Yeremĩa 3 - AMASAKO ABOYTRTRE WA NYAMUHANGA AWAKAHULAWA MO BIBLIA

Nyamuhanga akabirikira Ĩsraelĩ eribinduka

¹ Nyamuhanga akabũga ati, Omundu amahiga omũkalĩ wuwe, naye akamũlũako, nʼeriya oko gundi mundu asyamusubira kwehĩ? Ekihugo ekyo sikyendisyatsanda kutsibu kwehĩ? Nĩkwa uwe wabĩrĩsĩngĩra nʼabaragane bangi, nĩkwa ukanyisubako, Omwami Mukulu atya.

² Usumbe ameso wawe oko bitwa, ulangire; ni hahi batakũtsandĩraya kwehĩ? Wabiririndirirabo oko mũsĩke wʼenzira, nga Muarabu omo mbwarara. Kandi wabĩrĩhalya ekihugo nʼobũsĩngĩrĩ bwawe, nʼobubi bwawe.

³ Busana nʼekyo embũla yabĩrĩkakĩrĩbwa, ihatawa embũla yʼenyũma. Nĩkwa wabya nʼembũmo yʼomũmalaya, mowagana erĩkwa esĩsonĩ.

⁴ Siwabirinyilakira lino uti, Tata wage uli mũsondolĩ wʼobwana-buto bwage kwehĩ?

⁵ Asyabika erihitana liwe erĩhĩka kera na kera kwehĩ? Asyabikalyo erĩhĩka oko ndũlĩ kwehĩ? Lebaya, wabĩrĩbũga nʼerikola emyatsi mibi, wabirikwama enzira yawe.

Emibere ya Yũda ni mibi kwilaba eya Ĩsraelĩ

⁶ Kandi Omwami Mukulu mwabũga nage oko biro byʼOmwami Yosĩa ati, Wabirilangira ekyo Ĩsraelĩ oyukalegula abirikola kwehĩ? Abirihetukira oko buli kitwa kiri nʼomo ndĩna yʼobuli muti mubisi nʼerikolerayo ebyʼobũsĩngĩrĩ.

⁷ Neryo abere abikola emyatsi yosĩ monabũga nyiti, Asyanyisubako, nĩkwa mwatasubula; na mwali wabo omũtebya, ye Yũda, mwalangirakyo.

⁸ Nage monalangira nyiti busana nʼobũsĩngĩrĩ bwa Ĩsraelĩ, oyukalegula, monamuhiga nʼerimuha ebarua yʼerimukomola, nĩkwa mwali wabo wʼomwaga ye Yũda mwatubaha; nĩkwa mwayakola ebyʼobũsĩngĩrĩ nibya.

⁹ Neryo busana nʼerianguha lyʼobũsĩngĩrĩ buwe, neryo mwatsandya ekihugo, neryo mwasĩngĩra amabwe nʼemiti.

¹⁰ Nĩkwa Omwami Mukulu ati, Haguma nʼemyatsi yosĩ eyĩ, mwali wabo wʼomwaga, ye Yũda, mwatanyisubako nʼomutima wuwe gosĩ, nĩkwa omo menge wʼamabehĩ.

¹¹ Neryo Omwami Mukulu mwabũga nage ati, Ĩsraelĩ oyukalegula abĩrĩyĩkangya mo mutunganene kwilaba Yũda omũtebya.

¹² Ugende, ũtũle ebĩnywa ebĩ oko luhande lwʼelutambi lwʼendata nʼerĩbũga uti. Omwami Mukulu ati, Ĩsraelĩ, oyukalegula, subula. Omwami Mukulu ati, Sindiendisyakutungerera omwʼihitana, kusangwa indi wʼeriganyira, sindiendisyabika erihitana erĩhĩka kera na kera.

