Yeremĩa 46 - AMASAKO ABOYTRTRE WA NYAMUHANGA AWAKAHULAWA MO BIBLIA

Nebũkadeneza akakĩnda eMĩsĩrĩ

¹ Ekĩnywa kyʼOmwami Mukulu ekyahĩka oko mũmĩnyĩrerĩ Yeremĩa busana nʼebihanda.

² Busana nʼeMĩsĩrĩ, busana nʼabasĩrĩkanĩ ba Farao-Neko, omwami wʼeMĩsĩrĩ eyabya hakũhĩ nʼolũsĩ Efũratĩ eKarkemĩsĩ, abo Nebũkadeneza omwami wʼeBabelĩ akĩnda omo mwaka wʼakani wa Yehoyakĩmũ mugala wa Yosĩa, omwami wʼeYũda.

³ Mũkokotaye engabo nene nʼengabo enge, musegere ahali amalwa!

⁴ Mũtegekanaye esyosabayĩrĩ, mubye kusyo, muhangane haguma nʼengofira yʼekyuma. Mũtendereraye amatũmo, mwambale amupa wʼebyuma.

⁵ Omwami Mukulu ati, Busana nakĩ namalangira ekyo kwehĩ? Babĩrĩkwa obuba, babirisuba enyũma. Esyombangĩ syabo syabĩrĩkĩndwa ahisi, syabirisaga, sibekebera enyũma. Obuba buli oko mbande syosĩ.

⁶ Omundu oyukanguha siatibite, kutse embangĩ siyibale, ebwanga bwʼelutambi lwʼendata hakũhĩ nʼolũsĩ Efũratĩ babĩrĩtwĩkala nʼeriwa.

⁷ Oyũ nindi oyukahangana ngʼeNĩlĩ, ngʼesyonyũsĩ nʼamagetsi wasyo akayigusanga kwehĩ?

⁸ EMĩsĩrĩ ikahangana ngʼeNĩlĩ, ngʼesyonyũsĩ nʼamagetsi wasyo akayigusanga. Naye akabũga ati, Nasyahangana, nasyaswika ekihugo. Nasyaherya omũyĩ kwenene nʼesyondũlanĩ syayo.

⁹ Ĩnywe esyosabayĩrĩ, muhetuke. Nenyũ esyogalĩ mugende kutsibu. Esyombangĩ sirendere embere. Abandu bʼeEtĩopĩa nʼePũtĩ, abakahamba engabo. Abalũdĩmũ, abakahamba nʼerĩkakya obuta.

¹⁰ Kusangwa ekiro ekyo ni kiro kyʼomukama Omwami Mukulu wʼemilondo, ekiro kyʼerĩkĩsya, iniatoka erĩkĩsĩrya oko nzĩgũ siwe. Nʼomũyalĩ asyalya nʼerĩũgũta, asyapũlya nʼerĩũgũta nʼerĩpũlya ndeke omusasi wabo. Kusangwa hasyabya erĩĩta busana nʼomukama Omwami Mukulu wʼemilondo, omo kihugo kyʼelutambi lwʼendata hakũhĩ nʼolũsĩ Efũratĩ.

¹¹ Uwe mwali wʼeMĩsĩrĩ, uhetukire eGĩleadĩ, uheke amagũta wʼobũbalya! Wabiribana obũbalya bungi bo busa, sihali erilama busana nawe.

¹² Ebihanda byabĩrĩowa engulu yʼesĩsonĩ syawe, nʼekihugo kyoswĩre nʼekiriro kyawe, kusangwa omũsĩrĩkanĩ abĩrĩtwĩkala oko gundi mũsĩrĩkanĩ, abosĩ babiri babiriwa ahisi haguma.

¹³ Ekĩnywa ekyo Mwami Mukulu abũga nʼomũmĩnyererĩ Yeremĩa busana nʼerĩhĩka lya Nebũkadeneza, omwami wʼeBabelĩ erĩĩta ekihugo kyʼeMĩsĩrĩ.

