Yeremĩa 31 - AMASAKO ABOYTRTRE WA NYAMUHANGA AWAKAHULAWA MO BIBLIA

Erisuba lya Ĩsraelĩ na Yũda

¹ Omwami Mukulu ati, Oko mugulu oyo nasyabya Nyamuhanga wʼebĩtũnga byosĩ bya Ĩsraelĩ, nabo basyabya bandu bage.

² Omwami Mukulu ati, Abandu ababala omũyalĩ omo mbwarara mobabana olukogo. Omugulu Abaĩsraelĩ basonda eriluhuka.

³ Omwami Mukulu mwahuluka kubo, akalũa hali ati, Ĩsraelĩ nabirikwanza nʼolwanzo lwa kera na kera. Neryo omo bubuya bʼolwanzo nabirikuleta.

⁴ Nasyaswakũhĩmba, nawe wasyahĩmbwa, uwe mumbesa wa Ĩsraelĩ! Wasyasitikwa kandi omo tutale, wasyahulukira omo masata wabo bakatsanga.

⁵ Kandi wasyahera amalima wʼebĩnyũ oko hitwa hyʼeSamarĩa. Abaherĩ basyaherabyo basyatsemera ebĩgũma byago.

⁶ Kusangwa hasyabya ekiro, omugulu abateya oko bitwa bya Efũraĩmũ basyabirikira bati, Muhangane, tuye eSĩonĩ, oko Mwami Mukulu Nyamuhanga wetu.

⁷ Kusangwa Omwami Mukulu ati, Mwimbire Yakobo nʼobutseme, mũbũgaye obogo omo katĩkatĩ kʼabakulu bʼebihanda. Mũtũlego, mupipe, mũbũge muti, Uwe Mwami Mukulu, ũlamaye abandu bawe, abasaka oko Baĩsraelĩ.

⁸ Lebaya, nasyaletabo erĩlũa omo kihugo kyʼelutambi lwʼendata, nʼerikuma-kumabo oko ndũlĩ syʼekihugo, kandi haguma nabo esyondĩma-tĩme, nʼebirema, nʼomukule, nʼomũkalĩ oyukakunda, haguma. Endeko nene yasyasuba eno.

⁹ Basyasa bakalira. Kandi nasyasondolabo ibanemusaba. Nasyalabyabo ahali esyonyũsĩ syʼamagetsi, omo nzira itunganene ĩsĩbendĩsyatwĩkala muyo. Kusangwa indi tata busana na Ĩsraelĩ, na Efũraĩmũ ni kambere kage.

¹⁰ Ĩnywe bihanda, muhulikirire ekĩnywa kyʼOmwami Mukulu, kandi mũtũlego omo bitsira byʼehali, mũbũge muti, Oyo wapanza-panza Ĩsraelĩ, asyamukuma-kuma nʼerĩmũteya, ngoko mũlĩsya akategaya ekihangulo kiwe.

¹¹ Kusangwa Omwami Mukulu abĩrĩtongolya Yakobo, abĩrĩmũtongolya omo byala byʼoyo wabya amũlengĩrye amaka.

¹² Nabo basyasa nʼeriimbira oko kitwa kyʼeSĩonĩ nʼerĩũsũla nʼobubuya bʼOmwami Mukulu, oko ngano, nʼebĩnyũ bihya-bihya, nʼamagũta, nʼehyana hyʼesyombũlĩ, nʼehyʼesyonde. Nʼomutima wabo asyabya ngʼeririma lĩkahĩrawa mwʼamagetsi, kandi Sibendisyaswabya nʼobũlĩge nʼahake.

¹³ Neryo omukondo asyatsema omwʼitsanga, nʼabalwana haguma nʼabakulu. Kusangwa nasyabindula eririra lyabo eribya butseme, kandi nasyakĩranĩabo, nʼerihabo obutseme busana nʼobũlĩge bwabo.

