Yeremĩa 36 - AMASAKO ABOYTRTRE WA NYAMUHANGA AWAKAHULAWA MO BIBLIA

Barũkũ akasoma ekitabu omo Hekalũ, Yeremĩa ĩnĩanabohĩre

¹ Neryo oko mwaka wʼakani wa Yehoyakĩmũ mugala wa Yosĩa, omwami wʼeYũda, ekĩnywa ekĩ mokyahĩka uku Yeremĩa kĩkalũa oko Mwami Mukulu, kiti,

² Ũyĩmĩraye ekĩkũnzo kyʼekitabu, Usake mukyo ebĩnywa byosĩ ebyo nabirikubwira busana na Ĩsraelĩ, na busana na Yũda, na busana nʼebihanda byosĩ, erĩtsũka oko kiro nakubwira, nʼerĩtsũka oko biro bya Yosĩa, nʼerĩhĩka mũnabwĩre.

³ Kwamũhwa ekihanda kya Yũda kyasyowa erĩkwa lyosĩ eryo ngaganĩraya erikolabo. Ibaminya eribindula emitima yabo obuli mundu erireka enzira yiwe nyibi. Nage inabuyira ebibi byabo nʼobubi bwabo.

Ebĩnywa byʼekĩkũnzo bikasomawa

⁴ Neryo Yeremĩa mwabirikira Barũkũ mugala wa Nerĩa, neryo Barũkũ mwasaka oko kĩkũnzo kyʼekitabu Yeremĩa akamubwira ebĩnywa byosĩ byʼOmwami Mukulu, ebyo amubwira.

⁵ Neryo Yeremĩa mwahana Barũkũ ati, Nyĩbohĩre. Sinditoka eriya omo nyũmba yʼOmwami Mukulu.

⁶ Neryo ugende omo kiro kyʼeritsira akalyo omo nyũmba yʼOmwami Mukulu, usomere ekĩkũnzo omo matwĩ wʼabandu ebyo wabirisaka bĩkalũa omo buno bwage byo bĩnywa byʼOmwami Mukulu. Kandi wasyasomerabyo omo matwĩ wʼabandu bosĩ bʼeYũda abakalũa omo mĩyĩ yabo.

⁷ Kwamũhwa erisaba lyabo lyasyahĩka embere syʼOmwami Mukulu, nʼobuli mundu iniabindula omutima erireka enzira nyibi yiwe, kusangwa erihitana nʼeriagalirwa nĩ rĩnene kutsibu, eryo Mwami Mukulu abĩrĩbũga busana nʼabandu aba.

⁸ Neryo Barũkũ mugala wa Nerĩa mwakola ngʼebyosĩ ebyo mũmĩnyererĩ Yeremĩa amuhana, iniakasoma omo kitabu ebĩnywa byʼOmwami Mukulu omo nyũmba yʼOmwami Mukulu.

⁹ Neryo oko mwaka wʼakatanu wa Yehoyakĩmũ mugala wa Yosĩa omwami wʼeYũda oko mukera wʼomwenda, abandu bosĩ bʼeYerũsalema, nʼabandu bosĩ abahĩka eYerũsalema bakalũa omo mĩyĩ yʼeYũda, mobayira eritsira akalyo embere syʼOmwami Mukulu.

¹⁰ Neryo Barũkũ mwasoma omo kitabu ebĩnywa bya Yeremĩa omo nyũmba yʼOmwami Mukulu, omo kyumba kya Gemarĩa mugala wa Safanũ omũhandĩkĩ, omo kibuga kyʼendata, oko bwingiriro bwʼOlũkyo Luhya-luhya lwʼenyũmba yʼOmwami Mukulu, omo matwĩ wʼabandu bosĩ.

Barũkũ akasoma ebĩnywa

¹¹ Neryo omugulu Mĩkaya mugala wa Gemarĩa, mugala wa Safanũ, owa ebĩnywa byosĩ byʼOmwami Mukulu ebyalũa omo kitabu,

¹² Mĩkaya mwandagalira omo nyũmba yʼOmwami, omo kisenge kyʼomũhandĩkĩ. Neryo lebaya, abakulu bosĩ ĩbanĩkeremo, omũhandĩkĩ Elĩsama, na Delaya mugala wa Semaya, na Elnatana mugala wa Akĩbora, na Gemarĩa mugala wa Safanũ, na Zedekĩa mugala wa Hanania, nʼabandi bakulu bosĩ.

¹³ Neryo Mĩkaya mwatũlĩrabo ebĩnywa byosĩ ebyo owa, omugulu Barũkũ asomera ekitabu omo matwĩ wʼabandu.

¹⁴ Neryo abakulu bosĩ mobatuma Yehũdĩ mugala wa Netanĩa, mugala wa Selemĩa, mugala wa Kũsĩ, eyiri Barũkũ bati, Wĩmaye omo byala byawe ekĩkũnzo ekyo wasomera omo matwĩ wʼabandu, wase. Neryo Barũkũ mugala wa Nerĩa mwĩmya omũkũnzo omo byala biwe, mwahĩka kubo.

¹⁵ Neryo mobamubwira bati, Kĩsĩ-kĩsĩ Wĩkale ahisi utusomerekyo. Neryo Barũkũ mwasomera kyobo.

