Yeremĩa 37 - AMASAKO ABOYTRTRE WA NYAMUHANGA AWAKAHULAWA MO BIBLIA

Omwatsi wʼemilondo ya Farao nʼeyʼAbakaldea

¹ Na Zedekĩa mugala wa Yosĩa mwatabala ngʼOmwami omo mwanya wa Konĩa mugala wa Yehoyakĩmũ, oyo Nebũkadeneza omwami wʼeBabelĩ ayira mo mwami omo kihugo kyʼeYũda.

² Nĩkwa iye kutse abagombe buwe, kutse abandu bʼekihugo mobatahulikirira ebĩnywa byʼOmwami Mukulu, ebyo abũga nʼomũmĩnyererĩ Yeremĩa.

³ Nĩkwa omwami Zedekĩa mwatuma Yehũkalĩ mugala wa Selemĩa, na Zefania mugala wʼomũhererĩ Masea ko mũmĩnyererĩ Yeremĩa ati, Lino kĩsĩ-kĩsĩ utusabire oko Mwami Mukulu Nyamuhanga wetu.

⁴ Neryo Yeremĩa abya iniakalaba omo katĩkatĩ kʼabandu, kusangwa ĩsĩbetamũhĩra omo mũlĩkĩ.

⁵ Neryo emilondo yʼabasĩrĩkanĩ ba Farao yabya iyabirihuluka ĩkalũa eMĩsĩrĩ. Nʼomugulu Abakaldea ababya bakagotera eYerũsalema bowa engulu yabo mobaleka eribambira eYerũsalema.

⁶ Neryo ekĩnywa kyʼOmwami Mukulu mokyahĩka oko mũmĩnyererĩ Yeremĩa kiti,

⁷ Omwami Mukulu, Nyamuhanga wa Ĩsraelĩ ati, Mwasyabwira omwami wʼeYũda oyo wabatuma ũkwʼĩngye erĩnyĩbũlya muti, Lebaya, emilondo yʼabasĩrĩkanĩ ba Farao eyahuluka erĩbawatĩkya, yasyasuba eMĩsĩrĩ omo kihugo kyabo.

⁸ Kandi Abakaldea basyaswasa nʼerilwa nʼomũyĩ oyũ, basyĩmyago basyahũngago nʼerĩhĩsyago omo muliro.

⁹ Omwami Mukulu ati, Sĩmũyĩtebaye muti, Abakaldea basyatũlũako, kusangwa sibendisyagenda.

¹⁰ Kusangwa nomo mwangĩtĩre emilondo yosĩ yʼabasĩrĩkanĩ bʼAbakaldea abakalwa nenyũ, nʼabahutere basa bakasaka omo katĩkatĩ kabo, obuli mundu omo hema yiwe, banganahangana nʼerĩhĩsya omũyĩ oyũ omo muliro.

Ĩrĩa akaboha Yeremĩa

¹¹ Neryo omugulu emilondo yʼabasĩrĩkanĩ bʼAbakaldea yamabĩlũa eYerũsalema busana nʼeriubaha emilondo ya Farao,

¹² neryo Yeremĩa mwahuluka akalũa eYerũsalema eriya omo kihugo kya Benyamĩna, eribana erĩgabo liwe eyo omo katĩkatĩ kʼabandu.

¹³ Nʼomugulu abya omo lũkyo lwa Benyamĩna, omukulu wʼabateya abyaho, erĩna liwe lyabya Ĩrĩa, mugala wa Selemĩa, mugala wa Hanania. Naye mwahamba omũmĩnyererĩ Yeremĩa ati, Ukatswera eyiri Abakaldea!

¹⁴ Neryo Yeremĩa mwabũga ati, Nĩ mabehĩ! Sinditswera eyiri Abakaldea. Nĩkwa Ĩrĩa mwatamuhulikirira. Neryo Ĩrĩa mwahamba Yeremĩa mwamuleta eyiri abakulu.

¹⁵ Neryo abakulu mobahitana uku Yeremĩa, mobamũswĩrya, mobamũhĩra omo mũlĩkĩ omo nyũmba yʼomũhandĩkĩ Yonatana; kusangwa ho babya bahĩrĩre enyũmba yʼomũlĩkĩ.

¹⁶ Kusangwa Yeremĩa ĩnĩamabĩhĩka omo nyũmba yʼobuhya, kyo kyũna kiri-kiri. Na Yeremĩa mwabyamo ebiro bingi.

¹⁷ Neryo omwami Zedekĩa mwatumayo mwamũlũsyamo. Omwami mwamũbũlya bũbĩso-bĩso omo kikali kiwe ati, Ko hane ekĩnywa ekĩkalũa oko Mwami Mukulu kwehĩ? Na Yeremĩa mwabũga ati, Kine! Mwabũga nibya ati, Wasyahĩrwa omo byala byʼOmwami wʼeBabelĩ.

¹⁸ Kandi Yeremĩa mwabwira omwami Zedekĩa ati, Namatakola kibi kyahi busana nawe, kutse busana nʼabagombe bawe, kutse busana nʼabandu aba, kyalekĩre ĩmwanyĩhĩra omo mũlĩkĩ kwehĩ?

¹⁹ Lino abamĩnyererĩ benyũ bali hahi abaminyerera busana nenyũ bati, Omwami wʼeBabelĩ siendisyalwa nenyũ, kutse erilwa nʼekihugo kino kwehĩ?

²⁰ Na lino kĩsĩ-kĩsĩ uhulikirire, uwe mwami mukama wage. Kĩsĩ-kĩsĩ, nyiti uleke erigonga-gonga lyage lĩhĩke embere syawe, sũnyĩsũbaye omo nyũmba yʼomũhandĩkĩ Yonatana, ngasyaholeramo.

²¹ Neryo omwami Zedekĩa mwahamula, neryo mobahĩra Yeremĩa omo kibuga kyʼenyũmba yʼabateya. Kandi mobamuha obuli kiro embiga yʼobundu ĩbũkalũa omo nzira yʼabatsũmbĩ bʼobundu, erĩhĩka aho amandu gosĩ wʼomũyĩ ahwera. Litya Yeremĩa mwĩkala omo kibuga kyʼenyũmba yʼabateya.