¹⁴ Omwami Mukulu ati, Kandi nasyũgũtya emitima yʼabahererĩ omo bĩnũnĩre, nʼabandu bage basyũgũta omo bubuya bwage, Omwami Mukulu atya.

¹⁵ Omwami Mukulu ati, Omulenge akogũbawa eRama, ekiriro, nʼeririra erĩkalĩre, Rakelĩ akalira busana nʼabana buwe. Akagana erĩkĩranĩbwa busana nʼabana buwe, kusangwa sibakiri.

¹⁶ Omwami Mukulu ati, lĩkakĩraye omulenge wawe sulire, nʼameso wawe siatoge mwʼemĩsonĩ. Omwami Mukulu ati, Kusangwa omũbĩrĩ wawe asyahembwa; nabo basyasa kandi erĩlũa omo kihugo kyʼenzĩgũ.

¹⁷ Omwami Mukulu ati, Kandi hane amaha busana nʼomugulu wawe owakandisyasa, nʼabana bawe basyasuba oko kihugo kyabo.

¹⁸ Kwenene nabĩrĩowa Efũraĩmũ akayiririrako ati, Wabirinyikunga neryo nabirikungwa, ngʼekyana kyʼende ekitabegere engomo. Ũnyĩsũbayeyo, nyisube ndeke, kusangwa uli Mwami Mukulu Nyamuhanga wage.

¹⁹ Kusangwa namabĩbũnũkala, monayiswekera. Neryo namabĩkangĩrĩrĩbwa, monayĩswĩrya oko kihinga kyage. Monakwa esĩsonĩ, ega, monahemulwa, kusangwa monaheka erihemuka lyʼobũlwana bwage.

²⁰ Efũraĩmũ ni mwana wage mwanze kwehĩ? Iye ni mwana wʼerĩtsemesya kwehĩ? Kusangwa emigulu yosĩ ngamuhayira, nyikinamwibuka kutsibu. Kusangwa omutima wage akamũkwa olukando. Omwami Mukulu ati, Kwenene nasyamuganyira.

²¹ Uyisingikire ebiminyikalo byʼenzira, uyiyirire ebibenete byʼerikusondola. Ũlolaye omutima wawe oko nzira nene, ye nʼenzira wagenderamo. Uwe mumbesa wa Ĩsraelĩ, Usubule kandi, usube kandi oko mĩyĩ yawe eyĩ.

²² Uwe mwali oyutawite erĩkĩrĩrya, wasyaganga-ganga emigulu yingahi kwehĩ? Kusangwa Omwami Mukulu abirihangika omwatsi muhya-muhya omo kihugo: Ĩsraelĩ asyamusonda-sonda.

²³ Omwami Mukulu wʼemilondo, Nyamuhanga wa Ĩsraelĩ ati, Basyaswabũga ekĩnywa ekĩ omo kihugo kyʼeYũda nʼomo mĩyĩ yayo, omugulu nasyasũbũlya omũyĩsa wabo bati, Omwami Mukulu akutsumule uwe ahʼerĩĩkala litunganene, uwe kitwa kĩbũyĩrĩre.

²⁴ NʼeYũda nʼemĩyĩ yosĩ yayo basyĩkala haguma mugo, abalĩmĩ, nʼabakalendera nʼebihangulo.

²⁵ Kusangwa nabĩrĩũgũtya abalũhĩre, kandi nabĩrĩsũbya obuli mundu oyũkakongolũka.

²⁶ Neryo monabuka nʼerĩrebya, nʼotũgotserĩ twage motwanyisihako.

²⁷ Omwami Mukulu ati, Lebaya, ebiro bikasa, nasyabiba ekĩtũnga kya Ĩsraelĩ nʼekĩtũnga kyʼeYũda mo mbuto yʼomundu, nʼomo mbuto yʼesyonyama.

