Yeremĩa 38 - AMASAKO ABOYTRTRE WA NYAMUHANGA AWAKAHULAWA MO BIBLIA

Yeremĩa akahĩrawa omo buhya bʼomũlĩkĩ nʼerĩswalũamo kandi

¹ Na Sefatĩa mugala wa Matanĩ, na Gedalĩa mugala wa Pasũrĩ, na Yũkalĩ mugala wa Selemĩa, na Pasũrĩ mugala wa Malkĩya, mobowa ebĩnywa ebyo Yeremĩa abũga nʼabandu bosĩ ati,

² Omwami Mukulu akabũga ati, Oyo wasyasĩgala omo mũyĩ oyũ asyahola omo mũyalĩ, nʼomo nzala nʼomo ndwala yʼakasũsũ. Nĩkwa oyukahulukira Abakaldea asyabyaho, nʼengebe yiwe yasyabya nga bunyegwa busana naye, naye asyabyaho.

³ Omwami Mukulu ati, Omũyĩ oyũ asyahabwa kwenene omo byala byʼabasĩrĩkanĩ bʼomwami wʼeBabelĩ, naye asyahũngago.

⁴ Neryo abakulu mobabwira omwami bati, Tũkakũbũlaya tuti, Omundu oyũ ĩtawe kusangwa akanogokalaya abandu bʼamalwa abakasĩgala omo mũyĩ oyũ, nʼabandu bosĩ, eribwirabo ebĩnywa ngʼebĩ, kusangwa omundu oyũ sĩalĩsondaya obubuya bwʼabandu aba, nĩkwa erĩagalyabo.

⁵ Neryo omwami Zedekĩa mwabũga ati, Lebaya, ali omo byala byenyũ. Kusangwa omwami yute wangatoka erikola nabi ũkwʼĩnywe.

⁶ Neryo mobahamba Yeremĩa mobamugusa omo buhya bʼomugala wʼOmwami ye Malkĩya, obwabya omo kibuga kyʼenyũmba yʼabateya. Kandi mobamwandagalya omo bikoba. Kandi Simwabya magetsi omo buhya obo, nĩkwa mwabya olondo; na Yeremĩa mwatobera omo londo.

Ebedĩ-melekĩ akalũsaya Yeremĩa omo mũlĩkĩ gʼobuhya

⁷ Neryo omugulu Ebedĩmelekĩ Omũetĩopĩa, oyũbũnĩre, omugulu abya omo nyũmba yʼOmwami, mowa ko babĩrĩhĩra Yeremĩa omo mũlĩkĩ gʼobuhya bwʼamagetsi. Neryo omwami ĩnĩanĩkere oko mugulu oyo oko Lũkyo lwa Benyamĩna.

⁸ Neryo Ebedĩmelekĩ mwahulukira eyĩhya oko kikali kyʼOmwami, mwabwira omwami ati,

⁹ Mwami, mukama wage, abandu aba babirikola nabi omo byosĩ babirikola oko mũmĩnyererĩ Yeremĩa, oyo baliagusa omo mũlĩkĩ gʼobuhya bwʼamagetsi, naye akandisyaholeraho, busana nʼenzala, kusangwa sihakiri bundu omo mũyĩ.

¹⁰ Neryo omwami mwahana Ebedĩmelekĩ Omũetĩopĩa ati, wĩmaye abandu makũmĩ asatu omo hamũlĩ yawe, musumbe omũmĩnyererĩ Yeremĩa alũe omo mũlĩkĩ gʼobuhya bwʼamagetsi ate ahola.

¹¹ Neryo Ebedĩmelekĩ mwĩmya abandu abo omo hamũlĩ yiwe haguma naye, mwaya omo nyũmba yʼOmwami eyiri eyĩkwa oko hʼeribika ebindu, neryo mwalũsyayo ebitomeko nʼesyongimba esĩkũlĩre, kandi mwa ndagalĩryasyo omo bikoba uku Yeremĩa omo buhya bwʼamagetsi.

¹² Neryo Ebedĩmelekĩ Omũetĩopĩa mwabwira Yeremĩa ati, Ũhĩre ebitomeko ebĩ nʼesyongimba esĩ esĩkũlĩre omwisi wʼebikoba omo masakwa wawe, na Yeremĩa mwakola atya.

¹³ Neryo mobasumba Yeremĩa omo bikoba ebyo, mobamũlũsya omo buhya bwʼamagetsi. Na Yeremĩa mwĩkala omo kibuga kyʼenyũmba yʼabateya.

