Yeremĩa 41 - AMASAKO ABOYTRTRE WA NYAMUHANGA AWAKAHULAWA MO BIBLIA

Ĩsĩmaelĩ akĩta Gedalĩa nʼabandu buwe

¹ Neryo oko mukera wʼeyirinda, Ĩsĩmaelĩ mugala wa Netanĩa, mugala wa Elĩsama, omuguma wʼolubuto lwʼabana bʼomwami, nʼowʼoko bakulu bʼomwami, nʼabandu ĩkũmĩ haguma naye, mobahĩka eyiri Gedalĩa mugala wa Ahĩkamũ eMĩsĩpa. Neryo omugulu babya bakalya obundu bo haguma eMĩsĩpa,

² Ĩsĩmaelĩ mugala wa Netanĩa mwahangana haguma nʼabandu ĩkũmĩ ababya haguma naye mobaswĩrya Gedalĩa omugala wa Ahĩkamũ mugala wa Safanũ, mobamwĩta omo mũyalĩ, oyo mwami wʼeBabelĩ ayira mo mũtabalĩ oko kihugo.

³ Kandi Ĩsĩmaelĩ mwĩta Abayũda bosĩ ababya haguma na Gedalĩa eMĩsĩpa, nʼAbakaldea ababanikayo, bo bandu bʼamalwa.

⁴ Neryo oko kiro kyʼakabiri abere abĩta Gedalĩa, omugulu oyo isihali mundu wasĩgo,

⁵ neryo mohahĩka bandu makũmĩ munani bakalũa eSekemũ, nʼeSĩlo nʼeSamarĩa, ĩbabĩrĩsĩsa esyonderũ syabo nʼesyongimba sĩsatĩkĩre, ibabiriyibandanga, ibanawite omo byala byabo amahere wʼeyĩsyano nʼobukwa, eriretabyo oko nyũmba yʼOmwami Mukulu.

⁶ Na Ĩsĩmaelĩ mugala wa Netanĩa mwahuluka eMĩsĩpa erĩyahĩndana nabo, mwalira akagenda. Neryo abere ahĩndana nabo mwabwirabo ati, Mwase eyiri Gedalĩa, mugala wa Ahĩkamũ.

⁷ Neryo omugulu bahĩka omo katĩkatĩ kʼomũyĩ, Ĩsĩmaelĩ mugala wa Netanĩa nʼabandu ababya haguma naye mwĩtabo, mwagusabo omo buhya bwʼamagetsi.

⁸ Nĩkwa abandu ĩkũmĩ ababanika omo katĩkatĩ kabo mobabwira Ĩsĩmaelĩ bati, Sũtwĩte, kusangwa tuwite ebindu ebĩbĩsĩrwe omolĩ, engano nʼekisusu nʼamagũta, nʼobuki. Neryo mwalekabo, mwatĩtabo haguma nʼabagala babo.

⁹ Nĩkwa obuhya bwʼamagetsi obo Ĩsĩmaelĩ agusa mwʼebĩnda byʼabandu ĩta aho busana na Gedalĩa, bwabya buhya obo Asa atakula busana nʼeriubaha Baasa omwami wʼeĨsraelĩ, nĩkwa Ĩsĩmaelĩ mugalawa Netanĩa mũsũlya mubo abĩtawa.

¹⁰ Neryo Ĩsĩmaelĩ mwaheka omo bunyegwa abasĩgalira bosĩ bʼabandu ababya eMĩsĩpa, ba bali bʼomwami, nʼabandu bosĩ abasĩgala eMĩsĩpa, abo Nebũzaradanĩ omukulu wʼabateya ahĩra omo byala bya Gedalĩa mugala wa Ahĩkamũ. Litya Ĩsĩmaelĩ mugala wa Netanĩa mwatwalabo omo bunyegwa, iniakalola eyiri abana ba Amonĩ.

¹¹ Nĩkwa Yohananĩ mugala wa Karea, nʼabakulu bosĩ bʼemilondo yʼabasĩrĩkanĩ ababya haguma naye mobowa ebibi byosĩ ebyo Ĩsĩmaelĩ mugala wa Netanĩa, abya akolĩre.

¹² Neryo mobĩmya abandu bosĩ, mobayalwa na Ĩsĩmaelĩ mugala wa Netanĩa, mobamweya hakũhĩ nʼekitsinga kinene ekyabya eGĩbeonĩ.

¹³ Neryo omugulu abandu bosĩ ababya haguma na Ĩsĩmaelĩ balangira Yohananĩ mugala wa Karea, nʼabakulu bʼemilondo ababya haguma naye, mobatsema.

¹⁴ Neryo abandu bosĩ abo Ĩsĩmaelĩ ahũnga eMĩsĩpa mobabinduka erisubula eriya eyiri Yohananĩ mugala wa Karea.

¹⁵ Nĩkwa Ĩsĩmaelĩ mugala wa Netanĩa mwabala akatswa uku Yohananĩ haguma nʼabandu munani, mwaya eyiri abana ba Amonĩ.

¹⁶ Neryo Yohananĩ mugala wa Karea nʼabakulu bosĩ bʼemilondo ababya haguma naye mwĩmya abasĩgalira bʼabandu abo asagula Ĩsĩmaelĩ mugala wa Netanĩa eMĩsĩpa, enyũma abĩta Gedalĩa mugala wa Ahĩkamũ, abalume bʼamalwa, nʼabakalĩ, nʼabana, nʼababũnĩre, abo asũbũlaya eGĩbeonĩ.

¹⁷ Neryo mobagenda, mobĩkala eGerũtĩ-Kĩmũhamũ, eyiri hakũhĩ nʼeBetelehemũ, bati, bakaya eMĩsĩrĩ,

¹⁸ busana nʼAbakaldea. Kusangwa babya bakubahabo, kusangwa Ĩsĩmaelĩ mugala wa Netanĩa ĩnĩabĩrĩta Gedalĩa mugala wa Ahĩkamũ, oyo mwami wʼeBabelĩ ayira mo mũtabalĩ wʼekihugo ekyo.