Yeremĩa 32 - AMASAKO ABOYTRTRE WA NYAMUHANGA AWAKAHULAWA MO BIBLIA

Erĩhũngwa lya Zedekĩa

¹ Ekĩnywa ekyahĩka uku Yeremĩa kĩkalũa oko Mwami Mukulu oko mwaka wʼerĩkũmĩ wʼOmwami wʼeYũda ye Zedekĩa, abya mwaka wʼerĩkũmĩ nʼomunani wa Nabũkadeneza.

² Oko mugulu oyo abasĩrĩkanĩ bʼomwami wʼeBabelĩ babya bakagotera eYerũsalema. Na Yeremĩa omũmĩnyererĩ iniabohere omo kibuga kyʼabateya, ekyabya omo nyũmba yʼOmwami wʼeYũda.

³ Kusangwa Zedekĩa omwami wʼeYũda iniabirimuboha, ati, Busana nakĩ ukaminyerera, nʼerĩbũga uti, Omwami Mukulu ati, Lebaya, nasyaha omũyĩ oyũ omo byala byʼOmwami wʼeBabelĩ, naye asyĩmyago;

⁴ kandi uti, Zedekĩa omwami wʼeYũda Siendisyabala akalũa omo byala byʼAbakaldea, nĩkwa kwenene asyahĩrwa omo byala byʼOmwami wʼeBabelĩ, asyabũga naye obuno oko buno, nʼameso oko meso.

⁵ Naye asyaleta Zedekĩa eBabelĩ kandi asyabyayo erĩhĩka aho nasyayamũlũngũlĩra, Omwami Mukulu atya. Nomo mwangalwa nʼAbakaldea, simwendisyatoka.

Yeremĩa akagula eririma

⁶ Neryo Yeremĩa mwabũga ati, Ekĩnywa kyʼOmwami Mukulu mokyambĩkako kiti,

⁷ Lebaya, Hanamelĩ, mugala wa Salumu nyoko-lume wawe asyakũhĩkako ati, Uyigulire eririma lyage eriri eAnatotĩ, kusangwa uwite ehamũlĩ yʼerĩtongolya erigulalyo.

⁸ Neryo Hanamelĩ mugala wa nyoko-lume wage mwambĩkako omo kibuga kyʼabateya ngʼekĩnywa ekyo, kyʼOmwami Mukulu, neryo mwabũga nage ati, Ngakũbũlaya nyiti, Gula eririma lyage eriri eAnatotĩ eriri omo kihugo kya Benyamĩna, kusangwa ehamũlĩ yʼerĩsĩgalyalyo ni yawe, nʼerĩtongolya ni ryawe. Uyigulireryo. Neryo monaminya ekĩ ko kiri kĩnywa kyʼOmwami Mukulu.

⁹ Neryo monagula eririma eryabya eAnatotĩ ewa Hanamelĩ mugala wa nyokolume, kandi monamulengera esyofranka, esyosekelĩ syʼekĩtsĩpa ĩkũmĩ nʼesirinda.

¹⁰ Neryo monasaka oko barua yalyo, monahĩra ekĩmĩnyĩsyo, kandi monabirikira abalangĩrĩ, kandi monamulengera ebĩtsĩpa oko kĩlo.

¹¹ Neryo monĩmya ebarua yalyo yʼerigula, eyahĩrawako ekĩmĩnyĩsyo, nʼemyatsi nʼemitsye ko yiri, nʼebarua yalyo eyiminyikere.

¹² Kandi monaha ebarua eyo yʼerigula uku Barũkũ mugala wa Nerĩa, mugala wa Masea, omo meso wa Hanamelĩ mugala wa nyoko-lume, nʼomo meso wʼabalangĩrĩ abasaka oko barua eyo yʼerigula-embere wʼAbayũda bosĩ ababya bĩkere omo kibuga kyʼabateya.

¹³ Neryo monahana Barũkũ embere syabo, nyiti,

¹⁴ Omwami Mukulu wʼemilondo, Nyamuhanga wa Ĩsraelĩ akabũga ati, Wĩmaye esyobarua esĩ, ebarua eyĩ yʼerigula eyiri kwʼekĩmĩnyĩsyo nʼebarua eyĩ eyiminyikere mũhĩresyo omo nyungu yʼeribumba, isyatoka eribyaho ebiro bingi.