¹⁴ Neryo omwami Zedekĩa mwatumira oko mũmĩnyererĩ Yeremĩa amũhĩkeko omo lũkyo lwʼakasatu lwʼenyũmba yʼOmwami Mukulu. Kandi omwami mwabwira Yeremĩa ati, Ngasonda erĩkũbũlya omwatsi. Sũnyĩbĩse ekĩnywa nʼekiguma.

¹⁵ Neryo Yeremĩa mwabwira Zedekĩa ati, Namakubwirago, sĩwendĩnyĩta kwehĩ? Kandi namakuhana amenge sĩwendĩnyowa.

¹⁶ Neryo omwami Zedekĩa mwalahĩrya uku Yeremĩa omo bũbĩso-bĩso ati, Ngoko Mwami Mukulu aliho, oyo watuhangikira engebe eyĩ kwenene, sindiendĩkwĩta, kutse erikuha omo byala byʼabandu aba, abakasonda-sonda erĩkwĩta.

¹⁷ Neryo Yeremĩa mwabwira Zedekĩa ati, Omwami Mukulu, Nyamuhanga wʼemilondo, Nyamuhanga wʼeĨsraelĩ ati, Wamahulukira abakulu bʼomwami wʼeBabelĩ, neryo omutima wawe asyakota, nʼomũyĩ oyũ sĩendĩsyahĩsĩbwa omo muliro. Nawe wasyabyaho nʼekĩtũnga kyawe.

¹⁸ Nĩkwa wamagana erĩhulukira abakulu bʼomwami wʼeBabelĩ, neryo omũyĩ oyũ asyahĩrwa omo byala byʼAbakaldea, nabo basyahĩsyago omo muliro nawe siwendisyabala omo byala byabo.

¹⁹ Neryo omwami Zedekĩa mwabwira Yeremĩa ati, Ngubaha Abayũda abatswere oko Bakaldea, bakasyambĩra omo byala byabo ĩbanyagalya.

²⁰ Nĩkwa Yeremĩa mwabũga ati, Sibendisyakuhotera. Kĩsĩ-kĩsĩ nyiti, Ukenge omulenge wʼOmwami Mukulu umwʼebyo ngakubwira, neryo omwatsi asyakowanako, nʼomutima wawe asyabyaho.

²¹ Nĩkwa wamaswagana erihuluka, ekĩ kyo kĩnywa Omwami Mukulu abĩrĩnyĩkangya ati,

²² Lebaya, abakalĩ bosĩ abasĩganĩbawa omo kikali kyʼOmwami wʼeYũda, basyahũlũkĩrĩbwa oko bakulu bʼomwami wʼeBabelĩ, nʼabakalĩ abo basyabũga batĩ, Abĩra bawe banze babĩrĩkũtalya, babĩrĩkũkĩnda. Omugulu ebisando byawe byatobera omo londo, mobabũnũkala.

²³ Kandi basyahũlũkĩrya Abakaldea abakalĩ bawe bosĩ nʼabagala bawe kandi nawe siwendisyabala omo byala byabo, nĩkwa wasyahambwa omo byala byʼOmwami wʼeBabelĩ, nʼomũyĩ oyũ ĩnĩalũsĩbwa omo muliro.

²⁴ Neryo Zedekĩa mwabwira Yeremĩa ati, Suleke omundu akaminya ebĩnywa ebĩ, nawe siwendihola.

²⁵ Nĩkwa abakulu bamowa ngoko nabĩrĩkanĩa nawe, bakakũhĩkako bakakubwira bati, Ũtũtũlĩre ebyo wabiribwira omwami. Sũtũbĩsebyo, netu sĩtwendĩkwĩta, kandi utubwire ebyo mwami aliakubwira.

²⁶ Neryo wasyabwirabo uti, Mongasaba omwami nyiti sĩanyĩsũbaye omo nyũmba ya Yonatana eriholeramo.

²⁷ Neryo abakulu bosĩ mobahĩka uku Yeremĩa, erĩmũbũlya, naye mwabwirabo ngʼebĩnywa byosĩ ebyo mwami amuhana. Neryo mobaleka erĩbũga naye, kusangwa omwatsi oyo mwataminyikala.

²⁸ Neryo Yeremĩa mwĩkala omo kibuga kyʼenyũmba yʼabateya erĩhĩka ekiro eYerũsalema yahũngawa.