũma byawe byʼomugulu wʼomwisi, erioha lyawe lyʼebĩnyũ.

³³ Ebitsange nʼobutseme byabĩrĩlũsĩbwa omwʼirima lyʼomuboga nʼomo kihugo kyʼeMoabũ. Nabĩrĩkakĩrya ebĩnyũ omo bikamiro. Sihali oyo wasyakama akahamĩrya. Erĩhamĩrya siryendisyabya erĩhamĩrya lyʼobutseme.

³⁴ Okwʼilaka lyʼeHesbonĩ erĩhĩka Eleale, nʼerĩhĩka eYahazĩ, babirisumba omulenge wabo, erĩtsũka eZoarĩ erĩhĩka eHoronaĩmũ erĩhĩka Eglatĩ-selĩsa. Kusangwa amagetsi wʼeNĩmũrĩmũ asyuma.

³⁵ Omwami Mukulu ati, Nasyabuga Moabũ, nasyakakĩrya oyukaherera amahere ahʼendata, nʼoyũkahĩsaya obukwa oko syonyamuhanga siwe.

³⁶ Neryo omutima wage akahũlũkaya omulenge ngʼenyamulera busana na Moabũ, nʼomutima wage akahũlũkaya omulenge ngʼenyamulera busana nʼabandu bʼeKĩreheresĩ. Neryo babĩrĩtalya ebingi ebyo ayibanira.

³⁷ Kusangwa obuli mutwe ali kʼoluhala, nʼobuli nderũ sikasurawa. Hali eriyibanda oko byala byosĩ nʼomo mbindi muli emiremba.

³⁸ Nʼoko nyitwe syosĩ syʼeMoabũ nʼomo syonzira hali erĩsũsũmana ehosĩ. Kusangwa nabiritulanga Moabũ ngʼenyungu eyĩtetsemesaya mundu, Omwami Mukulu atya.

³⁹ Asambwĩrwe ati! Babĩrĩsũsũmana bati! Ko Moabũ abiribindula omugongo go ati! Abirihemuka! Neryo Moabũ asyabya erĩsekererĩbwa nʼerĩũbahya busana nʼabosĩ abamũtĩmbĩreko.

⁴⁰ Kusangwa Omwami Mukulu ati, Lebaya, omundu asyaguluka ngʼerĩsamba, asyasanzula ebĩpũpa biwe erilwa na Moabũ.

⁴¹ Kĩrĩotĩ abĩrĩhũngwa, nʼahakongotere habirihambwa, neryo emitima yʼesyombangĩ sya Moabũ ekiro ekyo yasyabya ngʼomutima wʼomũkalĩ omo bwagalĩ bwʼerikunda.

⁴² Na Moabũ asyaherĩbwa siabye kihanda, kusangwa abĩrĩyĩhamya erilwa nʼOmwami Mukulu.

⁴³ Omwami Mukulu ati, Obuba, nʼobuhya, nʼekitego bĩkakũhĩkako, uwe ndũlanĩ yʼeMoabũ.

⁴⁴ Omwami Mukulu ati, Oyukatibita busana nʼobuba asyawa omo buhya, nʼoyũkalũa omo buhya asyakwa omo kitego, kusangwa nasyaletera ye Moabũ, omugulu wʼerisuyirwa lyabo.

⁴⁵ Abatibita bakahangana butsira maka omo kyũtũtũ kyʼeHesĩbonĩ. Kusangwa omuliro abirihuluka akalũa eHesĩbonĩ, nʼekirimi kyʼomuliro kĩkalũa omo katĩkatĩ kʼeSĩhonĩ, kyabĩrĩhĩsya omutano wʼeMoabũ nʼakahũlĩ-hũlĩ kʼemitwe yʼabandu bʼeMoabũ bʼomwaga.

⁴⁶ Uwe Moabũ, obũlĩge kuwe! Abandu ba Kemosĩ babirihwa, kusangwa bagala bawe babĩrĩhũngwa mo bakobe, nʼabali bawe mo banyegwa.

⁴⁷ Omwami Mukulu ati, Nasyasũbya omũyĩsa wʼeMoabũ oko biro byʼenyũma. Eritswera lya Moabũ lyamahĩkerera hano.