¹⁶ Neryo, babere babĩowa ebĩnywa byosĩ, mobakeberana omʼubaha, mobabwira Barũkũ bati, Lero tukandibwira omwami ebĩnywa ebĩ byosĩ.

¹⁷ Neryo mobabũlya Barũkũ bati, Kĩsĩkĩsĩ utubwire nga wasaka ebĩnywa ebĩ byosĩ uti? Yeremĩa yo wakubwirabyo kwehĩ?

¹⁸ Neryo Barũkũ mwasũbĩryabo ati, Iye mwambwira ebĩnywa ebĩ byosĩ omo buno buwe, nage monasakabyo omo bwĩno omo kitabu.

¹⁹ Neryo abakulu mobasyabwira Barũkũ bati, Ugende, ũyĩbĩse, uwe muna Yeremĩa. Simuleke omundu akaminya aho muli.

Omwami akahĩsaya ekitabu

²⁰ Neryo mobaya eyiri omwami omo kibuga. Nĩkwa babya ibabiribika ekĩkũnzo ekyo omo kyumba kyʼomũhandĩkĩ Elĩsama, kandi mobatũlĩra omwami ebĩnywa ebĩ byosĩ.

²¹ Neryo omwami mwatuma Yehũdĩ erienda ekĩkũnzo ekyo, naye mwalũsyakyo omo kyumba kyʼomũhandĩkĩ Elĩsama. Neryo Yehũdĩ mwasomerakyo omwami, nʼabakulu bosĩ ababya bimene aho mũsĩke wʼOmwami.

²² Neryo omwami abya ĩkere omo nyũmba yʼomugulu wʼembeho, oko mukera wʼomwenda. Kandi ihane omuliro owakaka omo lĩnzanza embere siwe.

²³ Neryo Yehũdĩ abere abisoma emilondo ĩsatu kutse ĩnĩ, neryo omwami mwatũakyo omo kahamba kʼomũhandĩkĩ, mwagusakyo omo muliro owabya omo lĩnzanza, erĩhĩka aho ekĩkũnzo kyosĩ kyamabihwerekerera omo muliro oyo.

²⁴ Nĩkwa omwami nʼabagombe buwe mobatubaha, kutse erĩsatya esyongimba syabo, omugulu bowa ebĩnywa ebĩ byosĩ.

²⁵ Nomo Elnatanĩ na Delaya na Gemarĩa basaba omwami Sĩahĩsaye ekĩkũnzo ekyo, mwatalĩga erĩowabo.

²⁶ Neryo omwami mwahamula Yeramelĩ mugala wʼOmwami, na Seraya mugala wa Azĩrĩelĩ, na Selemaya mugala wa Abũdĩelĩ, bahambe omũhandĩkĩ Barũkũ nʼomũmĩnyererĩ Yeremĩa, nĩkwa Omwami Mukulu mwabĩsabo.

Ekĩkũnzo kyʼekitabu kikasakawa engendo yʼakabiri

²⁷ Neryo ekĩnywa kyʼOmwami Mukulu mokyahĩka eyiri Yeremĩa, omwami abĩhĩsya ekĩkũnzo ekyo nʼebĩnywa ebyo Barũkũ asaka bĩkalũa omo buno bwa Yeremĩa, kiti,

²⁸ Ũyĩmĩraye kandi ekindi kĩkũnzo, Usake mukyo ebĩnywa byosĩ byʼerĩmbere ebyabya omo kĩkũnzo kyʼerĩmbere, ekyo Yehoyakĩmũ omwami wʼeYũda ahĩsaya.

²⁹ Kandi wasyabũga busana na Yehoyakĩmũ omwami wʼeYũda uti, Omwami Mukulu akabũga ati, Wabĩrĩhĩsya ekĩkũnzo ekĩ, uti, Busana nakĩ wabirisaka mukyo uti, Omwami wʼeBabelĩ asyasa nʼerĩherya ekihugo ekĩ, kandi asyaleka abandu nʼesyonyama ĩbũmbya mukyo kwehĩ?

³⁰ Neryo Omwami Mukulu akabũga busana na Yehoyakĩmũ omwami wʼeYũda ati, Sihendisyabya mundu owʼerĩĩkala oko kĩtũmbĩ kyʼobwami bwa Dawĩdĩ. Nʼekĩnda kiwe kyasyaguswa eyĩhya omwʼĩhũhana lyʼomusibo nʼomo kiro omwʼitsuku.

³¹ Nage nasyamusuyira nʼabana buwe nʼabagombe buwe busana nʼebibi byabo. Kandi nasyaleta kubo nʼoko syondũlanĩ syʼeYerũsalema nʼoko bandu bosĩ bʼeYũda, erĩkwa lyosĩ eryo nabĩrĩbũga busana nabo, nĩkwa mobatowa.

³² Neryo Yeremĩa mwĩmya ekindi kĩkũnzo kyʼekitabu, mwahakyo omũhandĩkĩ Barũkũ, mugala wa Nerĩa, naye mwasaka mũkyo Yeremĩa akamubwira ebĩnywa byosĩ byʼekitabu ekyo Yehoyakĩmũ omwami wʼeYũda ahĩsaya omo muliro. Kandi ebĩnywa bingi ebiri ngabyo mobyatomekerwa kubyo.