¹⁵ Kusangwa Omwami Mukulu wʼemilondo, Nyamuhanga wa Ĩsraelĩ, ati, Amanyũmba nʼamalima, nʼamalima wʼebĩnyũ, asyagulwa kandi omo kihugo kino.

Erisaba lya Yeremĩa

¹⁶ Neryo nabere nabiha Barũkũ mugala wa Nerĩa ebarua eyo yʼerigula, monasaba Omwami Mukulu nyiti,

¹⁷ Uwe Mukama Omwami Mukulu! Lebaya, wabirihangika olubula nʼekihugo omo bũtokĩ bwawe bunene nʼamaka wawe. Sihali kindu ukatalukako.

¹⁸ Uwe ũkakangaya olwanzo lubuya oko elfu, oyũkalĩhĩsaya ebibi byʼabotata oko bana babo enyũma wabo, uwe, Nyamuhanga Mukulu wʼobũtokĩ, Omwami Mukulu wʼemilondo lyo lĩna liwe.

¹⁹ Uli mukulu omwʼihana, owʼobũtokĩ omo mũbĩrĩ. Nʼameso wuwe alolĩre esyonzira syʼabagala bʼabandu, eriha obuli mundu ngʼolulengo lwʼesyonzira siwe, kandi ngʼolulengo lwʼemĩbĩrĩ bakakola.

²⁰ Uwe wahĩra ebiminyikalo nʼebyʼeriswekera omo kihugo kyʼeMĩsĩrĩ erĩhĩka na mũnabwĩre omo Baĩsraelĩ nʼomo katĩkatĩ kʼabandi bandu. Kandi mowayiyirira erĩna, ngoko liri mũnabwĩre.

²¹ Mowalũsya abandu bawe Ĩsraelĩ bʼomo kihugo kyʼeMĩsĩrĩ nʼebiminyikalo, nʼebyʼeriswekera, omo byala bĩkalĩre nʼomo kuboko kũyĩsũmbĩre nʼomo erĩũbahya lĩnene.

²² Mowahabo ekihugo ekĩ ekyo walahĩrĩraya abotata wabo erihabo, ekihugo ekyoswĩre mwʼamasabũ nʼobuki.

²³ Nabo mobingira mukyo, mobasĩgalyakyo, nĩkwa mobatakenga omulenge wawe, kutse erirendera omo mugambo wawe. Sibetakola ekĩnywa nʼekiguma omo byosĩ ebyo wahanabo erikola. Busana nʼekyo wabirireta erĩkwa erĩ ryosĩ kubo.

²⁴ Lebaya, ebilundo byʼekitaka byabĩrĩhĩka oko mũyĩ erĩhũngago. Nʼomũyĩ oyũ abirihabwa omo byala byʼAbakaldea abakalwa nago, busana nʼomũyalĩ, na busana nʼenzala, na busana nʼendwala yʼakasũsũ. Nʼekyo wabũga kyabiribererera, neryo lebaya, ukalangirakyo.

²⁵ Nawe Mwami Mukulu Mukama wabirimbwira uti, Uyigulire eririma eryo oko franka, kandi ubirikire abalangĩrĩ, nʼomũyĩ abirihabwa omo byala byʼAbakaldea nibya.

Nebũkadeneza akandĩhũnga Ĩsraelĩ

²⁶ Neryo ekĩnywa kyʼOmwami Mukulu mokyahĩka uku Yeremĩa, kiti,

²⁷ Lebaya, ĩngye indi Mwami Mukulu, Nyamuhanga wʼemibiri yosĩ. Ko hane kindu ekikanyirema kwehĩ?

²⁸ Neryo Omwami Mukulu akabũga, ati, Lebaya, ngahĩra omũyĩ oyũ omo byala byʼAbakaldea, nʼomo byala bya Nebũkadeneza omwami wʼeBabelĩ, naye asyahũngago.

²⁹ NʼAbakaldea, abakalwa nʼomũyĩ oyũ, basyingiramo nʼerĩhĩra omuliro oko mũyĩ nʼerĩhĩsyago, haguma nʼamanyũmba, aho bandu baherera Baalĩ obukwa oko nyitwe syabo, nʼerĩũtũlĩra esindi nyamuhanga amahere wʼerĩpũlya erĩnyĩhĩtanĩa.