¹³ Ekiguma, uyisinge ebibi byawe, uti wabĩrĩhalya oko Mwami Mukulu Nyamuhanga wawe, kandi ko wabiripanza-panza obutaga bwawe oko bʼehandi omo ndĩna yʼobuli muti mubisi, kandi ko mutakenga omulenge wage, Omwami Mukulu atya.

¹⁴ Omwami Mukulu ati, ĩnywe bagala abakalegula, musubule, kusangwa ĩngye indi mukama wenyũ. Nage nasyabĩmya omuguma wʼoko mũyĩ, nʼababiri oko buli kĩtũnga, nasyabakolya eSĩonĩ.

¹⁵ Nage nasyabaha abalĩsya abawite omutima ngʼowage, abakandĩsyabalĩsya nʼamenge nʼeriminya.

¹⁶ Neryo, mwamabikanya nʼeribya bangi omo kihugo, Omwami Mukulu ati, Oko biro ebyo, sibendisvahula Erĩsandũkũ lyʼerilagana lyʼOmwami Mukulu. Kutse sĩryendĩsyahĩka oko bũlengekanĩa; kutse siryendisyaswibukwayo; kutse sibendisyayĩtsũtsalyo; kutse siryendisyaswabatswa.

¹⁷ Oko mugulu oyo basyahula eYerũsalema mo kĩtũmbĩ kyʼobwami kyʼOmwami Mukulu. Ebihanda byosĩ bvasyahĩndanĩbwayo busana nʼerĩna lyʼOmwami Mukulu eYerũsalema. Kandi sibendisyaswalendera omo butsibu bwʼomutima wabo mubi.

¹⁸ Oko biro ebyo ekĩtũnga kya Yũda kyasyalendera haguma nʼekĩtũnga kya Ĩsraelĩ, nabo basyasa haguma bakalũa omo kihugo kyʼelutambi lwʼendata, erĩhĩka oko kihugo ekyo naha abotata wenyũ mo mwandu.

Musubule ĩnywe bana bʼerisuba enyũma

¹⁹ Nĩkwa ĩngye monabũga nyiti, Nangatoka erĩkũhĩra nyiti omo katĩkatĩ kʼabagala bage, nʼerikuha ekihugo kibuya, omwandu owenenga wʼebihanda! Nage monabũga nyiti, Mwasyanyahula mo Tata wage, kandi simwendisyaswaleka erinyikwama.

²⁰ Omwami Mukulu ati, Kwenene ngʼomũkalĩ akatswa ũkwʼĩba wuwe nʼepono, ko mwanyikola mutya nʼepono, ĩnywe kĩtũnga kya Ĩsraelĩ.

²¹ Omulenge akogũbawa oko mitwemitwe yʼebitwa, eririra nʼerisaba eryʼabana ba Ĩsraelĩ, kusangwa babĩrĩkĩtya enzira yabo, babiribirirwa Omwami Mukulu Nyamuhanga wabo.

²² Ĩnywe bana abakalegula, musubule, nasyalamya eriregula lyenyũ. Lebaya, twamasa ukʼuwe, kusangwa uli Mwami Mukulu Nyamuhanga wetu.

²³ Kwenene, ebitwa ni matebo, omwaga oko bitwa biri-biri. Ni kwenene, omulamo wa Ĩsraelĩ ali omo Mwami Mukulu Nyamuhanga wetu.

²⁴ Nĩkwa ekindu kyʼesĩsonĩ kyabiribuga omũbĩrĩ wabo tata wetu erĩtsũka omo bũlwana bwetu, byo bĩhyo nʼebihangulo, abagala nʼabali.

²⁵ Tugotsere ahisi omwʼĩsonĩ syetu, nʼerihemula lyetu lituswike; kusangwa twabĩrĩhalya oko Mwami Mukulu, Nyamuhanga wetu, ĩtwe nʼabotata wetu, erĩtsũka omo bũlwana bwetu nʼerĩhĩka mũnabwĩre. Kandi situlitakenga omulenge wʼOmwami Mukulu, Nyamuhanga wetu.