¹⁴ Mũtũlego eMĩsĩrĩ, mũtũlego eMĩgedolĩ, mũtũlego eNofũ, nʼeTapanesĩ. Mũbũge muti, Uhangane, ũyĩtegekanaye, kusangwa omũyalĩ abiribuga abandu abakũtĩmbĩreko.

¹⁵ Busana nakĩ esyombangĩ syawe syabiriwa ahisi kwehĩ? Sibetahangana kusangwa Omwami Mukulu abĩrĩswĩryasyo ahisi.

¹⁶ Babĩrĩtwĩkala nʼeriwanako ahisi ngendo nyingi. Neryo mobabũga bati, Tuhangane! Tusube oko bandu betu, nʼoko kihugo ekyo twabutawamo, ahate mũyalĩ wʼoyũkanũbaya.

¹⁷ Mobabirikirirayo, bati, Farao omwami wʼeMĩsĩrĩ ni lukanda lunene buyira. Abĩrĩlabya omugulu owahĩrawa!

¹⁸ Omwami akabũga ati, Ngoko nyiriho, Omwami Mukulu wʼemilondo, lyo lĩna liwe, kwenene omundu asyasa ngʼeTaborĩ omo bitwa, nʼakandi ngʼeKaramelĩ hakũhĩ nʼengetsi, kwʼasyasa atya.

¹⁹ Uwe mwali oyo wĩkere eMĩsĩrĩ, ũyĩtegekanaye nʼebindu byawe eriya omo bunyegwa. Kusangwa eNofa yasyabya kĩma, asyahĩsĩbwa, asyabya butsira Endũlanĩ.

²⁰ EMĩsĩrĩ ni nyana mbuya, nĩkwa eyĩsũkĩ yikasira elutambi lwʼendata, ikasa!

²¹ Abasĩrĩkanĩ buwe abali omo katĩkatĩ kayo abali ngʼebyana byʼende ebĩnenehĩre, kusangwa babĩrĩbũnũkala, babiritibita haguma; mobatahangana. Kusangwa ekiro kyʼerihera lyabo kyabĩrĩhĩkĩrabo, omugulu wʼerisuyira lyabo.

²² Omulenge wabo akalaba ngʼowʼenzoka, kusangwa bakalaba ngʼomulondo wʼabasĩrĩkanĩ bakamũhĩkako nʼesyombasa, ngʼabasenyĩ.

²³ Omwami Mukulu ati, Babirikonda omũsĩtũ wuwe, kwenene siendisyaswabanika, kusangwa ni bangi kwilaba esyongĩke, kandi sibeganzika.

²⁴ Omwali wʼeMĩsĩrĩ abirihemulwa. Abĩrĩhĩrwa omo byala byʼabandu bʼelutambi lwʼendata.

²⁵ Omwami Mukulu wʼemilondo, Nyamuhanga wʼeĨsraelĩ ati, Lebaya, nasyasuyira Amonĩ wʼeNo, na Farao, nʼeMĩsĩrĩ, haguma nʼesyonyamuhanga siwe, nʼabami buwe, ye Farao, nʼabandu abakayiketera ye.

²⁶ Nage nasyahĩrabo omo byala byʼabandu abakasonda-sonda engebe yabo, nʼomo byala bya Nebũkadeneza omwami wʼeBabelĩ, nʼomo byala byʼabakulu buwe. Nʼenyũma wʼaho abandu basyĩkalamo, ngʼebiro bya kera, Omwami Mukulu atya.

²⁷ Nĩkwa Yakobo, omugombe wage, Sigubahe, kutse nawe Ĩsraelĩ, susweke! Kusangwa, lebaya, nasyakũlamya erĩkũlũsya ehali, nʼabana bawe erĩlũa omo kihugo kyʼobunyegwa bwabo. Na Yakobo asyasubula, nʼerihumula nʼobuholo, isihali oyo Wasyaleka akatitimana.

²⁸ Omwami Mukulu ati, Uwe Yakobo, omugombe wage, Sigubahe, kusangwa ĩngye indi haguma nawe. Kusangwa nasyabuga ebihanda byosĩ eyo nakubingira, nĩkwa sindiendĩsyakũherya. Nĩkwa nasyakukunga ndeke, isindiendisyakuleka nʼahake butakusuyira.