Yeremĩa 47 - AMASAKO ABOYTRTRE WA NYAMUHANGA AWAKAHULAWA MO BIBLIA

Nyamuhanga akasuyira Abafĩlĩstĩnĩ

¹ Ekĩnywa kyʼOmwami Mukulu mokyahĩka oko mũmĩnyererĩ Yeremĩa busana nʼAbafĩlĩstĩnĩ, Farao ate akĩnda

² Omwami Mukulu ati, Lebaya, amagetsi asyahuluka akalũa elutambi lwʼendata, nago asyabya ngʼolũsĩ olukabwaga, nago asyabwagira omo kihugo nʼoko byosĩ ebirimo, nʼomũyĩ nʼabĩkere mugo. Nʼabalume basyalaka, nʼesyondũlanĩ syosĩ syʼekihugo syasyalira.

³ Busana nʼolukanda lwʼeritibita lyʼesyosabayĩrĩ siwe, na busana nʼolukanda lwʼeritibita lyʼesyongali siwe, na busana nʼeriruruma lyʼebĩrĩngo biwe, abotata sibetabũnũkala busana nʼabana babo, busana nʼerioloba lyʼebyala byabo,

⁴ busana nʼekiro kikasa busana nʼerĩherya Abafĩlĩstĩnĩ bosĩ, erĩĩta obuli mũwatĩkya oyo wasaka eTĩro nʼeSĩdonĩ. Kusangwa Omwami Mukulu asyaherya Abafĩlĩstĩnĩ, abosĩ abasĩgere oko mũsĩke wʼeKafũtorĩ.

⁵ Oluhala lwabĩrĩhĩka eGaza, eAskelonĩ yabiritsanda. Uwe mũsĩgalira wʼomusya, wasyayibanda omo migulu yingahi kwehĩ?

⁶ Uwe mũyalĩ wʼOmwami Mukulu, wasvakĩrana mugulu wahi kwehĩ? Ũyĩhĩre omo lubo lwawe. Uluhuke, ubye bũkũtũ.

⁷ Asyatoka eribya bũkũtũ ati, Omwami Mukulu amabya abirihanago ekihano kwehĩ? Abirihana omũyalĩ busana nʼerilwa nʼeAskelonĩ na busana nʼomũsĩke wʼengetsi yʼeyo abirihamulago.