Yeremĩa 43 - AMASAKO ABOYTRTRE WA NYAMUHANGA AWAKAHULAWA MO BIBLIA

Abayũda bakaya eMĩsĩrĩ omo pono

¹ Neryo omugulu Yeremĩa oyo Mwami Mukulu, Nyamuhanga wabo atuma, abere abibuga eribwira abandu bosĩ ebĩnywa byosĩ byʼOmwami Mukulu Nyamuhanga wabo, ebĩnywa ebĩ byosĩ,

² neryo Azaria mugala wa Hosaya, na Yohananĩ mugala wa Karea, nʼabandu bosĩ abayipipa mobabwira Yeremĩa bati, Ũkabũga amabehĩ! Omwami Mukulu Nyamuhanga wetu mwatakutuma erĩbũga ati, Simusyegenda eMĩsĩrĩ erĩĩkalayo.

³ Nĩkwa Barũkũ mugala wa Nerĩa akakũtsotsomereraya busana netu, erituhotera omo byala byʼAbakaldea, ibatoka erĩtwĩta, kutse eritutwala mo banyegwa eBabelĩ.

⁴ Neryo litya Yohananĩ mugala wa Karea, nʼabakulu bosĩ bʼemilondo nʼabandu bosĩ mobatakenga omulenge wʼOmwami Mukulu erĩĩkala omo kihugo kyʼeYũda.

⁵ Nĩkwa Yohananĩ mugala wa Karea, nʼabakulu bosĩ bʼemilondo, mobatwala abasĩgalira bosĩ bʼeYũda abasubula bakalũa omo bihanda byosĩ eyo bahigirawa busana nʼerĩĩkala omo kihugo kyʼeYũda,

⁶ abalume nʼabakalĩ, nʼabana, nʼabali bʼomwami, nʼobuli mundu oyo Nebũzaradanĩ omukulu wʼabateya asĩganaya haguma na Gedalĩa mugala wa Ahĩkamũ, mugala wa Safanũ, haguma nʼomũmĩnyererĩ Yeremĩa, na Barũkũ mugala wa Nerĩa—

⁷ neryo mobingira omo kihugo kyʼeMĩsĩrĩ, kusangwa mobatakenga omulenge wʼOmwami Mukulu. Mobahĩka eTapanesĩ.

Nyamuhanga ati akandĩsyakĩnda eMĩsĩrĩ omo byala bya Nebũkadeneza

⁸ Neryo ekĩnywa kyʼOmwami Mukulu mokyahĩka uku Yeremĩa eTapanesĩ kiti,

⁹ Wĩmaye amabwe manene manene omo byala byawe ũbĩsego omo londo lwʼerĩhĩmba amatafalĩ awali omo lũkyo lwʼenyũmba ya Farao eTapanesĩ, omo meso wʼabandu bʼeYũda.

¹⁰ Ubwirebo uti, Omwami Mukulu wʼemilondo, Nyamuhanga wʼeĨsraelĩ akabũga ati, Lebaya, nasyatumira Nebũkadeneza omwami wʼeBabelĩ, omugombe wage, nasyahĩra ekĩtũmbĩ kiwe kyʼobwami endata oko mabwe ago nabĩrĩbĩsa. Naye asyasanza ehema yiwe yʼerĩkangabasanĩa endata kugo.

¹¹ Kandi asyasa nʼerĩswĩrya ekihugo kyʼeMĩsĩrĩ, ngoko mũlĩsya akayahabwa oluholo, nʼabandu bʼerinyegwa basyanyegwa, nʼabandu busana nʼomũyalĩ basyahabwa oko mũyalĩ.

¹² Nage nasyakya omuliro oko hekalũ syʼesyonyamuhanga syʼeMĩsĩrĩ. Asyahĩsyabo, nʼerĩhũngabo. Naye asyayambalya ekihugo kyʼeMĩsĩrĩ, ngoko mũlĩsya akayambalaya olukimba luwe. Naye asyalũayo omo buholo.

¹³ Nibya asyatulanga esyondũyĩ syʼeBetĩ-semesĩ, esiri omo kihugo kyʼeMĩsĩrĩ. Nibya asyahĩsya esyohekalũ syʼesyonyamuhanga syʼeMĩsĩrĩ omo muliro.