Yeremĩa 42 - AMASAKO ABOYTRTRE WA NYAMUHANGA AWAKAHULAWA MO BIBLIA

Abayũda bakabũlaya Yeremĩa bati asabirebo

¹ Neryo abakulu bosĩ bʼemilondo, ye Yohananĩ mugala wa Karea, na Yezanĩa mugala wa Hosaya, nʼabandu bosĩ erĩtsũka oko muke nʼerĩhĩka oko mukulu mobasegera hakũhĩ

² nʼeribwira omũmĩnyererĩ Yeremĩa bati, kĩsĩ-kĩsĩ tuti, Erisaba lyetu lĩhĩke embere syawe, kandi musabire oko Mwami Mukulu Nyamuhanga wawe, busana nʼabandu aba bosĩ abasĩgalira. Kusangwa twamasaka mo bandu bake oko bangi, ngoko ameso wawe amabitulolako,

³ Omwami Mukulu Nyamuhanga wawe atoke erĩtũkangya enzira eyo twangalabamo, nʼomwatsi ogo twangakola.

⁴ Neryo omũmĩnyererĩ Yeremĩa mwabwirabo ati, Namabĩbowa. Lebaya, nasyasaba Omwami Mukulu, Nyamuhanga wenyũ ngʼebĩnywa byenyũ. Neryo ekĩnywa kyahi Omwami Mukulu asyasũbĩrya, nasyababwirakyo sĩndĩendĩsyababĩsa ekĩnywa nʼekiguma.

⁵ Neryo mobabwira Yeremĩa bati, Omwami Mukulu abye mũlangĩrĩ wa kwenene nʼoyuteregula omo katĩkatĩ ketu, twamatindakola ngʼekĩnywa kyosĩ ekyo Mwami Mukulu Nyamuhanga wawe asyakutumako busana netu.

⁶ Kyamabya kibuya kutse kyamabya kibi, twasyakenga omulenge wʼOmwami Mukulu Nyamuhanga wetu, oyo tukakutumako, ikyabya kibuya ũkwʼĩtwe, omugulu tukakenga omulenge wʼOmwami Mukulu Nyamuhanga wetu.

⁷ Neryo enyũma wʼebiro ĩkũmĩ, ekĩnywa kyʼOmwami Mukulu, mokyahĩka uku Yeremĩa.

⁸ Neryo mwabirikira Yohananĩ mugala wa Karea, nʼabakulu bosĩ bʼemilondo ababya haguma naye, nʼabandu bosĩ erĩtsũka oko muke nʼerĩhĩka oko mukulu,

⁹ mwabwirabo ati, Omwami Mukulu Nyamuhanga wʼeĨsraelĩ oyo mwanyitumako, erĩhĩra erisaba lyenyũ embere siwe, ati,

¹⁰ Mwamĩkala omo kihugo kino, neryo nasyabahĩmba, butsira erĩbahĩmbũla, kandi nasyabahanda butsira eribakunungula, kusangwa nasyayĩkakĩrya busana nʼerĩkwa eryo nabiribakolera.

¹¹ Simubahe omwami wʼeBabelĩ, oyo mukubaha. Simumubahe, Omwami Mukulu atya. Kusangwa ĩngye indi haguma nenyũ erĩbalamya, nʼerĩbalũsya omo byala biwe.

¹² Kandi nasyabaha eriganyira, kyasyaleka iniabaganyira, nʼerĩbasũbya omo kihugo kyenyũ.

¹³ Nĩkwa mwamabũga muti, Sĩtwendĩsyĩkala omo kihugo kino; imutakenga omulenge wʼOmwami Mukulu, Nyamuhanga wenyũ,

¹⁴ muti, Iyihi, nĩkwa twasyaya omo kihugo kyʼeMĩsĩrĩ, eyo tutendisyalola oko malwa, kutse erĩowa omulenge wʼengubi, kutse erĩkwa enzala yʼakalyo, nʼeyo twasyĩkala.

¹⁵ Neryo lino, muhulikirire ekĩnywa kyʼOmwami Mukulu, ĩnywe mwasĩgalira eYũda. Omwami Mukulu, wʼemilondo, Nyamuhanga wʼeĨsraelĩ ati, Mwamahatikana erĩlolya obũsũ bwenyũ eriingira eMĩsĩrĩ nʼeriyabungirayo,

¹⁶ neryo omũyalĩ ogo mukubaha, asyabatangayo omo kihugo kyʼeMĩsĩrĩ. Nʼenzala, eyo mukubaha, yasyabakwamirira kutsibu eMĩsĩrĩ, nibya mwasyaholerayo.

¹⁷ Ko kyasyabya kitya oko bandu bosĩ abakahatikana bati bakaya eMĩsĩrĩ eribungirayo. Basyahola omo mũyalĩ, nʼomo nzala, nʼomo ndwala yʼakasũsũ. Isihali nʼomuguma oyo wasyasaka kutse eribala erĩkwa eryo nasyaleterabo.

¹⁸ Kusangwa Omwami Mukulu wʼemilondo, Nyamuhanga wa Ĩsraelĩ ati, Ngoko erihitana lyage, nʼeriagalirwa lyage byabĩrĩũtũlĩrwa oko ndũlanĩ syʼeYerũsalema, erihitana lyage ko lyasyũtũlĩrwa litya ũkwʼĩnywe, omugulu mwasyingira eMĩsĩrĩ. Nenyũ mwasyabya kĩtsũmĩ, nʼekindu kyʼenye nʼobutakirwa, nʼekĩponĩrwe. Kandi simwendisyaswalangira hano.

¹⁹ Ĩnywe basĩgalira bʼeYũda, Omwami Mukulu abĩrĩbũga busana nenyũ ati, Simuye eMĩsĩrĩ. Muminye kwenene ngoko nabĩrĩbatũlĩrago mũnabwĩre.

²⁰ Kusangwa mwabiriyiteba omo mitima yenyũ. Kusangwa nĩ nywe mwanyituma oko Mwami Mukulu Nyamuhanga wenyũ muti, Utusabire oko Mwami Mukulu, Nyamuhanga wetu. Nʼoko byosĩ ebyo Mwami Mukulu Nyamuhanga wetu asyabũga, utubwire utya netu twasyakolabyo.

²¹ Nage nabĩrĩbatũlĩrago mũnabwĩre, nĩkwa simwetakenga omulenge wʼOmwami Mukulu Nyamuhanga wenyũ omo mwatsi nʼomuguma ukwʼebyo anyituma ũkwʼĩnywe.

²² Neryo lino muminye kwenene ngoko mwasyahola omo mũyalĩ nʼomo nzala, nʼomo ndwala yʼakasũsũ eyo mukasonda erigenda nʼerĩĩkala.