³⁰ Kusangwa abana ba Ĩsraelĩ nʼabana ba Yũda babirikola ebĩtowene bisa-bisa omo meso wage erĩtsũka obũlwana bwabo. Omwami Mukulu atya, kusangwa abana ba Ĩsraelĩ babĩrĩnyĩhĩtanĩa lisa-lisa omo mĩbĩrĩ yʼebyala byabo.

³¹ Kandi omũyĩ oyũ abiribya ekĩkanyĩhĩtanaya nʼerĩnyagalĩranĩa erĩtsũka ekiro bahĩmbago nʼerĩhĩka mũnabwĩre, inabana erĩlũsyago embere syʼobũsũ bwage,

³² busana nʼebibi byosĩ byʼabana ba Ĩsraelĩ nʼabana ba Yũda ebyo bakola erĩnyĩhĩtanĩa, ibo, nʼabami babo, nʼabasondolĩ babo, nʼabahererĩ babo, nʼabamĩnyererĩ babo, nʼabandu ba Yũda, nʼesyondũlanĩ syʼeYerũsalema.

³³ Kandi babĩrĩnyĩlolya kwʼemigongo yabo, butsira obũsũ bwabo. Nomo nanakangĩrĩrayabo, erĩkangĩrĩryabo kandi nʼakandi, nĩkwa mobatahulikirira nʼeriangirira erihanwa.

³⁴ Nĩkwa mobasingika esyonye syabo omo nyũmba eyikahulawa omo lĩna lyage, nʼerĩhalyayo.

³⁵ Kandi mobahĩmba ahendata busana na Baalĩ, ahali omusya wʼomugala wa Hĩnomũ, erĩlabya abagala babo nʼabali babo omo muliro busana na Molekĩ, ebyo ndahanabo, kutse mokitingira omo malengekanĩa wage, bati bakakola esyonye esĩ, erĩhalĩsya Yũda.

Nyamuhanga akakumirabo haguma

³⁶ Neryo lino Omwami Mukulu, Nyamuhanga wa Ĩsraelĩ, akabũga ati, busana nʼomũyĩ oyũ, ogo mukahula muti, Abirihabwa omo byala byʼOmwami wʼeBabelĩ omo mũyalĩ, nʼomo nzala, nʼomo ndwala yʼakasũsũ.

³⁷ Lebaya, nasyahĩndanĩabo erĩlũsyabo omo bihugo byosĩ eyo nahigirabo omwʼihitana lyage nʼomwʼagalirwa lyage, nʼomwʼihiririkana lyage ringi. Kandi nasyaletabo hano, kandi nasyĩkalyabo buholo.

³⁸ Nabo basyabya bandu bage, nage nasyabya Nyamuhanga wabo.

³⁹ Nage nasyahabo omutima muguma nʼenzira nguma, batoke erinyubaha kera na kera, busana nʼerĩowanĩabo, na busana nʼerĩowana lyʼabana babo enyũma wabo.

⁴⁰ Nage nasyayira endagano ya kera na kera haguma nabo nyiti, sindiendisyakita okwʼikwamabo erikolerabo ebibuya, kandi nasyahĩra olubahwa lwage omo mitima yabo, ĩbatanyĩsĩganĩa.

⁴¹ Ega, nasyatsemerabo erikolerabo ebibuya, kandi nasyahandabo kwenene kwenene omo kihugo ekĩ nʼomutima wage gosĩ nʼomo kĩrĩmũ kyage kyosĩ.

⁴² Kusangwa Omwami Mukulu akabũga ati, Ngoko nabiriretera abandu aba erĩkwa erĩ ryosĩ, ko nasyaleterabo nyitya ebibuya byosĩ ebyo ngalagabo.

⁴³ Amalima asyagulwa omo kihugo ekĩ, ekyo mukahula muti nĩ kĩma, omute bandu kutse nyama. Kyabirihabwa omo byala byʼAbakaldea.

⁴⁴ Abandu basyagula amalima oko franka, nʼerisaka ebarua yago, nʼerĩhĩra ekĩmĩnyĩsyo kugo, nʼeribirikira abalangĩrĩ, omo kihugo kya Benyamĩna, hakũhĩ nʼeYerũsalema, nʼomo mĩyĩ ya Yũda, nʼomo mĩyĩ yʼekihugo kyʼebitwa, nʼomo mĩyĩ yʼomwʼirungu, nʼomo mĩyĩ yʼelutambi lwʼeyĩkwa, kusangwa nasyasũbya omũyĩsa wabo, Omwami Mukulu atya.