Yeremĩa 34 - AMASAKO ABOYTRTRE WA NYAMUHANGA AWAKAHULAWA MO BIBLIA

Eriminyerera busana na Zedekĩa

¹ Ekĩnywa ekyahĩka uku Yeremĩa kĩkalũa oko Mwami Mukulu, omugulu Nebũkadeneza omwami wʼeBabelĩ, nʼabasĩrĩkanĩ buwe bosĩ, nʼamami gosĩ wʼekihugo ababya omwʼitabala liwe, nʼabandu bosĩ ababya bakalwa nʼeYerũsalema, nʼemĩyĩ yosĩ yaho, kiti,

² Omwami Mukulu Nyamuhanga wa Ĩsraelĩ akabũga ati, Ugende Ubwire Zedekĩa, omwami wʼeYũda, umubwire uti, Omwami Mukulu ati, Lebaya, nasyahĩra omũyĩ oyũ omo byala byʼOmwami wʼeBabelĩ, naye asyahĩsyago omo muliro.

³ Kandi siwendisyabala ebyala biwe, nĩkwa kwenene wasyahambwa, nʼerĩhĩrwa omo byala biwe. Nʼameso wawe asyasamalira ameso wʼOmwami wʼeBabelĩ, kandi asyabũga nawe obuno oko buno, nawe wasyaya eBabelĩ.

⁴ Nĩkwa uwe Zedekĩa omwami wʼeYũda, wowe ekĩnywa kyʼOmwami Mukulu! Omwami Mukulu akabũga busana nawe ati, Siwendisyahola omo mũyalĩ.

⁵ Wasyahola omo buholo. Basyakũtũmbĩrya obukwa ngoko batũmbayabo busana nʼabotata wawe, abami bʼerĩmbere ababya embere ukʼuwe. Kandi basyakulirira bati, Ĩyoo mukama! Kusangwa ĩngye nabĩrĩbũga ekĩnywa ekĩ, Omwami Mukulu atya.

⁶ Neryo omũmĩnyererĩ Yeremĩa mwabwira Zedekĩa omwami wʼeYũda ebĩnywa ebĩ byosĩ eYerũsalema

⁷ omugulu abasĩrĩkanĩ bʼomwami wʼeBabelĩ babya bakalwa nʼeYerũsalema, nʼemĩyĩ yosĩ yʼeYũda eyasaka, erilwa nʼeLakĩsĩ nʼerilwa nʼeAzeka, kusangwa eyĩ misa yo yasaka oko mĩyĩ yʼeYũda, emĩyĩ eyikongotere.

Eribohola nʼeriswaboha abakobe

⁸ Ekĩnywa ekyahĩka uku Yeremĩa kĩkalũa oko Mwami Mukulu, enyũma wʼendagano omwami Zedekĩa ayira nʼabandu bosĩ ababya eYerũsalema, erĩtũlĩrabo obwĩranda.

⁹ Obuli mundu abohole omukobe wuwe wʼobulume nʼowʼobũkalĩ, Omuebrania wʼobulume, nʼOmuebrania wʼobũkalĩ, babye nʼobwĩranda, Sihabye mundu oyukayira Omuebrania mũlĩkyabo mo mukobe.

¹⁰ Nʼabakulu bosĩ nʼabandu bosĩ mobalĩga, abayira endagano eyĩ, obuli mundu abohole omukobe wuwe wʼobulume nʼomukobe wuwe wʼobũkalĩ, Sihabye oyukayirabo mo bakobe kandi. Neryo mobalĩga, mobaboholabo.

¹¹ Nĩkwa enyũma mobabinduka, mobasũbya abakobe bʼobulume nʼabʼobũkalĩ abo babohola omo bukobe babye bakobe bʼobulume nʼabʼobũkalĩ.

¹² Neryo ekĩnywa kyʼOmwami Mukulu, mokyahĩka uku Yeremĩa kĩkalũa oko Mwami Mukulu kiti,

¹³ Omwami Mukulu Nyamuhanga wʼeĨsraelĩ ati, Monayira endagano nʼabotata-kulu wenyũ ekiro nalũsayabo omo kihugo kyʼeMĩsĩrĩ, erĩlũa omo nyũmba yʼobukobe, nyiti,

¹⁴ Emyaka irinda yamabihwa obuli mundu ũkwʼĩnywe asyabohola mũlĩkyabo Omuebrania oyo wagũlĩbawa ukʼuwe nʼerikukolera emyaka ndatu, wasyamubohola alũe ukʼuwe abye bwĩranda. Nĩkwa abotata-kulu wenyũ mobatambulikirira, kutse eritega amatwĩ wabo.

¹⁵ Nenyũ mwabya imwabiribinduka, imwabirikola ekitunganene omo meso wage erĩtũlago eribohola obuli mundu mũlĩkyabo, kandi imwabiriyira endagano embere syage omo nyũmba eyikahulawa omo lĩna lyage.

¹⁶ Nĩkwa mwabĩrĩbũnũkala nʼeritsuma erĩna lyage, obuli mundu mwasũbya omukobe wuwe wʼobulume nʼomukobe wuwe wʼobũkalĩ abo mwabohola eribya bwĩranda ngoko banzĩre, kandi mwabĩrĩgondyabo babye bakobe benyũ abʼobulume nʼabʼobũkalĩ.

¹⁷ Busana nʼekyo; Omwami Mukulu ati, Simulitambulikirira, erĩtũlago eribohola obuli mundu mugala wabo, nʼobuli mundu mũlĩkyabo. Omwami Mukulu ati, Lebaya, ngabatũlĩra obwĩranda bwʼomũyalĩ nʼobwʼendwala yʼakasũsũ, nʼobwʼenzala. Kandi nasyabayira ekyʼerĩũbahya omo katĩkatĩ kʼamami gosĩ wʼekihugo.

¹⁸ Kandi nasyayira abandu abo abahalaya oko ndagano yage, abataberereraya ebĩnywa byʼendagano eyo bayira embere syage, omugulu batula ekyana kyʼende ekyo batula mo bihande bibiri nʼerilaba omo katĩkatĩ kʼebihande byakyo ebyo,

¹⁹ abakulu bʼeYũda, nʼabakulu bʼeYerũsalema, nʼabakulu bʼomwami, nʼabahererĩ, nʼabandu bosĩ bʼekihugo, abalaba omo katĩkatĩ kʼebihande byʼekyana kyʼende.

²⁰ Nasyahabo omo byala byʼesyonzĩgũ syabo, nʼomo byala byʼabandu abakasonda engebe yabo. Nʼebĩnda byabo byasyabya kalyo kʼesyonyonyũ syʼomo kyanya, nʼakʼesyonyama syʼomolĩ.

²¹ Na Zedekĩa omwami wʼeYũda nʼabakulu buwe nasyahabo omo byala byʼesyonzĩgũ syabo, nʼomo byala byʼabo abakasonda-sonda engebe yabo, nʼomo byala byʼabasĩrĩkanĩ bʼomwami wʼeBabelĩ, ababirigenda erĩlũa ewenyũ.

²² Omwami Mukulu ati, Lebaya, nasyahamula, nʼerĩsũbyabo oko mũyĩ ono. Kandi basyalwa nago, nʼerĩhũngago, nʼerĩhĩsyago omo muliro. Kandi nasyayira emĩyĩ yʼeYũda eribya kĩma, eyite mo mundu.