²⁸ Omwami Mukulu ati, Kyasyabya, ngoko nategayabo erikulabo, nʼerĩhĩmbũla, nʼerigusabo, nʼerĩherya, nʼerĩagalya, ko nasyateyabo nyitya erĩhĩmba nʼerihera embuto.

²⁹ Oko biro ebyo sĩbendĩsyaswabũga bati, Abotata babirirya ebĩnyũ bĩgayĩre, nʼameno wʼabana akagegera.

³⁰ Nĩkwa obuli mundu asyahola busana nʼebibi biwe ĩyowene-wene. Obuli mundu oyukalya ebĩnyũ bĩgayĩre, ameno wuwe asyagegera.

³¹ Omwami Mukulu ati, Lebaya, ebiro bikasa, nage nasyayira endagano nyihya-nyihya nʼekĩtũnga kya Ĩsraelĩ nʼekĩtũnga kya Yũda.

³² Omwami Mukulu ati, Eyĩ siyendisyasosa endagano eyo nayira nʼabotata wabo ekiro nahambabo omo byala erĩlũsyabo omo kihugo kyʼeMĩsĩrĩ, endagano yage eyo batũa, nomo nanabya ĩba wabo.

³³ Omwami Mukulu ati, Nĩkwa endagane yeyĩ, eyo nasyayira nʼekĩtũnga kya Ĩsraelĩ enyũma wʼebiro ebyo. Nasyahĩra omugambo wage omwisi syabo, nʼomo mutima wabo nasyasakago. Nage nasyabya Nyamuhanga wabo, nabo basyabya bandu bage.

³⁴ Nabo sĩbendĩsyaswakangĩrĩrya obuli mundu mũlĩkyabo, kutse obuli mundu mugala wabo, bati, Muminye Omwami Mukulu; kusangwa abosĩ basyanyiminya, erĩtsũka oko muke wabo erĩhĩka oko mukulu wa kubo, Omwami Mukulu atya; kusangwa nasyabuyira amalolo wabo, nʼebibi byabo sindiendisyaswibukabyo.

³⁵ Omwami Mukulu akabũga, oyukaha eryuba busana nʼekyakakala omo musibo, nʼebihano bĩtegekenĩe byʼomukera nʼesyongũnũnũ busana nʼekyakakala omo kiro, oyũkatabũla engetsi kikaleka ebisunda byayo ibyahuha. Omwami Mukulu wʼemilondo lyo lĩna liwe.

³⁶ Omwami Mukulu ati, Ebihano bĩtegekenĩe ebĩ byamalũa embere syage, neryo abana ba Ĩsraelĩ basyũmbya eribya kihanda embere syage ebiro byosĩ.

³⁷ Omwami Mukulu akabũga ati, Ekyanya ekiri endata kyamatoka erirengwa, nʼebibanza byʼekihugo bikatoka erisonderwa eyĩkwa, neryo nage nasyagusa abana bosĩ ba Ĩsraelĩ busana nʼebyosĩ babirikola, Omwami Mukulu atya.

³⁸ Omwami Mukulu ati, Lebaya, ebiro bikasa, omugulu omũyĩ oyũ asyaswahĩmbwa busana nʼOmwami Mukulu erĩtsũka oko nyũmba nyiri-nyiri ya Hananelĩ erĩhĩka oko Lũkyo lwʼEngonde.

³⁹ Nʼomũlĩkĩ wʼerirenga asyalaba butunganane erilola oko kitwa kyʼeGarebũ, nʼerĩtĩmba erĩhĩka eGoa.

⁴⁰ Nʼomusya gosĩ wʼebĩnda nʼerĩbũ, nʼamalima gosĩ erĩhĩka oko lũsĩ lwʼeKĩdũronĩ, erĩhĩka oko ngonde yʼolũkyo lwʼeSabayĩrĩ oko luhande lwʼendata, hasyabya ahabũyĩrĩre busana nʼOmwami Mukulu. Sihesyakulawa, kutse erĩterĩbwa kandi kera na kera.